Esdras 1:1-11
1 Persiaj reynin Ciro+ ñaupaj kaj watata kamachishajtin, Jehová Diosqa Persiaj reynin Ciroj sonqonta kuyuricherqa, uj kamachiyta tukuynin nacionnintinman willachinanpaj. Ajinamanta juntʼakunanpaj imatachus Jehová Dios Jeremiasnejta parlasqan.+ Chay kamachiytaqa qhelqaykuchillarqataj,+ kay jinatataj nisharqa:
2 “Persiaj reynin Ciroqa kayta nin: ‘Cielopi kaj Jehová Diosqa kay jallpʼamanta tukuynin nacionesta qopuwan.+ Payqa Jerusalenpi uj wasita ruwapunayta kamachiwan,+ Judá jallpʼapi.
3 Pikunachus paypa nacionninmanta kanku chaykunawan Diosninku kachun, Judapi kaj Jerusalenmantaj kutipuchunku. Israelpa Diosnin Jehovaj wasintataj watejmanta ruwamuchunku. Paymin cheqa Diosqa.* Wasenqa Jerusalenpi karqa.*
4 Mayqen forasterollapis+ kutipuyta munajtenqa, vecinosninku yanapachunku maypi tiyakojtinkupis. Paykunaman jaywachunku qorita, qolqeta, waj imasninkuta, uywastapis, chantá imastachus cheqa Diospa wasinpaj tukuy sonqo qoyta munanku chaykunatawan,+ mayqenchus Jerusalenpi karqa chaypaj’, nispa”.
5 Chantá Judá ayllupi,* Benjamín ayllupi umas kajkunaqa, jinallataj sacerdotes,* levitaspis,* pikunatachus cheqa Dios sonqosninkuta kuyuricherqa, chaykuna wakichikorqanku Jehová Diospa wasinta watejmanta ruwamunankupaj, mayqenchus Jerusalenpi kasharqa chayta.
6 Vecinosninkutaj paykunata yanaparqanku, qorqankutaj qori imasta, qolqe imasta, waj imasta, uywasta, waj valorniyoj imastawan, tukuy sonqo Diospa wasinpaj qosqankutaj wajlla karqa.
7 Chantapis rey Ciroqa kamacherqa kutichipunankuta imastachus Nabucodonosor Jehová Diospa wasinmanta apakapusqa chay imasta. Chay imastaqa Nabucodonosor Jerusalenmanta apamuspa diosninpa wasinman churamusqa.+
8 Persiaj reynin Ciroqa qolqe jallchʼajnin Mitridateswan chay imasta orqhocherqa, listaman churachispataj Sesbazarman* jaywacherqa.+ Sesbazarqa Judá ayllumanta kamachej karqa.
9 Kay karqa chay lista: canastasman rijchʼakoj qori fuentesqa 30 karqa, canastasman rijchʼakoj qolqe metalmanta fuentestaj 1.000 karqa, chantá waj fuentestaj 29 karqa.
10 Kallarqataj qorimanta 30 juchʼuy fuentes, qolqe metalmanta 410 juchʼuy fuentes, 1.000 waj imaspiwan.
11 Qorimanta, qolqe metalmanta chay tukuynin imasqa 5.400 karqa. Sesbazarqa chay tukuy imasta aparqa+ presos apasqa kajkuna Babiloniamanta llojsimushajtinku, Jerusalenmantaj kutipushajtinku.
Sutʼinchaykunasnin
^ Glosariopi cheqa Dios nisqata leeriy.
^ Ichá nillanmantaj “Payqa Jerusalenpi kashan”.
^ Uj aylloqa uj familiamanta miraj ashkha familias kanku.
^ Sesbazarqa ichapis Zorobabel karqa. Zorobabelmantaqa Esdras 2:2; 3:8 ima parlashan.
