Jueces 17:1-13
-
Miqueaspa santosnin, sacerdotenpis (1-13)
17 Efraín orqospi+ uj runa tiyakorqa Miqueas sutiyoj.
2 Payqa uj pʼunchay mamanman nerqa: “Chay uj pacha 1.100 qolqesta* suwasorqanku, qantaj chay suwata maldicerqanki. Chay qolqetaqa noqa japʼishani, noqa oqharerqani”, nispa. Mamantaj nerqa: “Jehová Dios bendecisuchun wawáy”, nispa.
3 Chantá Miqueasqa chay 1.100 qolqesta mamanman kutichiporqa. Mamantajrí nerqa: “Kay qolqetaqa Jehová Diosman qopusaj. Chaywan ruwachikuy uj santota, metalmanta santotawan.*+ Ajinamanta chay qolqeqa qanpaj kanqa”, nispa.
4 Miqueas chay qolqeta kutichipusqantawan, mamanqa 200 qolqesta tʼaqaspa platero runaman jaywarqa, chay runataj uj santota ruwarqa, metalmanta santotawan.* Chay santostaqa Miqueaspa wasinman churamorqanku.
5 Miqueaspataqa santosta yupaychana wasin tiyaporqa. Ruwarqataj uj efodta,*+ wasi santostawan,*+ ujnin wawantataj sacerdote kananpaj churarqa.+
6 Chay pʼunchaykunapeqa mana Israelpi uj rey karqachu.+ Sapa ujpis munasqanta ruwaj.*+
7 Chaypacha uj joven tiyakorqa Judapi kaj Belenpi.+ Payqa levita*+ karqa, Judá familia ukhupitaj unaysitutaña tiyakusharqa.
8 Chantá chay jovenqa vidata maskʼakuspa Judapi kaj Belenmanta riporqa. Jinapi Efraín orqosman chayarqa, Miqueaspa wasinman.+
9 Miqueastaj payta taporqa: “¿Maymantataj jamushanki?”, nispa. Chay joventaj kuticherqa: “Judapi kaj Belenmanta jamushani, levita kani. Uj lugarta maskʼashani chaypi tiyakunaypaj”, nispa.
10 Ajinapi Miqueasqa nerqa: “Noqawan qhepakuy ari, tatay jina kanaykipaj,* sacerdoteytaj. Sapa wata pagasqayki chunka qolqesta, ropatapis completota qosqayki, mikhunatapis”, nispa. Chayta nejtin chay levitaqa wasinman yaykorqa.
11 Ajinata chay levitaqa Miqueaswan qhepakaporqa, ujnin wawan jinataj karqa.
12 Miqueasqa payta churarqa sacerdoten kananpaj.+ Paytaj Miqueaspa wasinpi tiyakaporqa.
13 Chantá Miqueasqa nerqa. “Kunanqa Jehová Dios bendeciwanqa, imaraykuchus sacerdoteyqa uj levita”, nispa.
Sutʼinchaykunasnin
^ Chay qolqesqa qolqe metalmanta ruwasqa karqa.
^ Chayri “unuyachisqa metalmanta santotawan”.
^ Chayri “unuyachisqa metalmanta santotawan”.
^ Hebreo parlaypeqa nin, “terafim santostawan”.
^ Chayri “Imachus sapa ujman allin rijchʼaj chayta ruwaj”.
^ Chayri “yuyaychawajniy kanaykipaj”.
