Números 24:1-25
24 Balaamqa repararqa Jehová Diosqa israelitasta bendeciytapuni munasqanta.* Chayrayku Balaamqa manaña adivinacionpi señalesta maskʼamoj rerqachu.+ Astawanpis kutirikuspa chʼin jallpʼata qhawarerqa.
2 Rikorqataj israelitasta aylluspi* tʼaqasqata.+ Diospa espirituntaj Balaamman jamorqa.+
3 Chantá payqa Diospa nisqasninta kay jinata sutʼinchayta qallarerqa:+
“Kayqa Beorpa wawan Balaampa willaynin,pitachus ñawisninta kicharinku chaypa willaynin.
4 Kayqa Diospa nisqasninta uyarejpa willaynin,Tukuy Atiyniyojta mosqoypi jina rikojpata,ñawisnin kicharisqa pampakama kʼumuykukojpata:+
5 Jacob, toldo wasisniykeqa* may kʼachitus kanku.
Israel, tiyakuna toldosniykeqa may kʼachitus kanku.+
6 Toldo wasisniykeqa mastʼalla kanku chʼaki mayus jina,+mayu kantupi huertas jina,Jehová Diospa plantasqasnin áloe* sachʼas jina,yaku qayllapi cedro sachʼas jina.
7 Yakoqa iskaynin baldesninmanta sutʼumullanpuni,*
mujonqa* ashkha yakus chaypi tarpusqa.+
Reyninpis+ Agagmanta nisqaqa aswan rejsisqa kanqa,+gobiernontaj may jatunchasqa kanqa.+
8 Diosqa payta Egiptomanta orqhomorqa.
Payqa kʼita toroj wajrasnin jina may atiyniyoj paykunata yanapananpaj.
Israelqa payta ñakʼarichej nacionesta oqoykakaponqa,+paykunaj tullusninkuta khamuranqa, flechasninwantaj paykunata tʼunaranqa.
9 Israelqa uj león jina wateqan, uj león jinataj winkurikunpis.*
¿Pitaj chanta uj leonta toreaspa jatarichinmanri?
Bendecisojkunaqa bendecisqa kachunku,maldecisojkunataj maldecisqa kachunku”,+ nispa.
10 Balactaj maytapuni Balaampaj phiñarikorqa. May phiñasqataj makisninta laqʼarakuspa Balaamta nerqa: “Noqaqa enemigosniyta maldecinaykipaj pusachimorqayki,+ qantajrí kay kinsa kutistaña paykunata bendecinki.
11 Kunanqa ripuy kaymanta. Noqaqa imatachus munasqaykita qoyta munarqayki,+ Jehová Diostajrí mana saqesunkichu chayta japʼinaykita”, nispa.
12 Balaamtaj Balacman kuticherqa: “Noqaqa kachamuwasqayki runasman nerqani:
13 ‘Sichus Balac wasinta qolqewan orowan juntʼata qowanman chaypis, noqaqa mana Jehová Diosniypa kamachiwasqanta pʼakisajchu, nitaj allin kajta, mana allin kajtapis noqallamantaqa ruwasajchu. Noqaqa Jehová Diospa niwasqallanta parlasaj’,+ nispa.
14 Kunanqa nacionniyman ripusaj. Chaywanpis niraj ripushaspa willasqayki imatachus kay nación qhepaman* nacionniykita ruwananta”, nispa.
15 Chantá Balaamqa Diospa nisqasninta sutʼinchayta qallarerqa:+
“Kayqa Beorpa wawan Balaampa willaynin,ñawisninta kicharinku chaypa willaynin,+
16 Diospa nisqasninta uyarejpa willaynin,pichus Aswan Patapi kajta rejsin chaypata.
Payqa Tukuy Atiyniyojta mosqoypi jina rikorqa,ñawisnin kicharisqa pampakama kʼumuykukushajtin:
17 Noqa payta rikusaj, chaywanpis mana kunanchu.
Noqa payta qhawasaj, chaywanpis mana kunanpachachu.
Jacobmanta uj chʼaska+ llojsenqa,Israelmanta uj kamachina vara+ llojsenqa.+
Paytaj Moabpa frententa partirparenqa,+runata wañuchejkunaj umasninkutapis partirparenqa.
18 Payqa Edomta japʼikaponqa paypata kananpaj,+Seirpa+ enemigonqa Seirta japʼikaponqa paypata kananpaj,+Israelqa mana manchachikoj kasqanta rikuchenqa.
19 Jacobmanta uj atipaj runa llojsenqa.+
Paytaj tukuchenqa pikunachus llajta thuñisqa kajtin mana wañonqankuchu chaykunata”, nispa.
20 Chaymanta Balaamqa Amalecta qhawarispa Diospa nisqanta sutʼincharqa:
“Amalecqa waj nacionesmanta ñaupaj kaj karqa,+chaywanpis tukuchisqa kanqa”,+ nispa.
21 Chantá Balaamqa quenitastañataj qhawarispa+ Diospa nisqanta sutʼinchallarqataj:
“Wasiykipeqa ni imamanta manchachikunkichu, wasiykeqa chhanka patapi kashan.
22 Quenitastaqa* pichá ruphaykuchenqa.
Mana unayñachu faltan Asiria paykunata presosta apakapunanpaj”, nispa.
23 Chaymanta Balaamqa Diospa nisqanta sutʼinchallarqataj:
“¿Pitaj kausayta atinman kay imasta Dios ruwashajtinri?
24 Kitim+ mar qocha kantusmanta barcos jamonqanku.
Asiriata+ ñakʼarichenqankuEbertapis ñakʼarichenqanku.
Jinapis payqa chinkachisqallataj kanqa”, nispa.
25 Chantá Balaamqa+ sayariytawan riporqa. Balacpis ñanninta ripullarqataj.
Sutʼinchaykunasnin
^ Hebreo parlaypeqa nin, “allin ñawiwan qhawasqanta”.
^ Uj aylloqa uj familiamanta miraj ashkha familias kanku.
^ Chayri “carpa wasisniykeqa”.
^ Aloeqa sumaj qʼapayniyoj sachʼa. Unayqa chay sachʼamanta perfumeta ruwaj kanku.
^ Chayri “miraynenqa”.
^ Sutʼuy: waj lugarespi ninku chʼaqay.
^ Winkuy: waj lugarespi ninku siriy.
^ Chayri “tukukuy pʼunchaykunapi”.
^ Hebreo parlaypeqa nin, “Cayintaqa”.
