Job 16:1-22
16 Jobtaj kuticherqa:
2 “Chay niwasqaykichejtaqa chunkastaña uyarini.
Sonqochanawaykichejtaqa astawan llakichishawankichej.+
3 Chay qhasi parlaykunaqa, ¿nichu tukukonqa?
¿Imataj japʼisunki Elifaz chay jinasta ninawaykipajri?
4 Sichus noqa jina ñakʼarishawajchej chayqa,noqapis qankuna jina parlallayman,allinta kʼamirpariykichejman,qankunata asipayaspataj umayta khiwiykachariyman.+
5 Pero mana chaytaqa ruwaykichejmanchu, astawanqa parlasqaywan kallpachariykichejman.
Kʼacha parlaykunawantaj sonqochariykichejman.+
6 Parlajteyqa nanayniy mana chinkanchu.+
Chʼinyakuni chaypis nanayneyqa kashallanpuni.
7 Diostajrí mana kallpayojta saqewan.+
Wawasniyta, kamachisniytawan tukuchin.
8 Noqapis runaspa rikunankuta paypa makinpi ñakʼarishani.
Tulluyasqayta rikuspa runasqa juchayoj kasqayta ninku.
9 Diospa kʼajaj phiñakuynenqa mitharawan.* Payqa chejnikuwan.+
Kirusnintapis noqapaj rabiasqa kʼarurachin.
Enemigoypis kanman jina leqhopayaspa* oqoykushawanña.+
10 Runasqa oqoykunawankupaj siminkuta jatunta kicharinku.+
Uyaypipis laqʼawankuman jina kʼarajta tukuy imasta niykuwanku.
Ashkha ukhutaj contrayta tantaykukunku.+
11 Diosqa lloqallaspa makinkuman jaywaykuwan,sajra runaspa makinkuman choqaykuwan.+
12 Noqaqa allillan kakusharqani, Diostajrí qʼalata mitharqowan.+
Kunkaymanta japʼispa pampapi saruwan.
Flechanawanpajtaj churawan.
13 Flechadoresnenqa flechanawankupaj muyuykuwanku.+
Diosqa mana khuyariwaspa flechasninwan riñonesniyta+ pasarqochin,jayaqʼeytapis jallpʼaman surorqochin.
14 Perqata jina juskʼurawan.
Maqanakupi tinkoj soldado jina correykamuwan.
15 Qhashqa ropata siraspa qʼala ukhuyman churakuni.+
Mana kallpayoj kasqayrayku pampallapiña chukushani.+
16 Ñawisniypis waqasqaypi pukallaña kashan.+
Mayta phutikusqaypi ñawisneyqa tʼoqo tʼoqolla kashan.
17 Ni ima sajrata makisniywanqa ruwarqanipischu.
Diosmantapis llimphu sonqowan mañakuni.
18 Ay jallpʼa, ama yawarniytaqa pʼampaykuychu ari.+
Qhaparikusqaypis amapuni tukukuchunchu ari.
19 Testigoyqa cielopi kashan.
Noqaman kutikuspa parlaj testigoyqa patapi kashan.
20 Amigosneyqa asipayawanku,+noqatajrí waqaspa Diosmanta mañakushani.+
21 Pillapis Diospa ñaupaqenpi noqaman kutikuspa parlaripuwachun ari,imaynatachus pipis wajpa ñaupaqenpi runa masinman kutikuspa parlaripun ajinata.+
22 Noqaqa manaña ashkha watastawanchu kausasaj,chantaqa mana kutimuyniyojta ripusaj.+
Sutʼinchaykunasnin
^ Mithay: waj lugarespi ninku wikhay, tʼisay.
^ Leqhopayay: waj lugarespi ninku lerqʼopayay.
