Jatun tantakuykunaman reyqa mayta gustawanchej. Imaraykuchus israelitas jina, ashkha hermanosninchejwan khuska Jehová Diosta yupaychayta atinchej. Chantapis chay asambleaspeqa Diosmanta astawan yachakunchej, familianchejwan, amigosninchejwan khuskataj karikunchej. Chay tantakuyta jatunpaj qhawasqanchejrayku, kinsantin día chaypi kanapaj kallpachakunchej.

Chay jatun tantakuykunaman rispaqa mana noqallanchejpichu yuyananchej tiyan, manaqa imaynasmantachus wajkunata munakusqanchejta rikuchinanchejpipis (Gál 6:10; Heb 10:24, 25). Chantapis necesitasqanchej asientosllata ocupaspa, wajkunapaj punkuta japʼiripuspa ima wajkunaj allinninkuta maskʼasqanchejta rikuchinchej (Flp 2:3, 4). Asambleaspeqa ashkha hermanosta rejsinchej. Chantapis kallpachakusunman mana rejsisqanchej hermanoswan parlarinapaj. Chaytataj ruwasunman niraj asamblea qallarishajtin, tukukusqantawan chayri almuerzo horaspi (2Co 6:13). Asambleaspi rejsisqanchej hermanosqa wiñaypaj amigosninchej kankuman. Wajkunaqa purajmanta munanakusqanchejta rikuspa, Jehová Diosta sirviyta munanqanku (Jn 13:35).

ASAMBLEAS INTERNACIONALES: “MUNAKOYQA NI JAYKʼAJ TUKUKONQACHU” NISQA VIDEOTA QHAWAYTAWAN, KAY TAPUYKUNAMAN KUTICHIY:

• ¿Imaynasmantataj hermanos, 2019 watapi asambleas internacionalesman rejkunata munakusqankuta rikucherqanku?

• ¿Imaraykutaj Diospa llajtanpi munanakunku, ujchasqastaj kanku?

• ¿Imastataj Diospa Llajtanta Kamachejkuna munakuymanta nerqanku?

• Alemaniamanta, Corea del Surmanta hermanosninchejta, ¿imaynamantataj munakuy ujchaykorqa?

• ¿Imapajtaj kallpachakunanchej tiyan?