Jueces 2:1-23
2 Jehová Diospa angelnenqa+ Guilgalmanta+ Bokimman wicharispa, israelitasman nerqa: “Noqa Egiptomanta orqhomorqaykichej, pusamorqaykichejtaj ñaupa tatasniykichejman juraspa qonayta nerqani chay jallpʼaman.+ Noqaqa nerqani: ‘Mana jaykʼajpis qankunawan trato ruwasqayta pʼakisajchu.+
2 Qankunapis amapuni ima tratotapis ruwankichejchu kay jallpʼaspi tiyakojkunawanqa,+ altaresninkutapis qʼalata phirirankichej’,+ nispa. Chaywanpis qankunaqa mana chay nisqayta kasuwarqankichejchu.+ ¿Imaraykutaj ajinata ruwarqankichejri?
3 Chayrayku nillarqaykichejtaj: ‘Noqaqa mana chay runasta ñaupaqeykichejmanta qharqosajchu.+ Paykunaqa uj trampa jina qankunapaj kanqanku,+ diosesninkuta yupaychanaykichejpajtaj aysasonqachej’,+ nispa”.
4 Jehová Diospa angelnin chay imasta nisqantawan, tukuynin israelitasqa jatunmanta waqayta qallarerqanku.
5 Chayrayku chay lugartaqa Bokim* nispa suticharqanku. Chaypitaj uywa wañuchisqasta Jehová Diosman jaywarqanku.
6 Josué israelitasta kachapojtin, paykunaqa sapa ujninku rerqanku herencia jallpʼankuta japʼikanpoj.+
7 Josué kausashajtin, kurajkuna kausashajtinkupis, israelitasqa Jehová Diosta sirvispa kausakorqanku. Chay kurajkunaqa rikorqanku Jehová Dios tʼukuna imasta israelitaspaj ruwasqanta.+
8 Chantá Jehová Diospa kamachin Josué wañuporqa, 110 watasniyoj kashaspa.+ Payqa Nunpa wawan karqa.
9 Paytaqa pʼamparqanku Timnat-Heres jallpʼanpi,+ Efraín orqospi, Gaas orqoj norte ladonpi.*+
10 Josuejpa tiemponpi kausaj runaspis tukuyninku wañuraporqanku. Chaymanta qhepaman nacekojkunaqa manaña Jehová Diosta rejserqankuchu, imastachus israelitasrayku ruwasqantapis manaña yacharqankuchu.
11 Israelitasqa sajra imasta Jehová Diospa qhawayninpi ruwarqanku, Baal santostataj sirverqanku.*+
12 Paykunaqa Jehovata saqerparerqanku, tatasninkoj Diosninta, pichus Egiptomanta paykunata orqhomorqa chay Diosta.+ Waj dioskunatataj yupaycharqanku, muyuyninkupi kaj llajtaspa diosesninkuta.+ Chaykunaman kʼumuykukuspa Jehová Diosta phiñacherqanku.+
13 Paykunaqa Jehová Diosta saqerparispa, Baalta sirverqanku, Astoret santosta ima.+
14 Chayrayku Jehová Diosqa manchayta israelitaspaj phiñakorqa. Paykunataqa enemigosninkoj makisninkuman entregaykorqa,+ saqerqataj tukuy imasninkuta suwanankuta.+ Jinapi paykunaqa manaña enemigosninkuman sayaykuyta aterqankuchu.+
15 Mayman rejtinkupis Jehová Diosqa paykunaj contrankupi kasharqa, mana allin imaswan paykunata qhatirichej,+ imaynatachus ñaupajta Jehová nerqaña ajinata, imaynatachus Jehová jurarqaña ajinata.+ Ajinamanta paykunaqa may llakiypi rikhurej kanku.+
16 Jehová Diostaj juecesta paykunapaj churapoj, chay suwasmanta salvananpaj.+
17 Paykunatajrí ni chay juezkunatapis uyariyta munarqankuchu. Astawanpis waj dioseswan qhenchachakorqanku,* paykunamantaj qonqorikorqanku. Niraj imapi wistʼuykorqanku ñaupa tatasninku purerqanku chay ñanmanta. Ñaupa tatasninkoqa Jehová Diospa kamachisqanta kasukorqanku,+ paykunatajrí mana.
18 Jehová Diosqa sapa kuti paykunapaj uj juezta churapoj,+ chay jueztataj yanapaj. Chay juez kausashajtenqa Jehová Dios paykunata enemigosninkumanta salvaj. Jehová Diosqa paykunata khuyaj+ enemigosninku sinchʼita ñakʼarichejtinku, waqachejtinku ima.+
19 Chay juezninku wañupojtintaj, paykunaqa watejmanta chay sajra imasta ruwallajtaj kanku, tatasninkumantapis yapasqataraj. Paykunaqa waj dioskunata yupaychaj kanku, chaykunata sirvej kanku, chaykunamantaj qonqorikoj kanku.+ Manapuni chay sajra ruwasqasninkuta qonqajchu kanku, chantapis kʼullukoj kanku.*
20 Chayrayku Jehová Diosqa, israelitaspaj sinchʼita phiñakuspa+ nerqa: “Kay nacionqa ñaupa tatasninkuwan trato ruwasqayta pʼakinku,+ manataj kasuwankuchu.+
21 Chayrayku noqaqa mana ñaupaqenkumanta wijchʼusajchu ni mayqen nacionta, Josué wañupusqanmanta qhepakorqankuraj chay nacionesta.+
22 Ajinapi noqaqa yachasaj israelitas Jehová Diospa ñanninpi purinankutachus manachus,+ imaynatachus tatasninku purerqanku ajinata”, nispa.
23 Chayrayku Jehová Diosqa saqellarqa chay naciones qhepakunankuta. Payqa mana chay ratochu chay nacionesta wijchʼusqa, nitaj Josuejpa makisninmanpis jaywaykusqachu.
Sutʼinchaykunasnin
^ Bokim suteqa niyta munan waqay chʼurus, waqaylus.
^ Chayri “pata ladonpi”.
^ Chayri “yupaycharqanku”.
^ Waj dioseswan qhenchachakorqanku nispaqa waj diosesta yupaychasqankuta nishan.
^ Chayri “tercos kaj kanku”.
