39 yachachiy

Aaronpa tuqnun tʼikan

QHAWARIY kay kʼaspi tʼikasqanta puqusqanta ima. Aaronpa tuqnun. ¡Kay tʼikakuna puquykuna ima juk tutallapi wiñarqanku! Qhawarina imaraykuchus.

Israelitakunaqa may unaytaña chʼaki jallpʼapi purichkarqanku. Wakinkunaqa, manaña Moisés kamachinanchu tiyan, nitaq Aaronpis kuraq sacerdote kananchu tiyan, nispa ninku. Coré, Datan, Abiram, 250 llaqtamanta kuraqkuna chayta ninku. Tukuy paykunaqa jinata Moisesman nirqanku: ‘¿Imaraykutaq ñuqayku pataykuta qamkuna uqharikunkichik?’, nispa.

Moisés Coreta paywan kaqkunata ima nirqa: ‘Qʼaya tutamanta qʼusñichinasniychikpi inciensota churaspa, Jehovaman qayllaykuychik. Jinamanta pitachus pay akllasqanta rikusunchik’, nispa.

Qʼayantinqa Coré, 250 paywan kaqkuna, chantapis wak runaspis, tantakuna toldoman rirqanku. Chayrayku Jehová mayta phiñakurqa. Moisestaq nirqa: ‘Chay saqra runasmanta tʼaqakuychik, amataq imasninkutapis llamkhaychikchu’, nispa. Chayta uyarispa runaqa, Coremanta, Datanmanta, Abirammanta ima karunchakurqa.

Moisestaq nirqa: ‘Kaypi, pitachus Dios akllasqanta yachankichik. Jallpʼa kicharikuspa, saqra runasta uquykunqa’, nispa.

Moisés chʼinyaptinkama, jallpʼa kicharikurqa, Coré, Datán, Abiram, paykunawan kaqkuna, toldosninku ima chayman chinkaykurqanku, chaymantataq jallpʼa wisqʼaykukurqa. Chinkaykuqkunap qhaparisqankuta uyarispa, runaqa qhaparin: ‘¡Ayqinachik! ¡Mana jallpʼa uquykunawanchikpaq!’, nispa.

Coreqa 250 paywan ima toldop qayllanpi kachkallarqankuraq. Chayrayku Jehová chaypi tukuyninkuta qʼulachinapaq ninata kachamurqa. Chanta Jehová Eleazarta Aaronpa churinta nirqa, incienso qʼusñichinasninkuta uqharimunanta, chaywan altarta qhataykunanpaq. Chay qhataqa tukuy llaqtaman Aarón wawasnin imalla sacerdotespaq akllasqa kasqankuta yuyarichin.

Jehovaqa Aarón churisnin imalla sacerdotepaq akllasqas kasqankuta rikuchiyta munaspa, Moisesman nirqa: ‘Sapa Israel ayllumanta kuraq kaq juk tuqnuta apamuchun. Leví ayllupaqqa, Aarón juk tuqnuta apamuchun. Chaykunata, tantakuna toldoman apaykunki, maypichus Diospa leyninwan arca kachkan, chay chimpanpi saqinki. Chaypi akllasqay runap tuqnunta tʼikarichisaq’, nispa.

Qʼayantin sutʼiyayta Moisés qhawamurqa. ¡Aaronpa tuqnunqa tʼikarispa puqurqa! ¿Yachankichu kunan imaraykuchus Aaronpa kʼaspin tʼikasqanta?

Números 16:1-49; 17:1-11; 26:10.