Números 32:1-42
-
Jordán mayoj inti llojsimuynin ladopi jallpʼasta japʼikunku (1-42)
32 Rubenpa mirayninmanta kajkuna,+ Gadpa mirayninmanta kajkunapis+ ashkha uywasniyoj karqanku. Paykunaqa repararqanku Jazer+ jallpʼaswan Galaad jallpʼaswanqa, uywasta michinapaj sumaj kasqanta.
2 Chayrayku Rubenpa mirayninmanta kajkuna, Gadpa mirayninmanta kajkunapis Moisesman, sacerdote Eleazarman, israelitasmanta kamachejkunaman ima chimpaspa nerqanku:
3 “Atarot, Dibón, Jazer, Nimrá, Hesbón,+ Elealé, Sebam, Nebo,+ Beón ima,+
4 mayqenkunatachus israelitas Jehová Diospa yanapayninwan qhechorqanchej chay jallpʼasqa,+ uywasta michinapaj sumaj kanku. Noqayku kamachisniykitaj ashkha uywasniyoj kayku”,+ nispa.
5 Chantá nillarqankutaj: “Sichus qanman allin rijchʼasunki chayqa, noqayku kamachisniykiman chay jallpʼasta qowayku ari. Amañataj Jordán mayuta chimpachiwaykuchu ari”, nispa.
6 Moisestajrí Gadpa mirayninmanta kajkunaman, Rubenpa mirayninmanta kajkunamanpis nerqa: “Hermanosniykichej maqanakoj rinankukama, ¿kayllapiñachu qhepakuyta munashankichej?
7 ¿Imaraykutaj israelitasta iskayrayachishankichej Jehová Dios paykunaman qonanpuni kashan chay jallpʼaman mana chimpanankupajri?
8 Tatasniykichejpis kikillantataj ruwarqanku jallpʼasta qhawamunankupaj Cadés-Barneamanta kacharqani chaypacha.+
9 Paykunaqa Escol mayuman*+ rispa chay jallpʼasta qhawamorqanku. Kutimuspataj israelitasta iskayrayacherqanku, ima jallpʼatachus Jehová Dios paykunaman qonanta nerqa chayman ama yaykunankupaj.+
10 Chayrayku Jehová Diosqa chay pʼunchay mayta phiñakorqa, juraspataj nerqa:+
11 ‘Egiptomanta llojsimojkunamanta veinteyojmanta pataman kajkunaqa, mana rikonqankuchu ima jallpʼatachus+ Abrahanman, Isaacman, Jacobman ima juraspa qonayta nerqani chayta.+ Imaraykuchus paykunaqa mana tukuy nisqayta kasuwarqankuchu.
12 Quenizita Jefunejpa wawan Calebwan,+ Nunpa wawan Josuellawan+ chay jallpʼataqa rikonqanku, Jehová Diosta tukuy sonqo kasukusqankurayku’,+ nispa.
13 Chayrayku Jehová Diosqa chay israelitaspaj mayta phiñakorqa, chʼin jallpʼapitaj paykunata 40 watasta puriykachacherqa,+ Jehová Diospa ñaupaqenpi mana allinta ruwasqankurayku tukuyninku wañuranankukama.+
14 Kunanqa qankunañataj chay juchasapa tatasniykichej jina ruwayta munaspa, Jehová Diosta astawan phiñachiyta munashankichej israelitaspa contranpi.
15 Sichus qankuna nisqallaykichejta ruwankichej chayqa, payqa watejmanta israelitasta chʼin jallpʼaspi saqerparenqa. Chantá qankuna juchayoj kankichej tukuy israelitas wañunankupaj”, nispa.
16 Chaymanta paykunaqa Moisesman qayllaykuspa nerqanku: “Uywasniykupaj kaypi rumi kanchasta* perqakullasqayku ari, wawasniykupajpis llajtasta ruwapusqayku.
17 Wakichisqallapunitaj kasqayku maqanakupaj,+ israelitaspa ñaupaqenkutataj risqayku japʼikunanku kashan chay jallpʼaman chayachinaykukama. Chaykamataj wawasniykoqa sumaj jarkʼachasqa llajtaspi qhepakonqanku, kay llajtayojkunamanta sumaj jarkʼasqas.
18 Noqaykoqa mana wasisniykuman kutinpusqaykuchu sapa israelita jallpʼata japʼikunankama.+
19 Kay inti llojsimuy ladopiña jallpʼata japʼispaqa, manaña ima jallpʼatapis japʼisqaykuchu Jordán chimpapeqa, nitaj aswan jaqaypipis”,+ nispa.
20 Moisestaj paykunaman kuticherqa: “Qankunaqa kaytaraj ruwankichej: Jehová Dios nisqanman jina maqanakuman rinkichej.+
21 Sapa ujniykichej Jordán mayuta chimpaspa Jehová Diospa sutinpi maqanakamunkichej, paytaj enemigosninta ñaupaqenmanta wijchʼonqa.+
22 Jehová Diospa yanapayninwan maqanakamunkichej, chay jallpʼaspi tiyakojkunata atipanaykichejkama.+ Sichus chayta ruwankichej chayqa, recién kutinpunkichej,+ ajinamanta mana juchayojchu kankichej Jehová Diospa ñaupaqenpi, israelitaspa ñaupaqenkupipis. Chantaraj kay jallpʼataqa Jehová Dios qankunaman qosonqachej.+
23 Sichus chayta mana ruwankichejchu chayqa, Jehová Diospa contranpi juchallikunkichej, chay juchaykichejmantataj cuentata qonkichej.
