Salmos 37:1-40
-
Jehová Diospi atienekojkunaqa allinta kausakonqanku
-
“Ama sajra runaspa ruwasqankumanta phiñakuychu” (1)
-
“Jehová Diosta yupaychaspa kusikuy” (4)
-
“Kausayniykita Jehová Diospa makinman churay” (5)
-
“Llampʼu sonqoyoj runastajrí kay jallpʼata herenciata jina japʼenqanku” (11)
-
Cheqan runasqa mana tʼantata pisichikonqankuchu (25)
-
Cheqan runasqa kay jallpʼapi wiñaypaj kausanqanku (29)
-
Davidpa takiynin.
א [álef]
37 Ama sajra runaspa ruwasqankumanta phiñakuychu.
Amataj sajra imasta ruwajkunamanta envidiakuychu.+
2 Paykunaqa qhora jina chay rato qawiponqanku,+llullu qhora jinataj chʼakisqata chʼakiponqanku.
ב [bet]
3 Jehová Diospi atienekuspa allin kajta ruway.+
Jallpʼaykipi tiyakuy, imata ruwaspapis allin kajtapuni ruway.+
4 Jehová Diosta yupaychaspa kusikuy,paytaj sonqoykej munasqanta qosonqa.
ג [guímel]
5 Kausayniykita Jehová Diospa makinman churay.+
Paypi atienekuy, paytaj yanapasonqa.+
6 Diosqa cheqan runa kasqaykita tukuyman rejsichenqa.
Payqa justiciaykita kʼancharichenqa imaynatachus chaupi pʼunchaypi inti kʼancharin ajinata.
ד [dálet]
7 Jehová Diospa ñaupaqenpi chʼinlla kakuy,+pacienciawan suyakuy.
Ama sajra runapaj phiñakuychu
sajra imasta wakichisqanpi allin rejtinpis.+
ה [he]
8 Ama rabiakuychu, nitaj phiñakuychu.+
Ama phiñasqallaqa kaychu, pajtataj mana allin kajta ruwawaj.
9 Sajra runasqa tukuchisqa kanqanku.+
Jehová Diospi atienekojkunarí* kay jallpʼata herenciata jina japʼenqanku.+
ו [waw]
10 Uj chhikamantawanqa niña sajra runas kanqankuñachu.+
Maypichus karqanku chaynejta qhawarejtiykeqa,manaña kanqankuñachu.+
11 Llampʼu sonqoyoj runastajrí kay jallpʼata herenciata jina japʼenqanku,+ni ima llakiyniyojtaj allin kusisqa kausakonqanku.+
ז [zayin]
12 Sajra runasqa cheqan runaspa contranta imaymana sajrata wakichinku.+
Kirusninkutapis cheqan runaspa contrankuta phiñasqas kʼarurachinku.
13 Jehová Diostajrí chay sajra runasmanta asikonqa.
Payqa yachan ima pʼunchaychus chay sajra runas wañunankuta.+
ח [jet]
14 Sajra runasqa espadankuta orqhokunku, flechanapaj arconkutapis* matʼinku,mana piniyojkunata, wajchastawan tukuchinankupaj,cheqan kajta ruwajkunatapis wañuchinankupaj.
15 Jinapis chay espadankoqa paykunaj sonqollankutataj tʼojsiykonqa.+
Flechana arcosninkupis tʼunasqa kanqa.
ט [tet]
16 Aswan allinmin cheqan runaj pisi kapuynenqa,sajra runaj ashkha kapuyninmanta nisqaqa.+
17 Sajra runaspa makisninkoqa pʼakirasqa kanqa,cheqan runastataj Jehová Dios yanapanqa.
י [yod]
18 Jehová Diosqa sumajta yachan mana juchayoj runas imapichus rikukusqankuta.
Paykunamanqa herenciata qonqa wiñaypaj wiñaynintinpaj.+
19 Paykunaqa desgracia patapi kaspapis mana llakikonqankuchu.
Yarqhay tiempopi kaspapis ashkha mikhunayoj kanqanku.
