Sapa día imamantapis llakikunchejpuni. Tatasqa familiankuta uywanankumanta llakikunku. Sapallanku wawasninkuta uywaj tatas chayri mamasqa qolqenku mana alcanzasqanmanta llakikunku. Jovenesqa escuelapi compañerosninku asipayasqankumanta chayri molestasqankumanta llakikunku. Wakintaj onqosqa kasqankumanta chayri viejoyapusqankumanta llakikunku. Arí, tukuypata problemasninchejqa tiyan. Wakin hermanostaj ujllapi ashkha problemaspi rikukunku. Jinapis tumpamantawanqa tukuy problemasninchej tukukaponqa (2Co 4:16-18).

Jehovaqa yachan ima llakiykunapichus rikukushasqanchejta. Kusikuntaj paymanta mana karunchakojtinchej, aguantajtinchej ima. Chantapis bendecinawanchejta nin. Chayqa mayta sonqochawanchej (Jer 29:11, 12). Jesuspis llakikullawanchejtaj. Cristiano ruwanasninchejta juntʼanapaj kallpachakushajtinchejqa, Jesusqa nin noqanchejwan kashananta (Mt 28:20). Diospa Gobiernon kamachishajtenqa sajra imasmanta kacharichisqa kasun. Chaypi piensarispataj, astawan Jehová Diospi suyakusun, ima llakiytapis aguantayta atillasun (Ro 8:19-21).

SINCHʼI WAYRA CHAYAMOJTIN JESUSLLATAPUNI QHAWANACHEJ: IMA BENDICIONESTACHUS QHEPAMAN JAPʼINANCHEJPI YUYANA NISQA VIDEOTA QHAWAYTAWAN, KAY TAPUYKUNAMAN KUTICHIY:

• ¿Imaynamantataj runas Diosmanta karunchasqa karqanku? Chanta, ¿imasmantataj mana ayqeyta atinchejchu?

• Jehová Diosta kasukojkuna, ¿ima bendicionestataj aswan qhepaman japʼenqanku?

• ¿Imaraykutaj paraisopi kausakuyta atisun?

• ¿Ima bendicionestataj mayta suyakushanki?