24 Kunanqa wawasniykichejpaj llajtasta ruwakullaychej, uywasniykichejpajpis kanchasta perqakullaychej.+ Jinapis maqanakamusqayku nishankichej chaytaqa juntʼankichejpuni”, nispa.
25 Chantá Gadpa mirayninmanta kajkunawan Rubenpa mirayninmanta kajkunawanqa, Moisesta nerqanku: “Wiraqochíy, kay kamachisniykeqa imatachus kamachishawayku chayta ruwasqaykupuni.
26 Wawasniyku, warmisniyku, tukuy uywasniykupis Galaadpi ruwakusqayku chay llajtaspi qhepakonqanku.+
27 Noqayku kamachisniykitajrí chimpasqayku. Tukuyniykutaj Jehová Diospa ñaupaqenpi maqanakamusqayku,+ imaynatachus qan wiraqochíy kamachishawayku ajinata”, nispa.
28 Chaymanta Moisesqa uj kamachiyta qorqa sacerdote Eleazarman, Nunpa wawan Josueman, israelita ayllusmanta* familiaspi uma kajkunaman ima.
29 Moisesqa paykunaman kay jinata kamacherqa: “Sichus Gadpa mirayninmanta kajkuna, Rubenpa mirayninmanta kajkunapis Jordán mayuta qankunawan khuska chimpaspa, Jehová Diospa ñaupaqenpi maqanakamonqanku chay jallpʼasta japʼikapunaykichejkama chayqa, Galaad jallpʼata paykunaman qopunkichej, chaypi tiyakunankupaj.+
30 Sichus mana qankunawan chimpanqankuchu maqanakamoj chayqa, paykunaqa qankunawan khuska jallpʼata Canaanpi japʼikonqanku”, nispa.
31 Chayta uyarispa Gadpa mirayninmanta kajkunawan Rubenpa mirayninmanta kajkunawan kuticherqanku: “Kay kamachisniykeqa Jehová Diospa nisqanta ruwasqayku.
32 Jehová Diospa ñaupaqenta Canaán jallpʼaman chimpaspa maqanakamusqayku.+ Chaywanpis jallpʼataqa Jordán mayoj kay ladonpi japʼikusqayku”, nispa.
33 Ajinamanta Moisesqa jallpʼasta qorqa Gadpa mirayninmanta kajkunaman, Rubenpa mirayninmanta kajkunaman,+ Manasespa khuskan ayllunman+ ima. Manasesqa Josejpa wawan karqa. Paykunamanqa qorqa amorreospa reyninku Sehonpa kamachiyninpi karqa chay jallpʼasta,+ Basanmanta rey Ogpa kamachiyninpi karqa chay jallpʼastawan.+ Tukuy chay jallpʼasta, llajtasninta, muyuyninpi kaj llajtastawan paykunaman qorqa.
34 Gadpa mirayninmanta kajkunaqa watejmanta ruwarqanku kay llajtasta: Dibonta,+ Atarotta,+ Aroerta,+
35 Atrot-Sofanta, Jazerta,+ Jogbehata,+
36 Bet-Nimrata,+ Bet-Haranta+ ima. Chaykunaqa jarkʼachasqa llajtas karqanku. Uywasninkupajpis rumi kanchasta perqarqanku.
37 Rubenpa mirayninmanta kajkunataj watejmanta ruwarqanku kay llajtasta: Hesbonta,+ Elealeta,+ Quiryataimta,+
38 Nebota,+ Baal-Meonta+ ima. Chay llajtasmantaj waj sutista churarqanku. Chantapis ruwallarqankutaj Sibmá llajtata. Chay ruwasqanku llajtasmantaj waj sutista churarqanku.
39 Manasespa wawan Makirpa mirayninmanta kajkunaqa,+ Galaadpi tiyakoj amorreosta qharqospa chay jallpʼasta paykunamanta qhechorqanku.
40 Chaymantataj Moisesqa chay Galaad jallpʼasta Manasespa wawan Makirpa mirayninmanta kajkunaman qoporqa. Ajinamanta paykunaqa chaypi tiyakorqanku.+
41 Manasés ayllumanta Jairpis Galaad jallpʼaspi toldosniyoj* ranchosta amorreosmanta qhechumorqa, chaykunatataj suticharqa Havot-Jaír*+ nispa.
42 Nobahtaj Quenat llajtata qhechuspa japʼikaporqa, muyuyninpi kaj ranchostawan. Chay llajtatataj kikin Nóbah sutillanwantaj suticharqa.
Sutʼinchaykunasnin
^ Chayri “Escol wayqʼoman”.
^ Chayri “corralesta”.
^ Uj aylloqa uj familiamanta miraj ashkha familias kanku.
^ Chayri “carpasniyoj”.
^ Havot-Jaír suteqa niyta munan Jairpa toldosniyoj ranchosnin.