כ [kaf]
20 Sajra runastajrí wañonqanku.+
Jehová Diospa enemigosnenqa sumaj qʼomer pasto jina uj ratolla kanqanku,
qʼoshñi jinalla chinkaponqanku.
ל [lámed]
21 Sajra runaqa manukuspapis mana kutichipuyta yachanchu.
Cheqan runatajrí kʼacha, qorikuytapis yachan.+
22 Diospa bendicionninta japʼejkunaqa kay jallpʼata herenciata jina japʼenqanku.
Pikunatachus Dios maldecin chay runastajrí tukuchisqa kanqanku.+
מ [mem]
23 Sichus uj runaj purisqan Jehová Diosta kusichin chayqa,+Diosqa chay runaman rikuchenqa maynintachus purinanta.+
24 Chay runaqa urmaspapis mana pampapi wijchʼusqachu qhepakonqa.+
Jehová Diosmin chay runataqa makinmanta japʼishan.+
נ [nun]
25 Unayqa joven karqani, kunantaj viejoña kani,jinapis ni jayk’aj rikorqanichu Diosqa cheqan runata saqerparisqanta,+nitaj wawasnintapis khuyayta tʼantata* mañakushajta.+
26 Chay cheqan runaqa tukuy sonqo wajkunaman manuriyta yachan.+
Wawasnintaj Diosmanta bendicionta japʼenqanku.
ס [sámekh]
27 Sajra imasta ruwaymanta karunchakuy, allin imastataj ruway,+wiñaypajtaj kausanki.
28 Jehová Diosqa justiciata munakun,nitaj jaykʼajpis payta kasojkunataqa saqerparenqachu.+
ע [ayin]
Diosqa paykunata waqaychanqa.+
Sajra runaspa wawasninkutajrí tukuchisqa kanqanku.+
29 Cheqan runasqa kay jallpʼata herenciata jina japʼenqanku,+kay jallpʼapitaj wiñaypaj kausakonqanku.+
פ [pe]
30 Cheqan runaqa yachayniyoj kaymanta parlan,cheqan kajtataj parlan.+
31 Diosninpa leynenqa sonqonpi kashan.+
Purishajtenqa mana lluskʼanqachu.+
צ [sadé]
32 Sajra runaqa cheqan runata wateqanwañuchiyta munaspa.
33 Jehová Diostajrí mana chay cheqan runataqa sajra runaj makinpi saqerparenqachu,+nitaj juchayoj kasqanta nenqachu, juiciopi chay sajra runa chʼataykushajtenqa.*+
ק [qof]
34 Jehová Diospi atienekuy,* ñannintataj puriy.
Payqa jatunpaj qhawasusqanrayku kay jallpʼata herenciata jina qosonqa.
Qanqa rikunki sajra runas tukuchisqa kasqankuta.+
ר [resh]
35 Mana sonqoyoj sajra runata rikorqanijallpʼanpi jatun sachʼa jina sumajta wiñarishajta.+
36 Chay sajra runaqa ujllata wañuspa chinkaporqa.+
Chay runataqa maskʼarqani, nitaj tarerqanichu.+
ש [shin]
37 Mana juchayoj runata reparay.
Cheqan runata qhawariy.+
Chay runapajqa aswan qhepaman allin kausay kanqa.+
38 Diosta mana kasukojkunarí tukuchisqa kanqanku.
Sajra runasqa chinkachisqa kanqanku.+
ת [taw]
39 Jehová Diosqa cheqan runasta salvan.+
Desgracia patapi kashajtinku paymin jarkʼachasqa lugarninku.+
40 Jehová Diosmin paykunata yanapaspa libranqa.+
Diosmin sajra runaspa makinkumanta kacharichispa salvanqa.
Imaraykuchus paykunaqa Diospi pakakunku.+
Sutʼinchaykunasnin
^ Chayri “Jehová Diospi suyakojkunarí”.
^ Flechana arco: waj lugarespi ninku camba flecha.
^ Chayri “mikhunata”.
^ Chayri “juchachashajtenqa”.
^ Chayri “Jehová Diospi suyakuy”.
