Ezequiel 27:1-36
-
Tiro yakuman chinkaykusqanmanta llakiy takiy (1-36)
27 Jehová Diosqa watejmanta niwarqa:
2 “Runaj wawan, Tiropaj uj llakiy takiyta takipuy.+
3 Tiroman niy:
‘Qanqa mar qochaman yaykunapi tiyakunki,mar qochapi kaj ashkha churuswan* negociosta ruwanki.
Tukuyta Kamachej Señor Jehová Diosqa kayta nin:
“Tiro, qanqa nishanki: ‘Manchay kʼachita kani’, nispa.+
4 Jallpʼasniykeqa mar qochas chaupipi.
Ruwasojkunaqa aswan kʼachitaman tukuchisunku.
5 Tablonesniykitaqa Senir+ enebro sachʼasmanta ruwarqanku,Líbano cedro sachʼasmantataj mastil nisqa jatun kʼaspita ruwapusorqanku.
6 Basán roble sachʼasmanta barco apaykachana remosniykita ruwarqanku,ñaupaqeykeqa ciprés sachʼamanta ruwasqa karqa, Kitim+ churusmanta marfileswan kʼachanchasqa.
7 Barco telasniykeqa Egipto linomanta sumaj coloresniyoj ruwasqa karqa,barcoykej toldosnenqa* Elisá+ churusmanta azul hilowan, kulli telawan* ruwasqa karqa.
8 Sidonpi tiyakoj runaspis Arvadpi+ tiyakoj runaspis remoswan purichisoj kanku.
Tiro, sumajta yachaj runasniykeqa yakunta purichisoj kanku.+
9 Tablasniykej tinkuyninta sumajta kʼaskaykuchej kanku Guebalmanta+ yachayniyoj runas, sumajta ruwayta yachaj runas.+
Mar qochamanta tukuy barcos, barcosta apaykachajkunapis tukuy imata apamusoj kanku qanwan negociosta ruwanankupaj.
10 Persiamanta, Ludmanta, Putmanta+ runasqa ejercitoykipi karqanku, soldadosniyki karqanku.
Paykunaqa warkhuykusoj kanku escudosninkuta, monterasninkutapis, chaykunataj jatunpaj qhawachisoj kanku.
11 Arvadmanta ejercitoykipi karqanku chay soldadosqa perqasniykipi sayaj kanku.
Mana manchachikoj runas torresniykipi kaj kanku.
Perqasniykej muyuyninpitaj muyu escudosninkuta warkhuykoj kanku,chaywanqa aswan kʼachita karqanki.
12 ”’”Tarsisqa+ manchay qhapaj kasqaykirayku qanwan negociosta ruwaj.+ Qanpa imasniykitaqa cambiasoj qolqe metalwan, fierrowan, estañowan, plomowan* ima.+
13 Javanpis, Tubalpis,+ Mesecpis+ qanwan negociosta ruwaj kanku. Qanpa imasniykitaqa cambiasoj kanku esclavoswan,+ cobremanta ruwasqa imaswan.
14 Togarmajpa+ mirayninpis imasniykitaqa cambiasoj aysaj caballoswan, guerrapaj caballoswan, mulaswanpis.
15 Dedanmanta+ runaspis qanwan negociosta ruwaj kanku. Mar qocha churuspi vendejkunata contrataj kanki, paykunataj marfil wajrasta,+ ébano maderastawan jaywasoj kanku.
16 Edompis ashkha imasniyoj kasqaykirayku qanwan negociosta ruwaj. Qanpa imasniykitaqa cambiasoj turquesa rumiswan, kulli telaswan, tukuy laya* colorwan bordasqa telaswan, sumaj telaswan, mar qochamanta kʼachitu rumiswan,* rubí rumiswanpis.
17 ”’”Judapis Israel jallpʼapi tiyakojkunapis qanwan negociosta ruwaj kanku. Qanpa imasniykitaqa cambiasoj kanku+ Minitmanta+ trigowan, sumaj poqoykunawan, miskʼiwan,+ aceitewan, balsamowanpis.*+
18 ”’”Damascopis+ ashkha imasniyki kasqanrayku, qhapaj kasqaykirayku qanwan negociosta ruwallajtaj. Cambiasojtaj Helbonmanta vinowan, Zaharmanta telaswanpis.*
19 Uzalmanta Vedanpis Javanpis qanpa imasniykitaqa cambiasoj kanku fierromanta ruwasqa imaswan, canelawan,* sumaj qʼapayniyoj plantaswanpis.
