Números 3:1-51
3 Maypachachus Jehová Diosqa Moiseswan Sinaí orqopi parlarqa chaypacha, Aaronpatawan Moisespatawan mirayninku kaykuna karqanku.+
2 Aaronpa wawasnenqa kaykuna karqanku: Kuraj kajqa Nadab, chantá Abihú,+ Eleazar,+ Itamar ima.+
3 Chaykuna karqanku Aaronpa wawasnin, ajllasqa sacerdotes,* pikunachus sacerdotes kanankupaj churasqa karqanku chaykuna.+
4 Nadabwan Abihuwanqa Jehová Diospa ñaupaqenpi wañorqanku, imaraykuchus Jehová Diosman mana jaywananku ninata jaywarqanku+ Sinaí chʼin jallpʼapi. Chantapis paykunajtaqa mana wawasninku karqachu. Eleazarwan+ Itamarwantaj+ tatanku Aaronwan khuska sacerdotesllapuni karqanku.
5 Jehová Diosqa Moisesta nerqa:
6 “Leví aylluta* qayllaykuchiy+ sacerdote Aaronpa ñaupaqenman. Paykunaqa Aaronta yanapachunku.+
7 Levitasqa tinkukuna toldoj ñaupaqenpi ruwanasninkuta ruwachunku Aaronpaj, tukuy israelitaspajpis, yupaychana toldopaj ruwanasninkuta ruwaspa.
8 Levitasqa tinkukuna toldoj tukuy imasninmanta cuentayoj kachunku.+ Chantapis israelitaspaj ruwanasninkuta ruwachunku, yupaychana toldopaj ruwanasta ruwaspa.+
9 Levitastaqa Aaronman, wawasninmanwan entreganayki tiyan. Paykunaqa entregasqaña kanku, israelitas ukhumanta paypaj tʼaqasqaña kanku.+
10 Aaronta wawasnintawan churay sacerdotes kanankupaj. Paykuna sacerdote ruwanasta ruwachunku.+ Diospa toldo wasinman* mana sacerdotechu kaj runa* qayllaykonqa chayqa, wañuchisqa kanqa”,+ nispa.
11 Jehová Diosqa Moisesman parlaspa nillarqataj:
12 “Israelitas ukhumanta levitasta ajllakuni israelitaspa tukuy kuraj wawasninkoj cuentanmanta.+ Chayrayku levitasqa noqajta kanqanku.
13 Tukuy kuraj wawasqa noqajta kanku.+ Maypachachus Egiptopi kuraj wawasta wañucherqani chaypacha,+ noqapaj tʼaqakorqani israelitaspa tukuy kuraj wawasninkuta, jinallataj uywaspa ñaupaj kaj uñasninkutapis.+ Chaykunaqa noqajta kanku. Noqamin Jehová Diosqa kani”, nispa.
14 Jehová Diosqa Sinaí chʼin jallpʼapi Moisesman nillarqataj:+
15 “Levitasmanta tukuy qharista yupaspa sutisninkuta qhelqay, uj killayojmanta pataman,+ ñaupa tatasninkoj sutisninkuman jina, mayqen familiamantachus kasqankuman jinataj”, nispa.
16 Moisestaj paykunata yupaspa sutisninkuta qhelqarqa Jehová Dios kamachisqanman jina.
17 Levijpa wawasnenqa kaykuna karqanku: Guersón, Cohat, Merarí ima.+
18 Guersonpa wawasnenqa karqanku Libniwan Simeiwan.+ Chay wawasninpa familiasninkupis paykunaj sutisnillankuwantaj rejsisqas karqanku.
19 Cohatpa wawasnenqa karqanku: Amram, Izhar, Hebrón, Uziel ima.+ Chay wawasninpa familiasninkupis paykunaj sutisnillankuwantaj rejsisqas karqanku.
20 Merarijpa wawasnenqa karqanku Mahliwan+ Musiwan.+ Chay wawasninpa familiasninkupis paykunaj sutisnillankuwantaj rejsisqas karqanku.
Chaykuna karqanku levita familias, ñaupa tatasninkoj sutisninkuman jina.
21 Guersonmanta kay familias jamorqanku: libnitas,+ simeítas ima. Chay familias karqanku guersonitas.
22 Paykuna ukhumanta tukuy yupasqa qharisqa uj killayojmanta pataman 7.500 qharis karqanku.+
23 Guersonita familiasqa toldo wasisninkuta armaj kanku Diosta yupaychana toldoj wasanpi,+ inti yaykuy ladopi.
24 Guersonita familiasta kamachejqa karqa Laelpa wawan Eliasaf.
25 Guersonitasqa Dioswan tinkukuna toldopi cuentayoj karqanku+ Diosta yupaychana toldomanta,+ tukuy qhatanasninmanta,+ toldo punkoj cortinanmanta,+
26 patioj cortinasninmantawan,+ mayqenchus Diosta yupaychana toldotawan altartawan* muyurej chaymanta, chantá patio punkoj cortinanmanta,+ watanasninmanta, chay ruwaypaj kaj tukuy imasmantawan.
