Esdras 4:1-24
4 Judajta, Benjaminpatawan enemigosninkoqa+ uyarisqanku, presos kasqankumanta kutinpojkunaqa+ Israelpa Diosnin Jehovapaj uj templota ruwashasqankuta.
2 Paykunaqa chay rato chimparqanku Zorobabelman, familiaspi umas kajkunamanpis, nerqankutaj: “Noqayku kay templota ruwaysisqayku.* Noqaykupis Asiriaj reynin Esar-Hadonpa tiemponmantapacha Diosniykichejta yupaychallaykutaj,+ jaywanastapis paypaj qʼolachillaykutaj.* Noqaykutaqa Esar-Hadón+ kay lugarman pusamuwarqayku”,+ nispa.
3 Zorobabeltaj, Jesuawan Israel familiasmanta umas kajkunawan khuska nerqanku: “Qankunaqa mana Diosniykupaj wasita ruwaysiwasqaykuchu.+ Israelpa Diosnin Jehovapajqa noqallayku wasita ruwasqayku, Persiaj reynin Ciro kamachiwasqaykuman jina”,+ nispa.
4 Chaymantapacha chay qayllapi tiyakoj runasqa judiosta iskayrayacherqanku, manchacherqankutaj, chay llankʼayninkuta amaña ruwanankupaj.+
5 Chay enemigosninkoqa yuyaychaj runasta contratakorqanku, judiospa chay llankʼayninkuta sayachinankupaj.+ Ajinata ruwarqanku Persiapi rey Ciroj kamachisqan wataspi, Persiapi rey Darío kamachiyta qallarinankama.+
6 Chay enemigosninkoqa rey Asuero kamachiyta qallarishajtin, uj cartata qhelqarqanku. Chay cartapitaj juchachaykorqanku* Judamanta, Jerusalenmantawan runasta.
7 Persiapi rey Artajerjes kamachishajtintaj, Bislamqa Mitridateswan, Tabeelwan, waj compañerosninwan khuska rey Artajerjespaj uj cartata qhelqarqanku. Chay cartataqa arameo parlayman tijracherqanku,+ qhelqarqankutaj arameo letraswan.*
8 * Rehumqa gobiernopi ujnin atiyniyoj autoridad karqa. Paywan qhelqeri Simsaiwan khuska uj cartata Artajerjespaj qhelqarqanku. Chay cartataqa Jerusalenpa contranpi qhelqarqanku.
9 (Chay cartataqa qhelqarqanku: gobiernopi ujnin atiyniyoj autoridad Rehúm sutiyoj, qhelqeri Simsái, waj compañerosninwan khuska, nisunman juezkunawan, sullkʼa kamachejkunawan, secretarioswan, Erecmanta+ runaswan, babilonioswan, Susamanta+ runaswan, nisunman elamitaswan.+
10 Chay cartata qhelqaysikullarqankutaj chay waj nacionespis, mayqenkunatachus manchay atiyniyoj respetasqa Asnapar sutiyoj kamachejqa, presosta jina apakaporqa Samariaj llajtasninman chaykuna,+ jinallataj Éufrates mayumanta inti yaykuy ladopi tiyakoj runaspis.*
11 Chay cartaj ujnin copianqa kay kashan).
“Kay cartaqa rey Artajerjespaj. Kay cartataqa qhelqanku reypa kamachisnin, Éufrates mayumanta inti yaykuy ladopi tiyakunku chaykuna:
12 Reyman kayta willarisqayku: Tiyakunki chay lugarmanta noqaykojman wicharimorqanku chay judiosqa Jerusalenman chayamunku. Paykunaqa chay mana kasukoj sajra llajtata watejmanta ruwashanku. Llajtaj perqasnintaqa ruwayta tukuchashankuña,+ cimientosnintapis allinchaykushanku.
