Nahúm 3:1-19
3 Ay yawar jichʼaj llajtamanta.
Llullakuywan suwakuywan juntʼa kashan.
Nipuni mana suwakuspaqa kanchu.
2 Seqʼoj seqʼoj uyarikun, ruedaspa sonasqanpis uyarikullantaj.
Caballospa corresqanku uyarikun, carretaspa thalakusqankupis uyarikullantaj.
3 Caballospi purej soldados, lliphipej espadas, kʼancharej tʼojsina lanzas,may chhika runa wañusqas, montón montón ayaspis...,may chhika wañusqa cuerpos.
Paykunaqa chay wañusqaspi jaytʼakunku.*
4 Chayqa qhatirin chay khuchi warmi* khuchichakusqanrayku.
Chay warmeqa kʼachita, coqueta, yachaj layqataj.*
Nacionesta khuchiriosninwan japʼiykun, familiastapis layqeriosninwan japʼiykun.
5 Angelesta kamachej Jehová Diosqa nin: “Noqaqa contraykipi* kashani.+
Faldaykitaqa uyaykikama oqharisqayki.
Nacioneswan qʼalaykita qhawachisqayki,gobiernospis pʼenqayniykita rikonqanku.
6 Qʼopawan jichʼaykusqayki,mana allinman tukuchisqayki,wajkunaj asikunankuman tukuchisqayki.+
7 Pillapis rikusojqa qanmanta ayqekonqa,+ nenqataj:
‘Niniveta thuñirpasqanku.
¿Pitaj Ninivemanta waqanqari?’, nispa.
Sonqochasunanpajqa mana pipis kanqachu.
8 ¿Qanqa Nilo mayumanta llojsej canales chaypi tiyarikoj chay No-Amonmanta*+ aswan sumajchu kasqanki?+
Payqa yaku muyurisqa karqa,mar qochaqa qhapajyacherqa, mar qochaqa perqan jina karqa.
9 Etiopiawan Egiptowanqa mana tukukoj kallpan karqanku.
Putwan+ libioswanqa payta yanaparqanku.*+
10 Jinapis No-Amontaqa presochasqata apakaporqanku,karuman apasqa karqa.+
Wawasnintapis tukuynin calle esquinaspi chʼallparqanku.
Sumaj respetasqa runasnintaqa suerteta* choqaspa apakaporqanku,jatunpaj qhawasqa runasnintataj cadenaswan watarqanku.
11 Qanpis machaykullankitaj.+
Pakakamunki.
Enemigosniykimanta pakakunaykipaj uj jarkʼakunata maskʼanki.
12 Sumaj perqasniyoj wasisniykeqa ñaupaj poqoyniyoj higo sachʼas jina kanku.
Thalasqa kajtin higosnenqa mikhuyta munajkunaj siminkuman tʼakarakonqa.
13 Tropa soldadosniykeqa warmis jinallaña chaupiykipi kanku.
Nacionniykej punkusnenqa enemigosniykipaj kichasqalla kanqa.
Ninataj punku trancanasniykita ruphaykonqa.
14 Yakuta wisiy enemigosniyki muyuykusonqanku chaypaj.+
Jarkʼachana perqasniykita astawan sinchʼiyachiy.
Tʼuruman yaykuspa tʼuruta saruy.
Moldeta japʼispa ladrillosta ruway.
15 Chaypipis ninaqa ruphaykusonqa.
Espada wañuchisonqa.+
Manaraj phawaj langostas jina oqoykusonqa.+
Manaraj phawaj langostas jina ashkhaman tukuy.
Langostas jina may chhikaman tukuy.
16 Vendedoresniykita may chhikaman tukuchinki, cielopi estrellasmantapis aswan ashkharaj kanku.
Manaraj phawaj langostaqa qaranta chʼuskikuspa* phawarikapun.
17 Llajtaykita qhawajkunaqa langostas jina kanku,soldadosniykita kamachejkunapis may chhika langostas jina kanku.
Chiri diaqa rumi kanchaspi* samarinku,inti kʼancharimusqantawantaj phawaspa ripunku,nitaj pipis yachanchu maymanchus phawasqankuta.
18 Asiriaj reynin, michejkunasniykeqa puñuy machasqa kashanku,kurajkunasniykeqa sumaj wasisninkupi karikushanku.
Runasniykeqa orqospi chʼeqerasqa* kashanku,nitaj pipis paykunataqa tantaykushanchu.+
19 Chay jina llakiyniykimantaqa mana imapis salvasonqachu.
Nanayniykipajqa mana jampi kanchu.
Qanmanta tukuy uyarejkunaqa tʼajllarikonqanku,+chay jina sajra kasqaykiwan tukuyta ñakʼarichisqaykirayku”.+
Sutʼinchaykunasnin
^ Jaytʼakuy: waj lugarespi ninku tropezakuy.
^ Khuchi warmi nispaqa parlashan qhariswan puñuykoj warmimanta, astawanqa qolqerayku.
^ Chayri “brujataj”.
^ Contraykipi nispaqa Ninivej contranpi kashasqanta nishan.
^ No-Amón nispaqa Tebasmanta parlashan.
^ Hebreo parlaypeqa nin, “qanta yanapasorqanku”.
^ Chayri “lluchʼukuspa”.
^ Chayri “corralespi”.
^ Chʼeqeray: waj lugarespi ninku tʼaqaray.
