Números 17:1-13
-
Aaronpa tojnun tʼikarin, chaytaj uj señal (1-13)
17 Jehová Diosqa Moisesman nerqa:
2 “Israelitasman niy sapa ayllumanta* kurajkuna+ tojnunkuta apamunankuta, sapa ayllumanta uj tojnuta apamuchunku. Tukuyninpi kanqa 12 tojnus. Sapa ujpa tojnunmanqa sutisninkuta qhelqay.
3 Leví ayllumanta tojnumanqa Aaronpa sutinta qhelqay. Sapa ayllumanta uma kajpataqa uj tojnu kanqa.
4 Chay tojnustataj churamuy tinkukuna toldoman, trato ruwasqamanta arca nisqa cajaj ñaupaqenman,+ maypichus noqa rikhuriykichejpuni chayman.+
5 Noqataj ajllasqay runaj+ tojnunta chaypi tʼikarichisaj. Ajinamanta sayachisaj israelitaspa thutusqankuta. Paykunaqa thutushanku noqaj contraypi,+ jinallataj qankunaj contraykichejpipis”,+ nispa.
6 Moisestaj israelitaswan parlarqa, tukuy kurajkunataj tojnunkuta jaywarqanku. Sapa ayllumanta kurajkunaqa uj tojnuta jaywarqanku, ajinapi 12 tojnus karqa. Aaronpa tojnunpis chayllapitaj kasharqa.
7 Chantá Moisesqa chay tojnusta Jehová Diospa ñaupaqenman churamorqa, maypichus Diospa trato ruwasqan arca kasharqa chay toldoman.
8 Qʼayantintaj Moisesqa yaykorqa maypichus Diospa trato ruwasqan arca kasharqa chay toldoman. Chaypitaj rikorqa Leví ayllumanta Aaronpa tojnunta tʼikarishajta. Tojnonqa kasharqa mukʼusniyoj,* tʼikasniyoj, sumaj poqosqa almendrasniyoj ima.
9 Chantá Moisesqa chay tojnusta Jehová Diospa ñaupaqenmanta orqhomuspa, tukuy israelitasman rikucherqa. Paykunataj chay tojnusta sumajta qhawaykuytawan, sapa ujninku tojnunkuta oqharikaporqanku.
10 Chaymanta Jehová Diosqa Moisesta nerqa: “Aaronpa tojnunta ujtawan churaykamuy+ trato ruwasqamanta arca nisqa cajaj ñaupaqenman. Chay tojnoqa uj señal kanqa+ contraypi oqharikoj runaspaj.+ Chaytaqa ruway amaña contraypi thutunankupaj, ajinamanta ama wañunankupaj”, nispa.
11 Moisestaj chay ratopacha Jehová Diospa kamachisqanman jina ruwarqa. Payqa maychus nisqanman jinapuni ruwarqa.
12 Chantá israelitasqa Moisesman nerqanku: “Kunanqa wañusqayku, wañusqaykupuni, tukuyniyku wañusqayku.
13 Pichus Jehová Diosta yupaychana toldoman qayllaykojqa wañonqa.+ ¿Kunanqa tukuychu ajinata wañusqayku imatajri?”,+ nispa.
Sutʼinchaykunasnin
^ Uj aylloqa uj familiamanta miraj ashkha familias kanku.
^ Mukʼu: waj lugarespi ninku mutʼu.