Job 22:1-30
22 Temán jallpʼamanta Elifaztaj+ nerqa:
2 “¿Diosqa runata valechikunmanchu?
¿Atinmanchu yachayniyoj runaqa Diosta yanapayta?+
3 ¿Tukuy Atiyniyoj Diosqa kusikunmanchu cheqan runa kajtiyki?
¿Ima allintaj Diospaj kanman mana juchachana kajtiykiri?*+
4 ¿Diosqa castigasunkimanchu,juiciomanpis apasunkimanchu payta jatunpaj qhawasqaykimanta?
5 ¿Manachu payqa castigashasunki manchay sajra kasqaykimanta,pantasqasniykipis mana yupay atina kasqanmanta?+
6 Qanqa mana imallamanta prendatapis hermanosniykimanta qochikoj kanki.
Runasmantapis ropasninkuta qhechuspa qʼalasllata saqej kanki.+
7 Saykʼusqamanqa ni yakullatapis jaywarejchu kanki.
Yarqhasqamantaj mikhunayki kashajtinpis mana qorejchu kanki.+
8 Qan jina qhapaj runasqa ashkha jallpʼasta japʼikapunku.+
Chay jallpʼaspitaj qan jina qhapaj runaslla tiyakunku.
9 Jinapis qanqa viudasta chʼusaj makillata kachapoj kanki.
Mana tatayoj wawastapis kʼumuykachachej kanki.
10 Chayrayku ima llakiypis qhatirillasunkiña.+
Chayrayku llakiykunaqa ujllata mancharichisunki.
11 Chayrayku manchay tuta laqha kashan, manataj rikuyta atinkichu.
Ashkha yakutaj pʼampaykushasunki.
12 ¿Nichu Diosqa cieloj may jina patanpi kashan?
Qhawariy, estrellasllaraj chay jina patapi kashanku.
13 Qantajrí nishanki: ‘¿Imatataj Dios yachasqari?
¿Atinmanchu juzgayta yana phuyus chaupinta mana rikumuspa?
14 Diostaqa phuyus tapaykunku, chayrayku mana rikumuyta atinchu.
Payqa cieloj pata patanta purikushan’, nispa.
15 ¿Qanpis maynintachus sajra runas purerqanku,chay ñaupa ñantachu puriyta munashanki?
16 Chay runasqa niraj wañunanku kashajtin wañuchisqa karqanku,imaynatachus wasita mayu apakapun ajinata.+
17 Chay sajra runasqa Diosta* nerqanku: ‘Saqewayku kakojta’, nispa.
Chantá nillarqankutaj: ‘¿Imanawasuntaj Tukuy Atiyniyoj Diosri?’, nispa.
18 Noqaqa mana chay sajra runas jinaqa niymanchu.
Ajinata nejtinkupis Diospuni wasisninkuta allin imaswan juntʼacherqa.
19 Cheqan runasqa sajra runas tukuchisqa kasqankuta rikuspa kusikonqanku.
Mana juchayoj runastaj sajra runasmanta asikuspa nenqanku:
20 ‘Enemigosninchejqa tukuchisqaña kanku,imankupis puchojtenqa nina ruphaykonqa’, nispa.
21 Diosta allinta rejsiy, paywantaj allinpi kanki,allin imastaj qanpaj kanqa.
22 Paypa churasqan leyta kasukuy,nisqasnintataj sonqoykipi waqaychay.+
23 Sichus Tukuy Atiyniyoj Diosman kutirikunki chayqa, watejmanta allinta kausakunki.+
Sichus tiyakunki chay toldomanta* tukuy ima sajra kajta orqhonki chayqa,
24 sitajchus qoriykita pampaman qhalliwaj* chayqa,sitajchus Ofirmanta qoriykitapis+ qaqa ukhuman wijchʼuykuwaj chayqa,
25 chaypacha Tukuy Atiyniyoj Diosqa qoriyki jina kanqa,aswan sumaj qolqeyki jinataj.
26 Chaypacha Tukuy Atiyniyoj Diosta yupaychaspa kusikunki.
Diosmantaj mana manchachikuspa qayllaykunki.
27 Diosta rogakojtiykeqa pay uyarisonqa.
Qantaj imatachus ruwasaj nisqaykita juntʼanki.
28 Imata ruwajtiykipis allin risonqa.
Ñanniykitapis kʼanchay kʼancharimonqa.
29 Diosqa kʼumuykukoj sonqo runata salvanqa,chayrayku may maylla parlajtiykeqa kʼumuykachachisqa kanki.
30 Diosqa mana juchayoj runasta salvanqa.
Chayrayku sichus ni ima juchata ruwarqanki chayqa,* salvasqapuni kanki”, nispa.
Sutʼinchaykunasnin
^ Chayri “¿Ima allintaj Diospaj kanman tukuy sonqo yupaychajtiykiri?”.
^ Chayri “cheqa Diosta”. Glosariopi cheqa Dios nisqata leeriy.
^ Chayri “carpamanta”.
^ Qhalliy: waj lugarespi ninku qhallay.
^ Hebreo parlaypeqa nin, “Chayrayku makiykichus llimphu chayqa”.
