Jueces 13:1-25
13 Israelitasqa watejmanta sajra imasta Jehová Diospa qhawayninpi ruwallarqankutaj.+ Chayrayku Jehová Diosqa filisteospa makisninkuman paykunata jaywaykorqa+ 40 watasta.
2 Chaypacha Dan+ ayllumanta* uj runa Zorapi+ tiyakorqa, Manóah+ sutiyoj. Warmenqa mana wawata rejsiyta aterqachu, chayrayku mana wawasnin tiyaporqachu.+
3 Uj pʼunchay, Jehová Diospa angelnenqa Manoahj warminman rikhurispa nerqa: “Qanqa mana wawata rejsiyta aterqankichu. Chaywanpis kunanqa onqoj rikhurispa uj qhari wawitata nacechikunki.+
4 Kunanmantapacha ama vinota tomankichu, nitaj ima machanastapis.+ Amallataj mikhunkichu chʼichipaj qhawasqa mikhunastapis.+
5 Onqoj rikhurispa uj qhari wawitata nacechikunki. Chay wawaykej chujchantaqa amapuni jaykʼajpis kʼutunkichu,+ payqa nacekusqanmantapacha* Diospaj tʼaqasqa nazareo* kanqa. Paymin israelitasta filisteospa makisninkumanta salvayta qallarenqa”,+ nispa.
6 Chay warmeqa qosanman chayta willamorqa, kay jinata nispa: “Diospa* kamachin jamuwarqa. Payqa Diospa angelninman rijchʼakorqa, tʼukunapaj jinapuni karqa. Mana taporqanichu maymantachus jamusqanta, nitaj paypis sutinta willawarqachu.+
7 Payqa niwarqa: ‘Onqoj rikhurispa uj qhari wawitata nacechikunki. Kunanmantapacha ama vinota tomankichu, nitaj ima machanastapis. Ama mikhunkichu chʼichipaj qhawasqa mikhunasta. Wawaykeqa Diospaj tʼaqasqa nazareo kanqa, nacekusqanmantapacha wañupunankama’, nispa”.
8 Chantá Manoahqa Jehová Diosmanta mañakorqa: “Ay Jehová Diosníy, ama jina kaspa kachamorqanki chay kamachiykita ujtawan kachamuwayku ari, pay ninawaykupaj imatachus ruwanaykuta nacekunan kashan chay qhari wawawan”, nispa.
9 Diostaj Manoahj mañakusqanta uyarerqa. Warmin campopi kashajtin, Diospa angelnenqa ujtawan payman rikhurillarqataj. Qosan Manoahtajrí mana paywanchu kasharqa.
10 Chayrayku payqa usqhayllata correspa qosanman nimorqa: “Qaninpa rikhuriwarqa chay runa rikhurillawantaj”,+ nispa.
11 Manoahtaj jatarikuytawan warminwan rerqa maypichus chay runa kasharqa chayman, taporqataj: “¿Qanchu warmiywan parlarqanki?”, nispa. Chay runataj kuticherqa: “Arí, noqa parlarqani”, nispa.
12 Manoahtaj nerqa: “Chay nisqaykeqa juntʼakuchunpuni. ¿Imaynatataj chanta chay wawata uywasqaykuri? ¿Imatataj pay ruwanqari?”,+ nispa.
13 Jehová Diospa angelnintaj Manoahta nerqa: “Warmiykeqa imatachus payman nisqayta ruwachun.+
14 Ama mikhuchunchu uvasta, nitaj uvasmanta ima ruwasqatapis, ama tomachunchu vinota, nitaj ima machanastapis.+ Amallataj mikhuchunchu chʼichipaj qhawasqa mikhunastapis.+ Payqa tukuy ima kamachisqayta ruwachun”, nispa.
15 Chantá Manoahqa Jehová Diospa angelninta nerqa: “Ama jina kaspa amallaraj ripuychu ari. Uj chivitota wañuchispa waykʼorqapusqayku”,+ nispa.
16 Manoahqa mana yacharqachu chay runaqa Jehová Diospa angelnin kasqanta. Jehová Diospa angelnintajrí Manoahta nerqa: “Qhepakuyman chaypis mana mikhuymanchu. Chaywanpis munaspaqa, Jehová Diospaj qʼolachina* ofrendata jina jaywawaj”, nispa.
17 Manoahtaj Jehová Diospa angelninta nerqa: “Sutillaykitapis willariwayku ari.+ Ajinamanta kay niwasqayku juntʼakojtin, qanmanta yuyarikunaykupaj”, nispa.
18 Jehová Diospa angelnintajrí, kuticherqa: “¿Imapajtaj sutiyta yachayta munankiri? Suteyqa may tʼukuna”, nispa.
19 Chantá Manoahqa chay chivitota, chʼaki mikhuy ofrendatawan Jehová Diosman jaywarqa uj chhanka patapi. Diostaj uj tʼukuna imata ruwarqa Manoahwan warminwan qhawashajtinku.
20 Paykunaqa rikorqanku altarmanta nina lauray pataman oqharikusqanta, chay nina ukhupitaj Jehová Diospa angelnin cieloman ripusqanta. Manoahwan warminwanqa, chayta rikuspa chay ratopacha pampakama kʼumuykukorqanku.
21 Manoahqa chaypiraj repararqa chay runaqa Jehová Diospa angelnin kasqanta. Chantá Jehová Diospa angelnenqa manaña ujtawan paykunaman rikhurerqañachu.+
22 Chaymanta Manoahqa warminta nerqa: “Kunanqa wañusunchej. Diostaqa rikunchej ari”,+ nispa.
23 Warmintajrí nerqa: “Sichus Jehová Diosqa wañuchiyta munawasunman karqa chayqa, manachá qʼolachina ofrendanchejta,+ nitaj chʼaki mikhuy ofrendanchejtapis japʼikuwasunmanchu karqa. Mana kay imasta rikuchiwasunmanchu karqa, nillataj kay imastapis willawasunmanchu karqa”, nispa.
24 Aswan qhepaman chay warmeqa uj qhari wawata nacechikorqa, Sansón+ sutitataj payman churarqa. Chay wawaqa wiñarqa, Jehová Diostaj payta bendicerqa.
25 Chay qhepata Jehová Diospa espiritonqa Sansonman jamorqa+ Mahané-Danpi+ kashajtin, chayqa kashan Zoramanta Estaolman+ rinapi.
Sutʼinchaykunasnin
^ Uj aylloqa uj familiamanta miraj ashkha familias kanku.
^ Hebreo parlaypeqa nin, “wijsamantapacha”.
^ Chayri “Cheqa Diospa”. Glosariopi cheqa Dios nisqata leeriy.
^ Chayri “ruphachina”.
