Job 33:1-33
33 ”Job, kunanqa uyariway parlasqayta.
Uyariy tukuy ima nisusqayta.
2 Uyarillay ari parlasqayta.
Mana chʼinllaqa kaymanchu.
3 Mana sajra sonqowanchu parlashayki.+
Yachasqallayta parlashayki.
4 Diosmin espiritunwan ruwawarqa.+
Tukuy Atiyniyoj Diosmin samayninwan kausayta qowarqa.+
5 Atispaqa kutichikamullawaj.
Ñaupaqeypi imatachus parlanaykita parlarillawaj. Sumajta yuyaychakuy parlanaykipaj.
6 Noqaqa Diospa* ñaupaqenpi qan jinalla kani.
Noqapis tʼurumanta ruwasqa kani.+
7 Chayrayku ama noqataqa manchachikuwaychu.
Parlasqaywanqa mana sonqoykita nanachisqaykichu.
8 Qanqa chay jinata uyarinayta parlanki.
Noqa uyariyki kay jinata nishajta:
9 ‘Noqaqa llimphu kani, mana juchayoj.+
Llimphu kani, mana pantayniyoj.+
10 Diosqa imatapis tarinpuni contray kananpaj.
Payqa enemigonta jina qhawawan.+
11 Chakisniytapis cepoman* japʼiykuchiwan.
Imaynatachus purisqaytapis allin allinta qhawamushan’,+ nispa.
12 Chayta nispaqa pantashanki, chay nisqaykimantaqa kayta nisqayki:
Runamanta nisqaqa Diospuni aswan jatun.+
13 ¿Imajtintaj Diospa contranta quejakushankiri?+
¿Mana uyarisojtinchu rimashanki?+
14 Diosqa watej watej parlamun,
nitaj pipis uyarinchu.
15 Diosqa chʼisisnin runasman parlamun mosqoyninkupi, manachayri uj mosqoypi jina,+runas wañusqata puñushajtinku,camankupi puñushajtinku.
16 Chaypacha Diosqa runaspa ninrisninkuta kicharin.+
Paykunatataj yachachin,
17 ajinamanta uj runallatapis mana allin ruwaykunamanta karunchachinanpaj,+jatunchakuymantapis jarkʼananpaj.+
18 Diosqa chay runata salvan mana pʼampakuna juskʼuman* chayananpaj,+mana espadawan wañuchisqa kananpaj.
19 Runaqa allinta yachakullanmantaj camanpi onqosqa kashaspa,tullusninpis tuta pʼunchay tʼajarejtin.
20 Onqosqa kasqanrayku tʼantatapis millachikun,may sumaj mikhunatapis manaña munanchu.+
21 Aychanqa sutʼi reparayta chʼakiykapushan,tullusninpis rikhurimushan.
22 Payqa* pʼampakuna juskʼuman* chayananpaj jinaña kashan.
Wañuypis kausaynintaqa taripananpaj jinaña kashan.
23 Sichus uj angelllapis paypaj kan chayqa,sichus waranqamanta ujllapis jamuspa payman kutisqa parlanman chayqa,sitajchus chay runaman willanman imachus cheqan kasqanta chayqa,
24 Diosqa allin ñawiwan chay runata qhawanman, chantá ninman:
‘Pʼampakuna juskʼuman* chayananmanta libray.+
Kacharisqa kananpaj pagota tariniña.+
25 Cuerponqa llampʼituman tukuchun, wawaj aychanmantapis aswan llampʼituman.+
Watejmanta kallpayojman tukuchun, imaynachus joven kashajtin karqa ajinaman’,+ nispa.
26 Chay runaqa Diosta rogakonqa,+ Diostaj payta allin ñawiwan qhawanqa.
Chay runaqa Diospa uyanta rikuspa kusisqa qhaparikonqa.
Diostaj chay runata watejmanta cheqan runapaj qhawanqa.
27 Chay runataj runasman nenqa:
‘Noqaqa juchallikorqani,+ cheqan kajtapis qʼewerqani.
Nitaj chay juchaymanta castigawankuchu.
28 Diosqa salvawan pʼampakuna juskʼuman* chayanaymanta.+
Kunanqa kausallasajpuni’, nispa.
29 Diosqa chay imasta ruwanpuni.
Payqa uj runarayku chay imasta kutin kutinta ruwan.
30 Ajinamanta runata salvan pʼampakuna juskʼumanta*kusisqa kausakunanpaj.+
31 Uyariy Job. Uyariway.
Chʼinlla kakuy, noqataj parlallasajpuni.
32 Parlayta munanki chayqa, parlallay.
Parlallay, noqapis mana juchayoj kasqaykita sutʼiman orqhoyta munani.
33 Sichus ni ima ninayki kanchu chayqa, uyariway.
Chʼinlla kakuy, noqataj sumaj yachayta rejsichisqayki”.
Sutʼinchaykunasnin
^ Chayri “cheqa Diospa”. Glosariopi cheqa Dios nisqata leeriy.
^ Chayri “sepulturaman”.
^ Chayri “sepulturaman”.
^ Chayri “Sepulturaman”.
^ Chayri “sepulturaman”.
^ Chayri “sepulturamanta”.
