Jueces 3:1-31
3 Kay nacionesta Jehová Diosqa qhepakunankuta saqerqa israelitasta pruebaman churanankupaj, Canaanpi maqanakusta mana rikorqankuchu chay israelitasta.+
2 Diosqa kay nacionesta qhepakunankuta saqerqa, israelitaspa mirayninkumanta kajkuna maqanakuyta yachanankupaj, pikunachus mana jaykʼajpis maqanakuman rerqankuchu chaykuna.
3 Kay naciones qhepakorqanku: filisteospa phishqantin kamachejkunasninku,+ tukuynin cananeos, Líbano orqospi+ tiyakoj sidonios,+ heveos+ ima, Baal-Hermón orqomantapacha Lebó-Hamatkama.*+
4 Paykunaqa qhepakorqanku israelitasta pruebaman churanankupaj. Ajinamanta yachakunman karqa, Jehová Dios ñaupa tatasninkuman Moisesnejta qorqa chay kamachiykunata kasukunankutachus manachus.+
5 Ajinapi israelitasqa tiyakorqanku kay nacioneswan khuska: cananeoswan,+ hititaswan, amorreoswan, perizitaswan, heveoswan, jebuseoswan ima.
6 Israelitasqa chay nacionesmanta warmiswan casarakorqanku, warmi wawasninkutapis qhari wawasninkuwan casaracherqanku. Chantapis diosesninkuta sirviyta qallarerqanku.+
7 Israelitasqa sajra imasta Jehová Diospa qhawayninpi ruwarqanku. Paykunaqa Diosninku Jehovata qonqaporqanku, sirverqankutaj Baal santosta,+ yupaychana kʼullu postesta*+ ima.
8 Chayrayku Jehová Diosqa israelitaspaj sinchʼita phiñakuspa, Mesopotamiamanta* rey Cusán-Risataimpa makisninman paykunata jaywaykorqa. Israelitasqa pusaj watas juntʼata sirverqanku Cusán-Risataimta.
9 Chantá israelitasqa Jehová Diosman qhaparikorqanku yanapata mañakuspa.+ Jehová Diostaj uj kacharichejta paykunapaj churarqa,+ Quenazpa wawan Otnielta.+ Quenazqa karqa Calebpa sullkʼa hermanon.
10 Ajinapi Jehová Diospa espiritonqa Otnielman jamorqa,+ paytaj israelitaspa juezninku kayta qallarerqa. Otniel maqanakuman llojsejtin, Jehová Diosqa Mesopotamiamanta* rey Cusán-Risataimta makisninman jaywaykorqa.
11 Chaymanta qhepamanqa, 40 watasta allin kausay karqa chay jallpʼaspi, Quenazpa wawan Otniel wañupunankama.
12 Chaymanta israelitasqa watejmanta sajra imasta Jehová Diospa qhawayninpi ruwallarqankutaj.+ Chayrayku Jehová Diosqa saqellarqa Moabmanta+ rey Eglón aswan atiyniyojman tukunanta, israelitas sajra imasta Jehová Diospa qhawayninpi ruwasqankurayku.
13 Eglonqa ammonitaswan+ amalequitaswan+ ujchaykukuspa, israelitaswan maqanakamorqa, palma sachʼasniyoj llajtatataj japʼikaporqa.+
14 Israelitasqa 18 watasta Moabmanta rey Eglonta sirverqanku.+
15 Chaypacha israelitasqa Jehová Diosman qhaparikorqanku.+ Jehová Diostaj uj kacharichejta paykunapaj churarqa,+ Guerajpa wawan Ehudta.+ Payqa lloqʼe maki karqa,+ benjaminitataj.+ Uj pʼunchay, israelitasqa Ehudwan pagota apacherqanku Moabmanta rey Eglonman.
16 Ehudqa puraj filoyoj espadata ruwakusqa, iskay cuartasniyojta jina.* Chaytataj paña piernan chayman wataykukorqa, ropan uraman.
