Mateo 4:1-25
4 Chantá Diospa espiritonqa Jesusta chʼinnejman pusarqa, chaypitaj Diabloqa juchaman urmachiyta munarqa.+
2 Jesusqa 40 diasta, 40 tutasta ayunaytawan yarqhachikorqa.
3 Diablotaj+ qayllaykorqa juchaman urmachiyta munaspa, nerqataj: “Diospa wawanchus kanki chayqa, niy kay rumista tʼantaman tukunankuta”, nispa.
4 Jesustaj kuticherqa: “Qhelqasqa kashan: ‘Runaqa mana tʼantallawanchu kausanqa, astawanqa Jehová* Diospa siminmanta tukuy llojsimoj palabraswan kausanqa’,+ nispa”.
5 Chantá Diabloqa, Jesusta Jerusalenman* pusaspa,+ temploj aswan patannejman sayaykucherqa,+
6 nerqataj: “Diospa wawanchus kanki chayqa, uraman wijchʼuykukuy. Qhelqasqa kashan: ‘Payqa angelesninta kachamusonqa’, ‘paykunaqa makisninkupi japʼisonqanku ama chakisniykita rumiman takakunaykipaj’,+ nispa”.
7 Jesustaj kuticherqa: “Qhelqasqallataj kashan: ‘Jehová* Diosniykitaqa ama pruebaman churankichu’,+ nispa”.
8 Chantá Diabloqa Jesusta jatun orqo puntaman pusaspa, rikucherqa jallpʼantinmanta tukuy nacionesta, qhapaj kapuyninkutawan,+
9 nerqataj: “Sichus uj kutillatapis qonqoriykukuspa yupaychawanki chayqa, kay tukuy imasta qopusqayki”, nispa.
10 Jesustaj kuticherqa: “¡Riy kaymanta Satanás! Qhelqasqa kashan: ‘Jehová* Diosniykita yupaychanayki tiyan,+ pay sapallantataj sirvinayki tiyan’,+ nispa”.
11 Chantá Diabloqa Jesusta saqerparerqa,+ angelestaj jamuspa Jesusta yanaparqanku.+
12 Jesusqa Juanta presochasqankuta uyarispa,+ Galileaman riporqa.+
13 Nazaretmanta llojsiytawantaj, Capernaúm llajtaman tiyakoj riporqa.+ Chaytaj qocha kantupi kashan, Zabulón, Neftalí jallpʼasnejpi.
14 Ajinamanta profeta Isaiaspa nisqan juntʼakunanpaj, pay nerqa:
15 “Zabulón jallpʼa, Neftalí jallpʼa: Nacionespa Galilea jallpʼanku, mayqenchus mar qochaman rej ñanpi, Jordán mayumanta inti yaykuy ladopi kashanki chay.
16 Laqhapi tiyakoj runasqa jatun kʼanchayta rikorqanku, wañuy llanthu cheqapi tiyakojkunamanpis uj kʼanchay+ rikhurimorqa”,+ nispa.
17 Jesusqa chaymantapacha kay jinata willayta qallarerqa: “Juchasniykichejmanta pesachikuychej, cielopi kaj Gobiernoqa qayllapiña kashan”,+ nispa.
18 Jesusqa Galilea qocha kantunta rishaspa, iskay hermanosta rikorqa: Ujnenqa Simón karqa, pitachus Pedro ninku chay,+ hermanontaj Andrés karqa. Paykunaqa pescadores karqanku, qochamantaj chʼipata* choqaykusharqanku.+
19 Jesustaj paykunata nerqa: “Qhepayta jamuychej, runa japʼej pescadoresman tukuchisqaykichej”,+ nispa.
20 Paykunataj chay ratopacha chʼipasninkuta saqerpaspa, qhepanta rerqanku.+
21 Aswan ñaupajman rispataj Jesusqa iskay hermanostawan rikorqa: Santiagota, Juantawan.+ Paykunaqa tatanku Zebedeowan canoapi chʼipasninkuta allinchaykusharqanku, paykunatapis wajyallarqataj.+
22 Paykunapis chay ratopacha canoankuta, tatankutawan saqerparispa Jesuspa qhepanta rillarqankutaj.
23 Jesusqa tukuynin Galileata purimorqa+ sinagogasninkupi* yachachispa,+ Diospa Gobiernonmantapis sumaj willaykunata willaspa. Tukuy laya* onqoyniyoj runasta, tukuy laya nanayniyoj runastapis sanoyacherqa.+
24 Jesusmantaqa tukuynin Siriapipis uyarikullarqataj. Paymanqa apamoj kanku tukuy onqosqasta, sinchʼi nanayniyojkunata,+ supayniyojkunata,+ tʼuku onqoyniyojkunata,+ suchustapis. Jesustaj paykunata sanoyachej.
25 Chayrayku ashkha runas qhepanta rej kanku Galileamanta, Decápolis* nisqamanta, Jerusalenmanta, Judeamanta, Jordán mayu chimpamantapis.
Sutʼinchaykunasnin
^ Griego parlaypeqa nin, “santo llajtaman”.
^ Chayri “mallata”.
^ Chayri “Tukuy rijchʼaj”.
^ Chayri “Chunka Llajtas”.
