Sofonías 1:1-18
1 Sofoniasqa* kay willayta Jehová Diosmanta japʼerqa Amonpa+ wawan Josías+ Judapi rey jina kamachishajtin. Sofoniasqa Cusij wawan karqa, Cusitaj Guedaliaspa wawan karqa, Guedaliastaj Amariaspa wawan karqa, Amariastaj Ezequiaspa wawan karqa.
2 Jehová Diosqa nin: “Jallpʼa patamanta tukuy imata chinkarparichisaj”,+ nispa.
3 Jehová Diosqa nin: “Runasta, animalestapis chinkarparichisaj.
Pʼisqosta, mar qochamanta pescadostapis chinkarparichisaj,+pantachej imasta,*+ sajra runastapis tukurparichisaj.
Runasta jallpʼa patamanta chinkarparichisaj”.
4 “Makiyta oqharisaj Judaj contrantaJerusalenpi tiyakoj tukuy runaspa contrantapis.
Kay lugarmantaqa Baalta qʼalata chinkarparichisaj,+waj llajtayoj diosespa sacerdotesninkoj sutisninkuta, sacerdotestawan.+
5 Cielopi kaj ejercitoman terrazasninkupi* kʼumuykojkunata tukurparichisaj,+Jehová Diosman kʼumuykukuspa mana wasanchanankuta jurashaspa,+Malcammanpis mana wasanchanankuta jurajkunata.+
6 Tukurparichillasajtaj Jehová Diosta manaña qhatikojkunata,+Jehová Diosta mana maskʼajkunata, mana payta watukojkunatapis”.+
7 Tukuyta Kamachej Señor Jehová Diospa ñaupaqenpi chʼinlla kaychej, Jehová Diospa pʼunchaynin qayllapiña kasqanrayku.+
Jehová Diosqa jaywanata wakichin, wajyakusqasnintataj llimphuchan.
8 “Jehová Dios jaywanata jaywanqa chay pʼunchayqa, cuentata mañasaj kuraj kamachejkunamanta,reypa wawasninmanta,+ forastero ropasta churakojkunamantawan.
9 Cuentata mañallasajtaj chay pʼunchay alto pataman* tukuy wicharejkunamanta,patronninkoj wasinman maqanakuykunata, chʼaukiyaytawan* juntʼachejkunamanta”.
10 Jehová Diosqa nin: “Chay pʼunchayqaPescado Punkumantapacha+ qhapariy uyarikamonqa,llajtapi Mosoj Wasismantapacha waqay uyarikamonqa,+lomasmantataj sinchʼi sonay uyarikamonqa.
11 Mactespi* tiyakojkuna, waqaychej.
Tukuynin vendejkunaqa wañurachisqaña kanku,qolqe metalta pesajkunaqa tukuchisqaña kanku.
12 Chaypachaqa Jerusalenta mecheroswan allinta qhawaykusaj.
Cuentata mañasaj kausayninkuwan sonqo juntʼasqa kajkunamanta, sonqonkupitaj kay jinata nejkunamanta:
‘Jehová Diosqa ni allin kajtapis ni mana allin kajtapis ruwanqachu’,+ nispa.
13 Valorniyoj imasninkoqa saqueasqa kanqa, wasisninkupis thuñirasqa kanqa.+
Wasista ruwakonqanku, manataj chaypi tiyakonqankuchu,uva huertasta churanqanku, vinontataj mana tomanqankuchu.+
14 Jehová Diospa jatun pʼunchaynenqa qayllamushanña,+qayllitapiña kashan, usqhayllata qayllaykamushan.*+
Jehová Diospa pʼunchayninpa sonaynenqa manchay mancharina.+
Chay pʼunchayqa soldadospis qhaparikunku.+
15 Chay pʼunchayqa phiñakuy pʼunchay,+ñakʼarina pʼunchay, llakiy pʼunchay,+sinchʼi para pʼunchay, thuñikuy pʼunchay,laqha pʼunchay, llanthu pʼunchay,+phuyusqa pʼunchay, yana phuyusqa pʼunchay,+
16 wajrata waqachina pʼunchay, guerra qallarinanpaj qhaparina pʼunchay,+sumaj perqasniyoj llajtaspa contranta, esquinaspi jatuchaj torrespa contrantawan.+
17 Runasta llakiypi rikhurichisaj,ciegos jina purenqanku,+Jehová Diospa contranta juchallikusqankurayku.+
Yawarninkoqa jallpʼa jina jichʼasqa kanqa,chʼunchulasninkutaj* wanu jina.+
18 Jehová Diospa phiñakuynin pʼunchaypeqa ni qolqe metalninkupis ni oronkupis paykunata salvayta atenqachu.+
Phiñakuynenqa nina jina jallpʼantinta ruphaykonqa.+
Payqa jallpʼantinpi tukuy tiyakojkunata mancharinata wañurachenqa”.+
Sutʼinchaykunasnin
^ Sofonías suteqa niyta munan Jehová pakaykun (waqaychan).
^ Pantachej imasta nispaqa ichá parlashanman santosta yupaychanamanta, santosta yupaychanapaj imasmantawan.
^ Chayri “wasi patasninkupi”.
^ Alto pataman nispaqa, ichapis parlashan maypichus reypa kamachina tiyanan karqa chay alto patamanta.
^ Chayri “engañaytawan”.
^ Mactesqa Jerusalenpisina karqa, Pescado Punku chaynejpi.
^ Chayri “usqhay usqhayllata chayamushan”.
^ Chayri “aychasninkutaj”.
