Mateo 22:1-46
22 Jesusqa ujtawan paykunaman kikinchaykunawan parlaspa nerqa:
2 “Cielopi kaj Gobiernoqa kayman rijchʼakun: Uj rey wawanta casarachinanpaj jatun mikhuyta wakichisqa.+
3 Kamachisnintataj kachasqa invitadosta pusamunankupaj casamiento mikhuyman. Invitadostaj mana jamuyta munasqankuchu.+
4 Ujtawan waj kamachisnintañataj kachashaspa nisqa: ‘Invitadosta nimuychej: “Mikhunata waykʼuchiniña. Torosniyta, wira uywasniytapis ñakʼachiniña.* Tukuy imapis wakichisqaña kashan. Jamuychej casamiento mikhuyman”, nispa’.
5 Invitadostaj mana kasusqankuchu, wakenqa chajrankuman ripusqanku, wakintaj qhatunkuman.+
6 Wakinkunataj reypa kamachisninta japʼispa maqaykusqanku wañuchinankukama.
7 ”Reytajrí phiñakuspa soldadosninta kachasqa. Chay runa wañuchista wañurachisqa, llajtankutapis ruphaykuchisqa.+
8 Chantá kamachisninta nisqa: ‘Casamiento mikhoyqa wakichisqaña kashan, invitadostaj mana casamiento mikhuypi kanankupaj jinachu kasqanku.+
9 Chayrayku llajtamanta llojsej ñankunaman riychej, pitachá tarisqaykichejta casamiento mikhuyman wajyamuychej’,+ nispa.
10 Kamachisnintaj ñankunaman rispa tukuy tarisqanku runasta wajyamusqanku, sajrasta, kʼachastapis. Ajinapi invitadosqa casamiento wasiman juntʼaykusqanku.
11 ”Reytaj invitadosta qhawarej yaykuspa, uj runata mana casamiento ropayojta rikusqa.
12 Nisqataj: ‘¿Imajtintaj yaykumorqanki mana casamiento ropayojri?’, nispa. Chay runataj chʼinlla kasqa.
13 Reytaj kamachisninta nisqa: ‘Kay runata makisninta, chakisnintawan wataykuspa jawa laqhaman wijchʼuychej. Chaypi waqanqa, kirusnintapis kʼarurachenqa’,* nispa.
14 ”Invitadosqa ashkha kanku, ajllasqastajrí pisilla kanku”.
15 Fariseostaj rispa yachachinakorqanku, Jesusta parlasqanpi pantachinankupaj.+
16 Chantá discipulosninkuta, Herodesta qhatejkunatawan+ kacharqanku Jesusta nimunankupaj: “Yachachejníy, yachayku cheqatapuni parlasqaykita, Diospa ñanninmantapis cheqanta yachachisqaykita, manataj runaswan allinpaj qhawachikuytachu maskʼasqaykita, nitaj runaj rijchʼaynillantachu qhawasqaykitapis.
17 ¿Ima ninkitaj? ¿Allinchu impuestota Cesarman pagana, manachu?”, nispa.
18 Jesustajrí sajra yuyayninkuta yachaspa nerqa: “Puraj uyas, ¿imaraykutaj pantachiyta munawankichej?
19 Impuesto pagana qolqeta rikuchiwaychej”, nispa. Paykunataj uj denario* qolqeta jaywarqanku.
20 Jesustaj paykunata taporqa: “¿Pejpa uyantaj, pejpa sutintaj kay qolqepi kashan?”, nispa.
21 Paykunataj kuticherqanku: “Cesarpata”, nispa. Jesustaj nerqa: “Jina kajtenqa, Cesarpata kajtaqa Cesarman qopuychej, Diospata kajtataj Diosman qopuychej”,+ nispa.
