Job 6:1-30
6 Jobtaj kuticherqa:
2 “Tukuy llakiynillaypis+ pesasqa kanman,ñakʼarisqaywan khuskallapis pesasqa kanman.
3 Llakiyneyqa mar qochapi kaj tʼiyumantapis aswan llasaraj,chayrayku imatapis parlashallaniña.+
4 Tukuy Atiyniyoj Diospa flechasnenqa noqapi allin satʼisqa kashanku,chay flechaspa venenontaj ukhuyta puririshan.+
Diosqa noqawan maqanakuspa manchaytapuni mancharichiwan.
5 ¿Kʼita burroqa+ waqanqachu pasto patapi kashajtin?
¿Toropis waqanqachu pasto patapi kashajtin?
6 ¿Mana kachiyoj qʼayma mikhunaqa mikhunapaj jinachu?
¿Chʼirwasqa malva yakupis miskʼichu?
7 Noqaqa chay imasta mana tʼojpirillaytapis munanichu.
Chaykunaqa pʼosqosqa mikhuna jina kanku.*
8 Mañakusqallaypis ruwakunman,mañakusqallaytapis Dios qowanman.
9 Diosllapis pʼaltarpariyta munawanman,makinta aysarispallapis chinkarparichiwanman.+
10 Ajinata chinkachiwayta munajtinpis sonqochakuymanraj,sinchʼi nanasqa kaspapis kusisqa wañuyman.
Noqaqa ni jaykʼaj pisipaj qhawarqanichu Santo Diospa+ kamachisqantaqa.
11 Niña kallpaypis kanchu aguantanaypaj.+
¿Imapajñataj kausasajri?
12 ¿Kallpasapachu kasqani? ¿Rumimantachu kasqani?
¿Cobremantachu kasqani?
13 ¿Imaynatá sapallaymanta sayarikuymantukuy imayta qhechuwajtinkuri?
14 Runa masinta mana khuyakojqa,*+Tukuy Atiyniyoj Diosta manaña manchikunchu.+
15 Amigosneyqa mana atienekuna kanku,+ chʼaki mayunta chayamoj yaku jinalla kanku.
Paykunaqa chay chʼakipoj mayus jinalla kanku.
16 Chay yakusqa juntʼa kashan chhullunkaswan,unuyasqa ritʼiwanpis.
17 Qʼoñi tiempo chayamojtintaj chay yakusqa pisiyaspa chinkapunku,ruphamojtintaj chʼakipunku.
18 Chay yakusqa linkʼu linkʼuta* puririnku,chʼaki pampanta rishaspataj chʼakipunku.
19 Temamanta jamoj viajerosqa+ chay yakusta maskʼanku.
Sabamanta jamoj viajerospis+ chay yakusta maskʼallankutaj.
20 Paykunaqa chay yakusta tariyta munaspa pʼenqayllapi rikhurinku,qhasillata chay wayqʼosman rinku, nitaj yakuta tarinkuchu.
21 Qankunaqa chay yakus jina noqapaj kankichej.+
Mancharinata ñakʼarishasqayta rikuwaspa mancharikushankichej.+
22 ¿‘Imallatapis qoriwaychej’ nerqaykichejchu?
¿‘Imaykichejtapis jaywariwaychej’ nerqaykichejchu?
23 ¿Nerqaykichejchu enemigoypa makinmanta kacharichinawaykichejta?
¿Nerqaykichejchu sajra runasmanta salvanawaykichejta?
24 Niwaychej imatachus ruwanayta, noqataj chʼinlla uyarisqaykichej.+
Yanapawaychej ari pantasqayta reparakunaypaj.
25 Maychus kajta parlayqa mana sonqota nanachinchu.+
Noqarí, ¿imatapuní yachakuyman kʼamiwasqaykichejmantari?+
26 ¿Parlasqaymanta kʼaminawaykichejpajchu yachachinakushankichej?
Ni imanakuyta atispa noqaqa parlarqani,+ parlasqaytaqa wayrapis apakapullan.
27 Qankunaqa suerteta* choqaspa wajcha wawatapis qhechunakullawajchej muchachoykichej kananpaj.+
Amigoykichejtapis vendeykullawajchej.+
28 Kunanqa kutirikamuspa qhawariwaychej,mana uyaykichejpeqa llullakuymanchu.
29 Allinta reparawaychej ari. Ama noqamanta manakajta parlaychejchu.
Allinta reparawaychej ari. Noqaqa mana imatapis ruwanichu.
30 ¿Pantasqata parlasqaytachu nishankichej?
¿Nichu llakiyniytaqa reparakuyta yachasqani?
Sutʼinchaykunasnin
^ Pʼosqosqa mikhuna nispaqa ichapis parlashan Jobpa llakiyninmanta, manachayrí chay amigosninpa yuyaychasqankumanta.
^ Hebreo parlaypeqa niyta munan mana tukukoj munakuy, mana tukukoj kʼacha kay. Glosariopi mana tukukoj munakuy nisqata leeriy.
^ Linkʼu linkʼu: waj lugarespi ninku wistʼu wistʼu, qʼenqo qʼenqo.
