Jueces 21:1-25
-
Benjamín aylluta salvanku (1-25)
21 Israelita qharisqa kay juramentota Mizpapi+ ruwasqanku: “Mana mayqenninchejpis warmi wawasninchejta Benjamín ayllumanta* qhariswan casarachisunchu”,+ nispa.
2 Chaymanta qhepata israelitasqa Betelman rerqanku.+ Chaypitaj cheqa Diospa* ñaupaqenpi tiyaykukuspa chʼisiyaykunankama sonqo nanayta jatunmanta waqarqanku.
3 Nerqankutaj: “Jehová Diosníy, Israelpa Diosnin, ¿imaraykutaj kay imas Israelta qhatirinri? ¿Imaraykutaj Israelmanta uj ayllu chinkanri?”, nispa.
4 Qʼayantintaj israelitasqa tutamanta jatarikorqanku. Chaypitaj uj altarta ruwarqanku qʼolachina* ofrendasta jaywanankupaj, khuska mikhurikuy ofrendastapis.+
5 Chantá israelitasqa tapunakorqanku: “¿Pikunataj tukuy israelita ayllusmanta mana wicharerqankuchu Jehová Diospa ñaupaqenman tantakoj?”, nispa. Paykunaqa juraspa nisqankuña wañuchinankuta, pikunachus Mizpapi Jehová Diospa ñaupaqenman tantakoj mana wicharejkunata.
6 Israelitasqa mayta phutikorqanku chay llakiy hermanonku Benjaminta qhatirisqanmanta. Nerqankutaj: “Kunan pʼunchay Israelmanta uj ayllu chinkapun.
7 ¿Maymantataj warmista tarisun puchoj benjaminitaspaj? Noqanchejqa Jehová Diospa sutinpi juranchejña,+ warmi wawasninchejta mana paykunawan casarachinanchejta”,+ nispa.
8 Chantá tapunakorqanku: “¿Pikunataj tukuy israelita ayllusmanta mana jamorqankuchu Mizpapi+ Jehová Diospa ñaupaqenman tantakoj?”, nispa. Chaypacha repararqanku Jabés-Galaadpi tiyakojkunaqa ni mayqenninku jamusqankuta tantakorqanku chay campamentoman.*
9 Runasta yupashajtinku Jabés-Galaadmantaqa mana ujllapis kasqachu.
10 Chayrayku israelitasqa 12.000 wapu soldadosta kacharqanku, kay jinata kamachispa: “Riychej, espadawan wañurachimuychej Jabés-Galaadpi tiyakojkunata, warmista, wawastapis.+
11 Tukuynin qharista wañurachinkichej, qhariwan puñuykorqankuña chay warmistapis”, nispa.
12 Jabés-Galaadpi tiyakojkunamantaqa 400 sipaskunallata tarerqanku ni jaykʼaj qhariwan puñuykojkunata. Paykunatataj pusarqanku Canaán jallpʼapi kashan chay Siló+ campamentoman.
13 Chaymanta israelitasqa wajyachimorqanku Rimón chhankapi+ kasharqanku chay benjaminitasta, paykunawan allinyakunankupaj.
14 Chay benjaminitas kutimojtinkutaj, israelitasqa Jabés-Galaadpi+ mana wañucherqankuchu chay warmista paykunaman qorqanku. Manataj tukuyninkupaj alcanzarqachu.
15 Israelitastaj Benjamín ayllumanta mayta phutikorqanku,+ Jehová Dios Benjamín aylluta chay ujnin israelita ayllusmanta tʼaqasqanrayku.
16 Israelmanta kurajkunaqa ninakorqanku: “Benjamín ayllumanta warmisqa qʼalitunku wañuchisqa karqanku. ¿Maymantataj kunan warmista tarisunchej chay mana warmisniyoj benjaminitaspajri?”, nispa.
17 Chantá nillarqankutaj: “Benjaminmanta puchojkunaqa, may jallpʼatachus herenciata japʼikorqanku chayllapipuni tiyakunanku tiyan. Ajinamanta ama mayqen israelita ayllupis chinkananpaj.
18 Chaywanpis noqanchejqa mana warmi wawasninchejta paykunawan casarachiyta atinchejchu. Noqanchejqa juranchejña: ‘Maldecisqa kachun pichus warmi wawanta uj benjaminitawan casarachejqa’,+ nispa”.
19 Chantá nillarqankutaj: “Sapa wata Jehová Diospaj Silopi uj fiesta tiyan,+ Betelpa norte ladonpi,* Betelmanta Sichemman* rina ñanpa inti llojsimuynin ladopi, Lebonaj sur ladonpi”,* nispa.
20 Chantá chay kurajkunaqa benjaminita qharista kamacherqanku: “Riychej, pakaykakamuychej uva huertas ukhupi.
21 Sumajta qhawankichej. Silomanta sipaskuna rondapi tusoj llojsimojtinku, qankunapis uva huertasmanta llojsimunkichej, sapa ujniykichejtaj uj sipasta suwankichej warmiykichej kananpaj. Chaymantataj jallpʼaykichejman pusakapunkichej.
22 Sichus tatasninku chayri hermanosninku quejakoj jamuwasqayku chayqa, noqaykoqa nisqayku: ‘Paykunata khuyakuychej ari, amataj noqaykuta juchachawaykuchu, maqanakupeqa mana tukuyninkupajchu warmita tarerqayku.+ Chaywanpis mana qankunachu chay warmista qoshankichej, chayrayku chay juramentota ruwasqaykichejmantaqa mana juchachasqachu kankichej’,+ nispa”.
23 Benjaminita qharisqa chay kamachisqankuman jina ruwarqanku. Tususharqanku chay warmismanta ujtakama suwarqanku warminku kananpaj. Chaymantataj herencia jallpʼasninkuman kutipuspa llajtasninkuta watejmanta sayaricherqanku,+ chaypitaj tiyakaporqanku.
24 Chaypacha israelitasqa chaymanta riraporqanku, sapa ujninku ayllunkuman, familiankuman ima. Ajinata paykunaqa sapa ujninku herencia jallpʼankuman riporqanku.
25 Chay pʼunchaykunapeqa mana Israelpi rey karqachu.+ Sapa ujpis munasqanta ruwaj.*
Sutʼinchaykunasnin
^ Uj aylloqa uj familiamanta miraj ashkha familias kanku.
^ Glosariopi cheqa Dios nisqata leeriy.
^ Chayri “ruphachina”.
^ Campamentoqa ashkha toldo wasis.
^ Chayri “pata ladonpi”.
^ Chayri “ura ladonpi”.
^ Chayri “Imachus sapa ujman allin rijchʼaj chayta ruwaj”.