22 Chayta uyarispa mayta tʼukorqanku, Jesusta saqerpariytawantaj riporqanku.
23 Chay pʼunchayllapitaj saduceosqa, pikunachus ninku wañusqas mana kausarimunankuta chaykuna,+ Jesusman qayllaykuspa taporqanku:+
24 “Yachachejníy, Moisés nerqa: ‘Pi runallapis mana wawayoj wañupun chayqa, hermanon casarakunan tiyan chay viudanwan. Ajinamanta hermanonpa miraynin kananpaj’,+ nispa.
25 Noqayku ukhupi qanchis hermanos karqanku. Kuraj kaj casarakorqa, mana wawayojtaj wañuporqa. Chantá warmenqa cuñadonwan casarakaporqa.
26 Chay qosanpis wañupullarqataj. Kinsa kajwanpis ajinallataj karqa. Qanchisnintintaj ajinata casarakuspa wañuporqanku.
27 Tukuyninkumanta qhepatataj chay warmipis wañupullarqataj.
28 Chay warmeqa qanchisnintinwan casarakorqa. Wañusqas kausarimojtinku, ¿mayqenpa warmintaj kanqari?”, nispa.
29 Jesustaj kuticherqa: “Qankunaqa pantasqa kashankichej. Mana rejsinkichejchu Diosmanta Qhelqasqata, nitaj Diospa atiynintapis.+
30 Kausarimuypeqa ni qharispis ni warmispis casarankuchu, cielopi kaj ángeles jina kanku.+
31 Wañusqas kausarimunankumanta imatachus Dios nisusqaykichejta, ¿manachu leerqankichej? Pay nerqa:
32 ‘Noqa kani Abrahanpa Diosnin, Isaacpa Diosnin, Jacobpa Diosnintaj’,+ nispa. Payqa mana wañusqaspa Diosninchu, manachayqa kausajkunajta”.+
33 Chayta uyarispa, runasqa yachachiyninmanta mayta tʼukorqanku.+
34 Saduceosta Jesús chʼinyachisqanta yachaspa fariseosqa tantakorqanku.
35 Paykuna ukhumanta Leymanta sumajta yachaj runa, Jesusta pantachiyta munaspa taporqa:
36 “Yachachejníy, ¿mayqen kamachiytaj Leymanta aswan kurajri?”,+ nispa.
37 Jesustaj kuticherqa: “‘Jehová* Diosniykitaqa munakunayki tiyan tukuy sonqoykiwan, tukuy kausayniykiwan,* tukuy yuyayniykiwantaj’.+
38 Chaymin aswan kuraj, ñaupaj kaj kamachiytaj.
39 Iskay kajtaj ñaupaj kajman rijchʼakullantaj: ‘Runa masiykita munakunayki tiyan qan kikiykita jina’.+
40 Kay iskay kamachiykunapi sayachisqa kashanku tukuynin Leypis Profetaspa qhelqasqankupis”.+
41 Fariseos tantasqallaraj kashajtinku, Jesús paykunata taporqa:+
42 “¿Ima ninkichejtaj Cristomanta? ¿Pejpa wawantaj?”, nispa. Paykunataj kuticherqanku: “Davidpa wawan”,+ nispa.
43 Jesustaj taporqa: “Chanta, ¿imaraykutaj espíritu santoj yanapayninwan+ Davidqa Cristota ‘Señor’ nerqari? David nerqa:
44 ‘Jehová* Diosqa Señorniyta nerqa: “Pañayman tiyaykukuy, enemigosniykita chakisniyki uraman churanaykama”,+ nispa’.
45 Chayrayku sichus David payta Señor nerqa chayqa, ¿imaynapitaj Cristoqa Davidpa wawan kanmanri?”,+ nispa.
46 Mana pipis ni imata kutichiyta aterqachu. Chay pʼunchaymantapachataj niña pipis ni imata tapuyta munarqañachu.
Sutʼinchaykunasnin
^ Ñakʼay: waj lugarespi ninku degollay, wañuchiy.
^ Kʼarurachenqa nispaqa rabiakunanta, ni imanakuyta atinanta niyta munashan.
^ Yanapa B14 nisqata leeriy.
