Colosenses 3:1-25
3 Sichus Cristowan khuska kausarichisqa karqankichej chayqa,+ cielopi kaj imasta maskʼallaychejpuni. Chaypimin Cristoqa Diospa pañanpi tiyasqa kashan.+
2 Yuyayniykichejqa cielopi kaj imasllapipuni kachun,+ amataj kay jallpʼapi kaj imaspeqa.+
3 Imaraykuchus qankunaqa wañorqankichej. Kausayniykichejtaj Cristoj makinpi kashan, Diospa munayninman jina.
4 Cristomin kausayninchejqa.+ Pay atiyninta rikuchejtintaj, qankunapis paywan khuska chaypi kankichej, paywan khuskataj jatunchasqa kankichej.+
5 Chayrayku wañuchiychej* qankunapi kaj sajra imasta.+ Ama kaykunapi urmanaykichejpaj: khuchichakuy juchapi,* millay imasta ruwaypi, qʼoñirisqa kaypi,+ sajra kajta moqʼeypi, nitaj munapayaypipis, imaraykuchus munapayayqa santosta yupaychaywan ninakun.
6 Chay imasta ruwajkunapajqa Diospa kʼajaj phiñakuynin jamonqa.
7 Qankunapis ajina kausaypi ñaupajta purej kankichej.+
8 Kunantajrí qankunamanta wijchʼuychej: kʼajaj phiñakuyta, rabiakuyta, sajra kajta ruwayta,+ sonqota nanachinapaj jina parlayta,+ millay parlayta+ ima.
9 Ama qankunapura llullanakuychejchu.+ Ñaupa kausayniykichejta, ñaupa ruwasqasniykichejtapis saqeychej.+
10 Diospa qosqan mosoj kausaywantaj pʼachallikuychej.+ Chay kausayqa Diosta allinta rejsiywan mosojyachisqa kashan, ajinamanta chay kausayqa Diospa rijchʼayninman jina kashan.+
11 Chaypitaj manaña kanchu griego kay chayri judío kay, circuncidasqa* kay chayri mana circuncidasqa kay, forastero kay chayri monte runa kay,* esclavo kay chayri mana esclavo kay. Chay mosoj kausaypi, Cristoqa tukuy ima, tukuy imapitaj kashan.+
12 Qankunaqa Diospa ajllasqasnin kankichej,+ paypaj tʼaqasqas, may munasqastaj. Chayrayku kay imaswan pʼachawan jina pʼachallikuychej: tukuy sonqo khuyakuywan,+ kʼacha kaywan, kʼumuykukoj sonqo kaywan,+ llampʼu sonqoyoj kaywan,+ pacienciawan+ ima.
13 Wajkuna contraykichejpi imata ruwajtinkupis,+ ujkuna ujkunawan aguantanakullaychejpuni, tukuy sonqotaj perdonanakuychej.+ Imaynatachus Jehová* Dios qankunata tukuy sonqo perdonasorqachej, ajinallatataj qankunapis perdonanakuychej.+
14 Chay tukuy imasmanta astawanqa, munakuywan pʼachawan jina pʼachallikuychej.+ Imaraykuchus munakoyqa runasta sumajta ujchan.+
15 Cristomanta jamoj sonqo tiyaykoyqa, sonqoykichejpi kamachichun.+ Imaraykuchus Diosqa wajyasorqachej, uj cuerpolla, sonqo tiyaykusqataj kanaykichejpaj. Chantapis agradecekuychejpuni.
16 Cristoj yachachiykunasnenqa sonqoykichejpi allin juntʼa kachun. Ajinamanta yachayniyoj kankichej. Purajmanta yachachinakuychej, kallpachanakuychejtaj:* salmoswan,+ Diosta alabanapaj takiykunawan, yupaychanapaj kʼacha takiykunawan ima. Jehová* Diosman sonqoykichejpi takiychej.*+
17 Parlaspapis chayri imata ruwaspapis, tukuy imata Señor Jesuspa sutinpi ruwaychej. Paynejtataj Tata Diosman graciasta qoychej.+
18 Casarasqa warmis, qosaykichejta kasukuychej.+ Imaraykuchus chaymin allin Señorpata kajkunapajqa.
19 Qosas, warmiykichejta munakullaychejpuni,+ amataj paykunapaj sinchʼita phiñakuychejchu.*+
20 Wawas, tataykichejta, mamaykichejtawan tukuy imapi kasuychej.+ Imaraykuchus chayqa, Señorta mayta kusichin.
21 Tatas, ama wawasniykichejta phiñachiychejchu,+ ama llakisqalla kanankupaj.
22 Esclavos, patronesniykichejta tukuy imapi kasukuychej.+ Chaytataj ama paykunaj rikunallankutachu ruwaychej, runasllawan allinpaj qhawachikuyta munaspa. Astawanqa tukuy sonqo paykunata kasukuychej, Jehová* Diosta manchachikuspa.
23 Imata ruwashaspapis, tukuy sonqo, tukuy kallpawantaj chayta ruwaychej, Jehová* Diospaj jina,+ manataj runaspaj jinachu.
24 Imaraykuchus yachankichej jina, herenciataqa Jehová* Dios tʼinkata jina qosonqachej.+ Patronninchej Cristotaqa esclavos jina sirviychej.
25 Sajra kajta ruwajqa, chay sajra ruwasqanmanta castigasqa kanqa.+ Imaraykuchus Diosqa tukuyta uj rejllata qhawan.+
Sutʼinchaykunasnin
^ Chayri “chinkachiychej”.
^ Griego parlaypeqa nin, pornéia. Glosariopi khuchichakuy jucha nisqata leeriy.
^ Circunciday niyta munan qharejpa jispʼananpa puntanmanta qaritanta khuchurpariy. Glosariopi circuncisión nisqata leeriy.
^ Griego parlaypeqa nin, “escita”. Ajinata nej kanku pisipaj qhawasqa karqanku chay runasta, imaynatachus kausakusqankurayku, costumbresninkurayku ima.
^ Chayri “yuyaychanakuychejtaj”.
^ Chayri “Tukuy sonqo Jehová Diosman takiychej”.
^ Chayri “amataj kʼumuykachachiychejchu”.
