Jesuspa Wañuyninta Yuyarinapaj tantakoyqa yanapawanchej, wañuyninnejta ima bendicionestachus japʼinanchejpi tʼukurinapaj. Chaymanta ujtaj wañusqas kausarimunanku. Jehovaqa mana munarqachu runas wañunankuta. Chayrayku pillapis wañupojtin mayta llakikunchej (1Co 15:26). Jesusqa mayta llakikorqa Lázaro wañupusqanmanta yachachisqasnin waqashasqankuta rikuspa (Jn 11:33-35). Jehovaqa, Jesús jinallataj familianchejmanta pillapis wañupojtin waqasqanchejta rikuspa mayta llakikun (Jn 14:7). Jehovaqa, noqanchej jinallataj mayta suyashan, kamachisninta kausarichinan tiempo chayamunanta (Job 14:14, 15).

Jehovaqa ‘maychus kajta’ ruwayta munasqanrayku, ajinallatatajchá wañusqastapis kausarichimonqa (1Co 14:32, 33, 40). Wañusqasta pʼampashaspa waqanamantaqa, wañusqas kausarimusqankumanta mayta kusikusun. ¿Wañusqas kausarimunankupi tʼukurinkichu, astawanqa pillapis wañupojtin? (2Co 4:17, 18.) Jehová Diosman mayta agradecekunchej wañusqasta kausarichimuyta atisqanmanta, chaytataj Bibliapi willawasqanchejmanta (Col 3:15).

• Familiaykimanta chayri amigosniykimanta, ¿pi kausarimunantataj astawan suyashanki?

• Diospa ñaupa tiempo kamachisninmanta, ¿pikunatataj rejsiyta munanki?