Salmos 58:1-11
-
Jallpʼataqa Dios juzgashan
-
Diosmanta mañakun sajra runata castigananta (6-8)
-
Takichejpaj. Kaytaqa takina “Ama chinkarparichiwaychu” nisqa tonoman jina. Davidpa takiynin. Miktam.*
58 ¿Chʼinlla kashaspa atiwajchejchu justiciamanta parlayta?+
¿Runaslla kashaspa atiwajchejchu justiciawan juzgayta?+
2 Mana atiwajchejchu. Qankunaqa sajra imasllata sonqoykichejpi wakichikunkichej.+
Chayrayku runas ukhupeqa sajra imasllata ruwankichej.+
3 Sajra runasqa nacekusqankumantapacha sajra ñanta japʼirinku.
Paykunaqa nacekusqankumantapacha mana allin ñanta japʼirinku, llullastaj kanku.
4 Parlasqankupis katarej venenon jina.+
Paykunaqa mana uyarejman tukunku, ninrisninkuta wiskʼaykoj kataris jina.*
5 Chay katarisqa layqa* runaspa parlasqankuta mana uyariyta munallankuchu,allinta layqayta yachajtinkupis.
6 Diosníy, chay leonespa kirusninkuta muchharay.
Jehová Diosníy, quijadasninkuta pʼakiray.
7 Paykunaqa chinkachunku urayta ripoj yaku jina.
Diosqa flechana arconta* matʼichun, paykunata flechaspataj urmarachichun.
8 Purisqanpi chʼakipoj* chʼuru jina* kachunku.
Sullusqa wawa jina ni jaykʼaj intita rikuchunkuchu.
9 Khishkarara chʼajra* lauraspa niraj mankaykita qʼoñichishajtin,Diosqa sinchʼi wayrawan chay khishkarara chʼajrata apachenqa, chʼakipis qʼomerpis kachun.+
10 Cheqan runasqa kusikonqanku Dios vengakusqanta rikuspa.+
Chakisninkoqa sajra runaspa yawarninkupi chʼaranchakonqa.*+
11 Chaypacha runasqa nenqanku: “Cheqan runapajqa bendición kanpuni.+
Diosqa kanpuni, paymin kay mundota juzgan”,+ nispa.
Sutʼinchaykunasnin
^ Chayri “cobras jina”.
^ Chayri “brujo”.
^ Flechana arco: waj lugarespi ninku camba flecha.
^ Hebreo parlaypeqa nin, “unuyapoj”.
^ Chayri “caracol jina”.
^ Chayri “Cambrón khishka”.
^ Chʼaranchakuy: waj lugarespi ninku chʼatachakuy.