17 Chantá Ehudqa Moabmanta rey Eglonpaman chayaspa, pagota apasqanta jaywarqa. Eglonqa manchay wira runa karqa.
18 Pagota jaywaytawantaj, Ehudqa paywan rerqanku chay runasta kachaporqa, pikunachus pagota aparqanku chaykunata.
19 Chantá Guilgalpi+ santos kasharqa chaynejman* chayaspa Ehudqa reypaman kutirerqa. Nerqataj: “Reyníy, uj willay tiyan qanpaj”, nispa. Reytaj nerqa: “Amaraj willawaychu”, nispa. Chantaqa tukuy kamachisninta llojsicherqa.
20 Rey Eglón terraza patapi* chay chirisitu cuartonpi sapallan qhepakusqantawan, Ehudqa payman chimpaykuspa nerqa: “Kay willayqa Diosmanta kashan”, nispa. Eglontaj chayta uyarispa kamachina tiyananmanta sayarerqa.*
21 Ehudtajrí, lloqʼe makinwan paña piernanmanta espadanta orqhoytawan, Eglonta wijsanpi tʼojsirparerqa.
22 Espadataj mangontin yaykuykorqa. Eglón may wira kasqanrayku tukuynin espada chinkaykorqa, akanpis llojsimorqa. Ehudqa manaña espadanta orqhokaporqachu.
23 Chantá Ehudqa chay terraza patapi kaj cuartoj punkusninta llaveykuytawan ayqekorqa.
24 Ehúd llojsisqantawanña, reypa kamachisnenqa kuterqanku. Chay cuartoj punkusnin llavesqa kasqanta rikuspataj, ninakorqanku: “Ukhu cuartopichá bañopi kashan”, nispa.
25 Anchataña suyaspataj mancharikuyta qallarerqanku. Rey manapuni punkuta kicharimojtintaj, llaveta japʼiytawan kicharerqanku. Chaypitaj reyninkuta pampapi wañusqata tarerqanku.
26 Paykuna suyanankukama Ehudqa ayqekorqaña. Payqa Guilgalpi santos kasharqa chaynejta* pasaspa+ Seiraman chayarqa.
27 Chayman chayaytawanqa, chay Efraín orqospi+ wajramanta putututa waqacherqa.+ Israelitastaj chay orqosmanta uraykamorqanku, Ehudtaj ñaupaqenkuta rerqa.
28 Jinapi Ehudqa paykunata nerqa: “Qhepayta jamuychej, imaraykuchus Jehová Diosqa enemigosniykichej moabitasta makisniykichejman jaywaykun”, nispa. Paykunataj Ehudta qhaterqanku. Chantá Jordán mayu chimpanasta japʼikaporqanku moabitas mana ayqekunankupaj. Manapuni pitapis chayninta pasajta saqerqankuchu.
29 Chaypacha israelitasqa 10 mil moabitasta jina wañuracherqanku.+ Tukuy chaykunaqa karqanku kallpasapa wapu soldados, nitaj ni ujpis ayqekorqachu.+
30 Ajinata israelitasqa chaypacha moabitasta atipaykorqanku. Chaymanta qhepamanqa, 80 watasta allin kausay karqa chay jallpʼaspi.+
31 Chantá Anatpa wawan Samgarñataj+ juez karqa. Payqa 600 filisteosta wañuracherqa+ waka tʼojsina ayjonllawan.*+ Ajinata paypis israelitasta salvallarqataj.
Sutʼinchaykunasnin
^ Chayri “Hamatman yaykunakama”.
^ Glosariopi yupaychana kʼullu poste nisqata leeriy.
^ Hebreo parlaypeqa nin, “Aram-Naharaimmanta”.
^ Hebreo parlaypeqa nin, “Arammanta”.
^ Hebreo parlaypeqa nin, “uj codo”. Ichapis karqa juchʼuy codo, 38 centimetrosniyoj jina. Yanapa B14 nisqata leeriy.
^ Ichá nillanmantaj “Guilgalpi rumi orqhona lugarman”.
^ Chayri “chayta uyarispa asientonmanta sayarerqa”.
^ Chayri “wasi patapi”.
^ Ichá nillanmantaj “Guilgalpi rumi orqhona lugarta”.