27 Cohatmanta kay familias jamorqanku: amramitas, izharitas, hebronitas, uzielitas ima. Chay familias karqanku cohatitas.+
28 Paykuna ukhumanta tukuy qharisqa uj killayojmanta pataman 8.600 qharis karqanku. Paykunaqa santo lugarmanta cuentayoj karqanku.+
29 Cohatita familiasqa toldo wasisninkuta armaj kanku Diosta yupaychana toldoj ujnin ladonpi, sur ladopi.*+
30 Cohatita familiasta kamachejqa karqa Uzielpa+ wawan Elizafán.
31 Cohatitasqa cuentayoj karqanku arca nisqa cajamanta,+ mesamanta,+ candeleromanta,*+ altaresmanta,+ imaschus santo lugarpi karqa chay imasmanta,+ cortinamanta,+ chay ruwaypaj kaj tukuy imasmantawan.+
32 Levitaspa kuraj kamachejninkoqa karqa sacerdote Aaronpa wawan Eleazar.+ Pay kamachej santo lugarpi ruwanasmanta cuentayoj kajkunata.
33 Merarimanta kay familias jamorqanku: mahlitas, musitas ima. Chay familias karqanku meraritas.+
34 Paykuna ukhumanta tukuy yupasqa qharisqa uj killayojmanta pataman 6.200 qharis karqanku.+
35 Merarita familiasta kamachejqa karqa Abihailpa wawan Zuriel. Paykunaqa toldo wasisninkuta armaj kanku Diosta yupaychana toldoj ujnin ladonpi, norte ladopi.*+
36 Meraritasqa cuentayoj karqanku Diosta yupaychana toldoj marcosninmanta,+ sujetana kʼaspisninmanta,+ machonesninmanta,*+ chukusninmanta, tukuy imasninmanta,+ chay ruwaypaj kaj tukuy imasmantawan.+
37 Cuentayojllataj karqanku patioj muyuyninpi karqa chay kʼaspismanta, chay kʼaspispa chukusninmanta,+ estacasninmanta, watanasninmantawan.
38 Diosta yupaychana toldoj ñaupaqenpi, inti llojsimuy ladopi, Dioswan tinkukuna toldoj ñaupaqenpi jarakoj kanku Moisés, Aarón, wawasnin ima. Paykunaqa israelitaspa cuentankumanta Diospa toldo wasinta qhawananku karqa. Sichus waj runa* chay toldoman qayllaykoj chayqa wañuchisqa kanan karqa.+
39 Moiseswan Aaronwanqa tukuy levita qharista yuparqanku uj killayojmanta pataman, Jehová Dios kamachisqanman jina. Paykunaqa levitasta yuparqanku mayqen familiamantachus kasqankuman jina. Tukuyninpitaj 22.000 qharis karqanku.
40 Jehová Diosqa Moisesman nerqa: “Israelitaspa tukuy kuraj qhari wawasninkuta yupay uj killayojmanta pataman.+ Paykunata yupaspa sutisninkuta qhelqay.
41 Israelitaspa tukuy kuraj wawasninkoj cuentanmantaqa levitasta noqapaj tʼaqapuway.+ Noqamin Jehová Diosqa kani. Israelitaspa uywasninkoj tukuy ñaupaj kaj uñasninkoj cuentanmantataj levitaspa uywasninkuta noqapaj tʼaqapuway”,+ nispa.
42 Chantá Moisesqa israelitaspa tukuy kuraj wawasninkuta yupaspa sutisninkuta qhelqarqa, Jehová Dios payman kamachisqanman jina.
43 Tukuynin kuraj wawasqa uj killayojmanta pataman tukuyninpi karqanku 22.273 qharis.
44 Jehová Diosqa Moisesman parlaspa nillarqataj:
45 “Israelitaspa tukuy kuraj wawasninkoj cuentanmantaqa levitasta noqapaj tʼaqapuway, israelitaspa uywasninkoj cuentanmantataj levitaspa uywasninkuta tʼaqapuway. Levitasqa noqajta kanqanku. Noqamin Jehová Diosqa kani.
46 Israelitaspa kuraj wawasninkoqa 273 qhariswan aswan ashkha kanku levita qharismanta nisqaqa.+ Chay qharistaqa rantinki,+
47 sapa ujmanta phishqa siclos* qolqeta tantaspa,+ santo lugarpi mashkhachus uj siclo pesasqanman jina. Sapa sicloqa 12 gramos pesan.*+
48 Chay 273 qharispa cuentanmanta tantasqa qolqetataj, Aaronman wawasninmanwan jayway”, nispa.
49 Moisestaj chay qolqeta tantarqa, levitasmanta aswan ashkha karqanku chaykunamanta pagakusqanta.
50 Chay 273 qharismanta pagakusqan qolqeta tantasqanqa 1.365 siclos karqa, santo lugarpi mashkhachus uj siclo pesasqanman jina.
51 Chaymantataj Moisesqa chay qolqeta Aaronman, wawasninmanwan jaywarqa, Jehová Dios nisqanman jina, imaynatachus Jehová Dios Moisesman kamacherqa chayman jinapuni.
Sutʼinchaykunasnin
^ Uj aylloqa uj familiamanta miraj ashkha familias kanku.
^ Chayri “carpa wasinman”.
^ Mana sacerdotechu kaj runa nispaqa parlashan mana Aaronpa familianmantachu kaj runamanta.
^ Chayri “ura ladopi”.
^ Chayri “candelabromanta”.
^ Chayri “pata ladopi”.
^ Chayri “columnasninmanta”.
^ Waj runa nispaqa parlashan mana levitachu kajmanta.
^ Uj sicloqa pesarqa 11,4 gramos (0,367 onzas troy). Yanapa B14 nisqata leeriy.
^ Hebreo parlaypeqa nin, “Uj sicloqa 20 guerás”. Uj gueraqa pesarqa 0,57 gramos (0,01835 onzas troy). Yanapa B14 nisqata leeriy.