13 Chantapis kaytawan reyman willarisqayku: Sichus chay llajtata ruwayta tukuchanqanku, perqasnintapis ruwayta tukuchanqanku chayqa, paykunaqa mana paganqankuchu sapa ujninkumanta pagananku kashan chay impuestota, nitaj kapuyninkumanta impuestotapis,+ nillataj ñanta purisqankumanta impuestotapis. Chay kajtenqa reyesqa ashkha qolqeta pierdenkuman.
14 Noqaykoqa reypa kamachina wasinmanta pagoykuta japʼiyku. Nitaj qhawallasqaykuchu reyta ajinasta ruwanankutaqa. Chayrayku kay cartapi chay imasta reyman willamushayku
15 allinta qhawaykunankupaj, qanmanta aswan ñaupajta reyes karqanku chaykunamanta imachus libropi qhelqasqa kasqanta.+ Chay libropi sutʼita nishan chay llajtaqa mana kasukoj llajta kasqanta, reyespajpis provinciaspajpis manapuni allinchu kasqanta. Yachallankitaj chay llajtapeqa unaymantapachaña reyespa contranta oqharikuyta yachasqankuta. Chayrayku chay llajtataqa thuñerqanku.+
16 Reymanqa kaytawan willasqayku: Sichus chay llajtata ruwayta tukuchanqanku, perqasnintapis ruwayta tukuchanqanku chayqa, manaña makiykipichu kanqa Éufrates mayumanta inti yaykuy ladopi kaj jallpʼasqa”,+ nispa.
17 Reytaj kay jinata kuticherqa Rehumman, pichus gobiernopi ujnin atiyniyoj autoridad karqa chayman, jinallataj qhelqeri Simsaiman, Samariapi tiyakoj kanku chay waj compañerosninman, Éufrates mayumanta inti yaykuy ladopi tiyakoj kanku chay runasmanpis. Kay jinata nispa:
“Qankunata saludamuykichej.
18 Chay apachimuwasqaykichej cartataqa sutʼita leepuwanku.*
19 Noqaqa imaynachus chay llajta kasqanta yachanaypaj allinta qhawaykucherqani chay unay qhelqasqasta. Yachakuntaj chay llajtaqa unaymantapacha reyespa contranta oqharikusqanta. Yachakullantaj chay llajtapeqa chʼajwas kasqanta, maqanakustaj kasqanta.+
20 Jerusalenpeqa manchay atiyniyoj reyes kamachisqanku. Paykunaqa Éufrates mayumanta inti yaykuy ladopi kaj tukuynin jallpʼasta kamachisqanku. Impuestostapis cobrasqanku sapa runamanta, kapuyninkumanta, ñanta purisqankumantapis.
21 Kunanqa kamachiychej chay runas llankʼayninkuta sayachinankuta, amaña chay llajtata ruwachunkuchu noqa ninaykama.
22 Kay kamachisqaytaqa kasukuychejpuni, ama reypa contranpi chay mana allin imas astawan yapakunanpaj”,+ nispa.
23 Rey Artajerjespa apachimusqan cartaqa leekorqa Rehumpaj, qhelqeri Simsaipaj, compañerosninpajpis. Paykunataj chay cartata uyariytawan usqhayllata Jerusalenman kachaykukorqanku. Chantá munajta mana munajta judiospa llankʼayninkuta sayacherqanku.
24 Chaypacha Jerusalenpi Diospa wasinta ruwayta saqeporqanku, mana tukuchasqataj qhepakorqa Persiapi rey Darío iskay watata kamachinankama.+
Sutʼinchaykunasnin
^ Ruwaysisqayku: waj lugarespi ninku ruwaysisajku.
^ Chayri “ruphachillaykutaj”.
^ Chayri “tumpaykorqanku”.
^ Ichá nillanmantaj “Chay cartataqa arameo parlaypi qhelqarqanku, chantá tijracherqanku”.
^ Esdras 4:8 versiculomantapacha Esdras 6:18 versiculokama arameo parlaypi qhelqakorqa.
^ Chayri “Transeufratina jallpʼas”, “Mayumanta aswan jaqaynejpi kaj jallpʼas”.
^ Ichá nillanmantaj “cartataqa tijrachispa leepuwanku”.
