Colosenses 2:1-23
2 Yachanaykichejta munani qankunata, jinallataj Laodiceapi+ kajkunata, manaraj rejsiwankuchu chaykunatapis yanapanaypaj mayta kallpachakushasqayta.
2 Chaytaqa ruwani paykuna sonqochasqa kanankupaj,+ munakuypitaj ujchasqa kanankupaj.+ Ajinamanta cheqa kajta sutʼita entiendesqankumanta mana iskayrayanankupaj, Diospa pakasqa yachaynintataj allinta rejsinankupaj. Chay pakasqa yachayqa Cristo.+
3 Paypi sumaj pakasqa kashan may valorniyoj yachay, rejsiytaj.+
4 Chaytaqa nini, ama pipis sumajman rijchʼakoj palabraswan pantachisunaykichejpaj.
5 Mana qankunawan kashajtiypis, sonqoyqa qankunawan kashan. Kusikuni tukuy imata maychus kajta ruwasqaykichejmanta,+ Cristopi creesqaykichejpi sinchʼita sayasqaykichejmantapis.+
6 Chayrayku, imaynatachus Cristo Jesusta Señorniykichejpaj rejsikaporqankichej, ajinallatataj payta kasukuspallapuni kausaychej.
7 Yachachisqa kasqaykichejman jina, creeyniykichejqa Cristopi sumaj ukhu saphisniyoj kanan tiyan, paypi sayachisqa,+ sinchʼi sayasqataj.+ Chantapis Diosman agradecekullaychejpuni.+
8 Allinta qhawakuychej, pajtataj pipis presota jina apakapusunkichejman runaj yachayninwan, qhasi manakaj yachachiykunawan ima.+ Chaykunaqa ñaupa runaspa costumbresninkumanta jamun, kay mundoj yuyayninmantawan, manataj Cristomantachu jamun.
9 Payqa tukuy imapi Diosman rijchʼakun.+
10 Chayrayku qankunaqa tukuy imata paynejta japʼinkichej. Paymin tukuy gobiernospa uman, jinallataj tukuy autoridadespatapis.+
11 Paypa discipulosnin kasqaykichejrayku mana makiwanchu circuncidasqa* karqankichej, manachayqa Cristomanta kaj circuncisionwan.+ Chayrayku juchasapa cuerpoykichejpa munayninmanta kacharichikorqankichej.+
12 Qankunaqa paywan khuska bautismonpi pʼampasqa karqankichej.+ Payta qhatisqaykichejraykutaj, qankunapis paywan khuska kausarichisqa karqankichej,+ Diospa jatun atiyninpi creesqaykichejrayku. Diosqa chay atiyninwan Cristota wañusqas ukhumanta kausarichimorqa.+
13 Chantapis juchasniykichejpi wañusqa jina kasharqankichej, manataj circuncidasqachu karqankichej. Jinapis Diosqa Cristowan khuska kanaykichejpaj kausayta qosorqachej.+ Payqa tukuy juchasninchejta tukuy sonqo perdonawarqanchej.+
14 Chantapis qhelqasqa Leyta+ chinkasqata chinkacherqa, mayqenpichus kamachiykuna karqa+ chayta. Chay Leyqa contranchejpi kasharqa.+ Diostaj chay Leytaqa chinkacherqa, Cristo ñakʼarina kʼaspipi* wañusqannejta.+
15 Chaynejllatataj* payqa gobiernosta, autoridadestapis atipasqata atiparqa. Chantá paykunata atipasqanta tukuyman rikucherqa,+ maqanakupi atipasqan soldadosta jina purichispa.*
16 Chayrayku ama pipis qankunata juchachachunchu mikhunamanta, chayri ujyanamanta,+ chayri fiestasta, killa rikhuriyta,*+ chayri samarikuna pʼunchayta ruwanamanta.+
17 Chaykunaqa jamoj imaspa llanthullan kanku,+ chay imastaj Cristopi juntʼakunku.*+
18 Ama piwanpis japʼinaykichej kashan chay tʼinkata qhechuchikuychejchu.+ Imaraykuchus chay jina runasqa kʼumuykukoj sonqoyojman rijchʼakuyta gustachikunku, angelesta yupaychaymanta wañurinku, mosqoypi jina rikusqanku imaspitaj mayta atienekunku. Paykunaqa pantaj runaj yuyayninman jinalla yuyanku, qhasi manakajtataj jatunchakunku.
19 Chay jina runasqa Cristoman mana ujchasqachu kashanku, pichus cuerpoj uman chayman.+ Cuerpoqa paynejta ankusninwan sumaj ujchasqa kashan, nitaj imamantapis pisichikunchu. Chay cuerpota wiñachejtaj Dios.+
20 Sichus qankuna kay mundoj yuyayninta+ qhesacharqankichej, Cristowan khuskataj wañorqankichej chayqa, ¿imaraykutaj kay mundojtapis kawajchej jinallapuni kausashankichejri? ¿Imaraykutaj kay mundoj kamachiykunasninta kasushallankichejpuniri?+
21 Chay kamachiykunaqa kanku: “Ama japʼiychu, ama llamiychu, ama llankhaychu”.
22 Chay imasqa mikhojtinchej, tomajtinchej tukukapoj imasllamanta kanku. Chaykunataqa runaslla kamachinku, yachachinkutaj.+
23 Chay kamachiykunaqa allinman rijchʼakun. Chaywanpis mana runata yanapanchu aychaj munayninta atipananpaj, imaynatachus Diosta yupaychanankuta paykunalla ajllakusqankurayku. Paykunaqa kʼumuykukoj sonqoman rijchʼakullanku, cuerponkutataj ñakʼarichinku.+
Sutʼinchaykunasnin
^ Circunciday niyta munan qharejpa jispʼananpa puntanmanta qaritanta khuchurpariy. Glosariopi circuncisión nisqata leeriy.
^ Chayri “ñakʼarina postepi”. Glosariopi ñakʼarina kʼaspi nisqata leeriy.
^ Ichá nillanmantaj “Paynejllatataj”.
^ Chayri “marchachispa”.
^ Killa rikhuriy: waj lugarespi ninku mosoj killa.
^ Chayri “chay llanthutaj Cristoman pusan”.
