Lucas 15:1-32
15 Tukuy impuestota cobrajkuna, juchasapaspis Jesusman qayllaykoj kanku nisqasninta uyarinankupaj.+
2 Fariseoswan leymanta yachachejkunawantaj thutuspa nej kanku: “Kay runaqa juchasapasta chunka makiwan japʼikun, paykunawantaj mikhun”, nispa.
3 Jesustaj kikincharispa paykunaman nerqa:
4 “Mayqenniykichejpatapis 100 ovejasnin kajtin, ¿manachu ujnin chinkajtenqa 99 ovejasninta chʼinnejpi saqespa chinkasqa ovejanta maskʼamun tarinankama?+
5 Tariytawantaj, may kusisqa qʼepiriykukun.
6 Wasinman chayaspataj amigosninta, vecinosnintawan wajyaspa nin: ‘Noqawan khuska kusikuychej, tarikapuni chinkasqa ovejayta’,+ nispa.
7 Kayta niykichej: Ajinallataj cielopi aswan kusiy kanqa uj juchasapa runa juchasninmanta pesachikojtin,+ chay 99 cheqan runasmanta nisqaqa, pikunachus mana pesachikunankuchu tiyan chaykunamanta.
8 ”Chayri pi warmillapis chunka dracma* qolqesniyoj kaspa, ujninta chinkachejtin, ¿manachu mecherota japʼichiytawan wasinta pichaspa allinta maskʼan tarinankama?
9 Tarispataj amigasninta, vecinasnintawan wajyaspa nin: ‘Noqawan khuska kusikuychej, tarikapuni chinkachisqay dracma* qolqeyta’, nispa.
10 Kayta niykichej, ajinata Diospa angelesninpis kusikunku, uj juchasapa runa pesachikojtin”,+ nispa.
11 Jesusqa nillarqataj: “Uj runa iskay qhari wawasniyoj kasqa.
12 Sullkʼa kajtaj tatanta nisqa: ‘Tatáy, noqaman chayawaj herenciata qopuway’, nispa. Tatankutaj iskayninkuman herenciankuta partipusqa.
13 Pisi pʼunchayninmantaj, sullkʼa wawanqa tukuy imasninta tantaykuspa karu llajtaman ripusqa. Chaypitaj herencianta tukuchimusqa mana allinta kausaspa.*
14 Tukuy qolqenta tukuchisqantawantaj, manchay yarqhay kasqa chay llajtapi, paytaj pisichikuyta qallarisqa.
15 Chayrayku chay llajtamanta uj runapaj llankʼaj churakusqa, chay runataj jallpʼasninman kachasqa khuchisninta michinanpaj.+
16 Paytaj yarqhaywanqa chay khuchi mikhuna thaqosta mikhuyta munasqa, manataj pipis ni imata qorisqachu.
17 ”Yuyayninman churakuspataj nisqa: ‘Tataypa peonesnenqa ashkha mikhunayoj kanku, noqatajrí kaypi yarqhaymanta wañushaniña.
18 Tataypa wasinman kutipusaj, nisajtaj: “Tatáy, Diospa* contranta, qanpa contraykitawan juchallikuni.
19 Manaña ‘wawáy’ ninawaykipaj jinachu kani. Ujnin peonniykita jinallaña qhawaway”, nispa’.
20 Ajinapi tatanpa wasinman kutipusqa. Karullapiraj kashajtintaj, tatanpa sonqon wawayasqa payta rikuspa, usqhayllata taripamuspataj abrazaykusqa, may munakuywantaj muchʼaykusqa.
21 Wawantaj nisqa: ‘Tatáy, Diospa contranta, qanpa contraykitawan juchallikuni.+ Manaña “wawáy” ninawaykipaj jinachu kani’, nispa.
22 Tatantajrí kamachisninta nisqa: ‘¡Usqhayta! Aswan sumaj jatun ropata orqhomuspa churaykuychej. Anillotapis makinman churaychej, jukʼutastataj* chakisninman.
23 Wira torillotapis apamuspa ñakʼaychej* mikhunanchejpaj, kutinpusqanmantataj kusikunanchejpaj.
24 Kay wawayqa wañusqa kasharqa kausarimuntaj,+ chinkasqa kasharqa kutinpuntaj’, nispa. Chantá mayta kusikuyta qallarisqanku.
25 ”Kuraj wawantaj chajrapi kashasqa, kutinpuspataj wasiman qayllamushaspa uyarisqa tocashasqankuta, tusushasqankutawan.
26 Ujnin kamachita wajyaspataj tapusqa imachus kashasqanta.
27 Kamachitaj kutichisqa: ‘Hermanoyki kutinpun, tataykitaj wira torillota ñakʼachipun, allillan kutinpusqanrayku’, nispa.
28 Kuraj wawantaj phiñakuspa mana yaykuyta munasqachu. Tatantaj llojsimuspa mayta nisqa yaykurinallanta.
29 Paytaj tatanta nisqa: ‘Kay chhika watastaña qanta sirviyki, tukuy ima kamachiwasqaykita kasukuspa, nitaj jaykʼajpis uj chivitullatapis qowarqankichu, amigosniywan mikhuspa kusirikunaypaj.
30 Chay lloqallaykeqa, khuchi warmiswan* purispa kapuyniykita tukuchimun, qantaj chayamusqantawan wira torillota ñakʼachipunki’, nispa.
31 Tatantaj nisqa: ‘Wawáy, qanqa noqawanpuni kashanki, tukuy imasniypis qanpata.
32 Kay hermanoykeqa wañusqa kasharqa kausarimuntaj, chinkasqa kasharqa kutinpuntaj, ¿manachu kusikunanchej kanman?’, nispa”.
Sutʼinchaykunasnin
^ Yanapa B14 nisqata leeriy.
^ Yanapa B14 nisqata leeriy.
^ Chayri “qolqenta wayrachispa”, “millayta kausaspa”.
^ Griego parlaypeqa nin, “cieloj”.
^ Chayri “abarcastataj”.
^ Ñakʼay: waj lugarespi ninku degollay, wañuchiy.
^ Khuchi warmi nispaqa parlashan qhariswan puñuykoj warmimanta, astawanqa qolqerayku.
