Ezequiel 19:1-14
-
Israelpa kamachejkunasninmanta uj llakiy takiy (1-14)
19 “Israelpa kamachejkunasninmanta uj llakiy takiyta takiy.
2 Ninkitaj:
‘¿Imataj mamayki karqari? Mamaykeqa leones chaupipi china león karqa.
Kallpasapa maltón leonespa chaupinkupi winkuykorqa,* uñasnintataj uywarqa.
3 Ujnin uñanta uywarqa,chay uña leontaj kallpasapa maltón leonman tukorqa.+
Chay leonqa japʼisqan uywasta mitharayta* yachakorqa,runastapis mikhuykorqa.
4 Nacionesqa paymanta parlajta uyarerqanku, uj tʼoqopitaj payta japʼerqanku,fierro ganchoswantaj Egipto jallpʼaman aparqanku.+
5 Mama leonqa suyarqa pay kutimunanta, jinapis repararqa manaña kutimunanta.
Chayrayku ujnin uñantañataj uywaspa kallpasapa maltón leonman tukucherqa.
6 Chay leonpis leones ukhupi purillarqataj, kallpasapa maltón leonmantaj tukorqa.
Chay leonqa japʼisqan uywasta mitharayta yachakorqa, runastapis mikhuykorqa.+
7 Chay leonqa jarkʼachasqa torresta muyuykacharqa, llajtastataj chʼinman tukucherqa.
Qhaparisqanqa chay chʼin jallpʼa juntʼata uyarikorqa.+
8 Chay qaylla jallpʼaspi kaj naciones paypa contranpi jamorqanku, chʼipawan choqaykuspa payta japʼinankupaj,uj tʼoqopitaj payta japʼerqanku.
9 Paytaqa fierro ganchoswan japʼiykuspa jaulaman apaykorqanku, chaymantataj Babiloniamanta reyman aparqanku.
Chaypi paytaqa wisqʼaykorqanku, qhaparisqan niña Israel orqospi uyarikunanpaj.
10 Mamaykeqa uva sachʼa jina karqa,*+ yaku kantuspi plantasqa.
Ashkha yaku kasqanrayku poqorqa, ashkha ramasniyojtaj karqa.
11 Paymantaqa may duro ramas* llojsimorqa, kamachejkunaj varanku kananpaj.
Payqa wiñarqa, waj sachʼasmanta aswan jatunta.
Payqa rejsisqa karqa jatun kasqanrayku, qʼomer ramasniyoj kasqanraykutaj.
12 Jinapis rabiawan tʼirasqa karqa,+ pampaman wijchʼusqataj.
Chantá inti llojsimuy ladomanta wayra wayramuspa poqoyninta chʼakicherqa.
Chay sumaj duro ramasnenqa pʼakirasqa karqanku, chʼakiporqankutaj,+chaykunatataj nina ruphaykorqa.+
13 Kunanqa chʼin jallpʼapi plantasqa kashan,chʼaki jallpʼapi, tʼajra pampapitaj.+
14 Ninaqa ruphaykorqa ramasninta, chantá wiñamusharqa chay ramitasninta, poqoyninta ima.
Ni uj sumaj duro ramanpis puchorqachu, kamachejkunaj varankupaj.+
”’Kay takeyqa llakiy takiy, kay takeyqa llakiy takiy jina takikonqa”’.
Sutʼinchaykunasnin
^ Winkuy: waj lugarespi ninku siriy.
^ Mithay: waj lugarespi ninku wikhay, tʼisay.
^ Hebreo parlaypeqa nin, “yawarniykipi uva sachʼa karqa”.
^ Chayri “varas”.