20 Dedanpis+ cambiasoj caronaswan.*
21 Contratakorqanki arabesta, Quedarmanta+ tukuynin kamachejkunatapis. Paykunaqa rantejtaj vendejtaj kanku corderosta,* carnerosta,* cabrastapis.+
22 Sabamanta, Raamamanta+ vendejkunapis qanwan negociosta ruwaj kanku. Qanpa imasniykitaqa cambiasoj kanku+ tukuy laya sumajnin perfumeswan, valorniyoj rumiswan, qoriwanpis.
23 Haranpis,+ Canepis, Edenpis,+ Sabamanta+ vendejkunapis, Asurpis,+ Kilmadpis qanwan negociosta ruwaj kanku.
24 Paykunaqa mercado plazaykipi vendej kanku kʼachitu ropasta, awasqa azul mantosta tukuy colorwan bordasqasta, tukuy laya coloresniyoj mastʼanastapis, tukuyninta waskhaswan sumaj watasqata.
25 Tarsis barcosqa+ ashkha ukhu vendenasniykita apaykachaj kanku.
Chayrayku mar qochaj chaupinta juntʼita, sumaj cargasqa* purej kanki.
26 Remoswan purichisojkunaqa muyoj yaku qochasman apasorqanku,inti llojsimuynejmanta wayraqa mar qocha chaupipi phiriykusorqa.
27 Valorniyoj imasniyki, kapuyniyki, vendenasniyki, barcopi purejkunasniyki, marinerosniyki,tablasniykej tinkuyninta sumajta kʼaskachejkuna, vendedoresniyki,+ guerrapaj tukuy soldadosniykipis,+qanpi kanku chay tukuynin runasqatukuyninku mar qocha chaupipi yakuman chinkaykonqanku urmasqayki pʼunchaypi.+
28 Marinerosniykej qhaparikusqankoqa yaku kantupi kaj jallpʼasta kharkatichenqa.
29 Remaspa barcosta purichejkuna, barcospi purejkuna, barcospi trabajajkunapis,tukuyninku barcosninkuta saqeraspa jallpʼapi qhepakonqanku.
30 Qanmanta waqaspa qhaparikonqanku, sonqo nanayta waqanqanku,+umankuman jallpʼawan qhallarakuspa,* ushphapitaj suntʼispa.*
31 Umankuta pʼajlakonqanku, qhashqa ropata churakonqanku.
Qanmanta sonqo nanayta waqarikonqanku, jikʼun jikʼunta.
32 Ajinata waqashaspataj kutin kutinta llakiy takiyta takipusonqanku:
‘¿Pitaj Tiro jina mar qocha chaupipi chʼinpachari?+
33 Mar qochamanta tukuy imasniyki chayamojtin ashkha llajtasta kusichej kanki.+
Chay chhika valorniyoj imasniyki, vendenasniykipis jallpʼamanta reyesta qhapajyaykucherqanku.+
34 Kunanqa chay jinata mar qocha chaupipi phirisqa kanki, ukhu yakuspi.+
Tukuy vendenasniyki, runasniykipis qanwan khuska yakuman chinkaykunku.+
35 Mar qocha churuspi tiyakojkunaqa tukuyninku tʼukulla qhawasonqanku,+reyesninkupis mancharikuspa kharkatenqanku,+ uyallankupiraj yachakonqa llakisqa kashasqankuta.
36 Nacionesmanta vendejkunaqa imachus qhatirisusqanmanta silbarenqanku.
Tukukuyniykeqa ujllata chayamonqa, mancharinataj kanqa.
Qanqa wiñaypaj chinkachisqa kanki’”’”.+
Sutʼinchaykunasnin
^ Chayri “islaswan”.
^ Chayri “carpasnenqa”.
^ Chayri “morado telawan”.
^ Chayri “titiwan”.
^ Chayri “tukuy rijchʼaj”.
^ Balsamoqa sumaj qʼapayniyoj aceite karqa, chaytataj wakin plantasmanta, wakin sachʼasmanta orqhoj kanku, may valesqa karqa.
^ Chayri “pukarau telaswanpis”.
^ Chayri “awasqa ropaswan”.
^ Cordero nispaqa parlashan uj watayojmanta chayri aswan uñitamanta.
^ Carnero: waj lugarespi ninku mocho, oveja toro.
^ Ichá nillanmantaj “manchay uma oqharisqa”.
^ Qhallay: waj lugarespi ninku qhalliy.
^ Suntʼiy: waj lugarespi ninku qhospay.
