Job 15:1-35
15 Temán jallpʼamanta Elifaztaj+ nerqa:
2 “Yachayniyoj runaqa, ¿qhasi manakaj imastachu kutichikun?
¿Manakaj imasta ruwananpajchu yuyaychakun?
3 Sonserasta parlaspa kʼameyqa qhasilla.
Parlayllata parlaypis qhasi manakajlla.
4 Qanqa Diosta manchachikuyta pisipaj qhawachinki.
Wajkunatapis mana saqenkichu Diosmanta yuyarikunankuta.
5 Juchayoj kasqaykeqa parlasqaykipi yachakun.
Miskʼi simiwan chʼaukiyayta* yachanki.
6 Simillaykitaj juchachasunki, mana noqachu.
Simillaykitaj contraykita parlashan.+
7 ¿Tukuy runasmanta aswan ñaupajtachu nacewaj karqa?
¿Niraj lomas rikhurishajtinchu nacewaj karqa?
8 ¿Dios angelesninwan parlasqanta uyarisqaykitachu nishanki?
¿Qanllachu yachayniyoj kasqanki?
9 ¿Imatapunitaj yachasqanki mana noqayku yachasqaykutari?+
¿Imatataj astawan entiendesqanki noqaykumanta nisqari?
10 Noqaykoqa yuraj umaña kayku, machusñataj.+
Tataykipis karu sullkʼaykuraj.
11 ¿Nipunichu sonqochasunki Diospa nisqanqa?
¿Qhasitachu kay jina kʼachata parlapayashayku?
12 ¿Imaraykutaj umata oqharinki, nitaj imatapis entiendenkichuri?
¿Imaraykutaj leqhopayashawaykuri?*
13 Qanqa Diospaj phiñasqa kashanki.
Chayrayku ajinata parlashanki.
14 ¿Imataj runa kasqa llimphu kausayniyoj kananpajri?
¿Imataj runa kasqa mana pantananpajri?+
15 Diosqa ni angelesninpipis atienekunchu.
Qhawayninpeqa ni cielopis llimphuchu.+
16 Astawanrajchá uj runapi mana atienekunmanchu, millay imasllata ruwajtin, millachikunataj kajtin,+yakumanta chʼakisqa jinataj sajra imasllata ruwayta munajtin.
17 Uyariway, noqa willasqayki.
Imastachus rikusqayta willasqayki.
18 Chay imastaqa yachayniyoj runas mana pakaspa parlarqanku,+tatasninkumanta yachakusqankuman jina.
19 Chay tatasninkoqa japʼisqanku jallpʼaspi paykunalla tiyakusqanku.
Nitaj mayqen forasteropis chayninta pasasqachu.
20 Sajra runaqa sapa pʼunchay ñakʼarin.
Sapa watataj phutiylla paypajqa.
21 Ninrisnenqa mancharina imasllataña uyarishan.+
Allinta kausakushajtintaj kapuyninta suwanku.
22 Chay sajra runaqa yachan wañuymanta mana lluspʼiyta atisqanta.+
Paytaqa espadawan wañuchenqanku.
23 Mikhunata maskʼasqanpi purin, ‘¿maypí mikhuna kanri?’ nispa.
Yachantaj ima ratopis wañunanta.
24 Paytaqa llakiypis phutiypis manchachinku,contrantataj oqharikunku maqanakupaj wakichisqa rey jina.
25 Chay sajra runaqa Diospa contranta makinta oqharispa,Tukuy Atiyniyoj Diosta atipayta munan.
26 Atipakuspa Diosman phawaykun escudon japʼirisqa.
Chay jarkʼakunan escudoqa manchay phatu,* sumaj sinchʼitaj.
27 Chay sajra runaj uyanqa wira kasqanpi morqʼopacha,caderasninpis manchay wira.
28 Thuñisqa kanqanku chay llajtaspi tiyakun.
Tiyakusqan wasispeqa niña pipis tiyakonqachu.
Chay wasisqa rumi montonesllaña kanqa.
29 Chay sajra runaqa mana qhapajyanqachu, nitaj ni imata ruwakuyta atenqachu.
Tukuy kapuyninpis kay jallpʼamanta chinkaponqa.
30 Chay runaqa mana wañuymanta lluspʼenqachu,tukuchisqa kanqa, imaynatachus sachʼaj ijimusqanta* nina qʼasparparin ajinata.
Payqa Diospa phukurisqallanwan chinkarenqa.+
31 Chay runaqa ama chʼaukiyakuchunchu, nitaj qhasi manakaj imaspi atienekuchunchu.
Imaraykuchus chaymanta japʼisqanqa qhasi manakajlla kanqa.
32 Chay qhasi manakaj imastataj niraj imapi japʼenqa.
Payqa mana tʼikaj sachʼa jina kanqa.+
33 Chay runaqa kʼuku uvasninta tʼakarpayaj uva sachʼa jina kanqa,
tʼikasninta tʼakarpayaj olivo sachʼa jinataj.
34 Sajra runaspa* ruwasqasninkoqa qhasilla kanqa.+
Llukʼichikoj* runaspa toldosninkutapis* nina ruphaykonqa.
35 Paykunaqa imaymana sajra imasta yuyaychakunku, wajkunatataj ñakʼarichinku.
Sonqonkupitaj chʼaukiyanallankupaj wakichikunku”, nispa.
Sutʼinchaykunasnin
^ Chayri “engañayta”.
^ Leqhopayay: waj lugarespi ninku lerqʼopayay.
^ Phatu: waj lugarespi ninku rakhu.
^ Ijiy: waj lugarespi ninku chʼillchiy, retoñay.
^ Chayri “Diospa contranta oqharikoj runaspa”.
^ Llukʼiy: waj lugarespi ninku coimeay.
^ Chayri “carpasninkutapis”.
