Qurimanta waka uña
36 yachachiy
Qurimanta waka uña
¡WAY! ¿Imatataq runa ruwachkanri? ¡Waka uñata yupaychachkanku! ¿Imaraykutaq chayta ruwachkanku?
Moisés urqupi qhipakapusqanmanta, llaqtaqa nirqa: ‘Kay Moisesqa imanakunchus, mana rikhurimunchu. Juk diosta ruwakuna kay jallpʼamanta urqhunawanchikpaq’, nispa.
‘Ajina kachun’, nispa Aarón Moisespa wawqin nirqa: ‘Sapa jukpis quri jaluchusniykichikta apamuychik’, nispa. Kayta llaqta ruwaptintaq Aaronqa, qurita unuyachiytawan waka uñata qurimanta ruwarqa. Chaymanta llaqta nirqa: ‘¡Kayqa Diosninchik, Egiptomanta urqhumuwarqanchik, chay!’, nispa. Jinamanta juk jatun raymita ruwaspa qurimanta waka uñata yupaycharqanku.
Jehová chayta rikuytawan mayta phiñakurqa. Moisesmantaq nirqa: ‘Usqhayta uraykuy, imaraykuchus llaqtayqa millayta juchallikuchkan. Kamachiykunata qunqaspa, qurimanta juk waka uñata yupaychachkan’, nispa.
Moisesqa usqhayta urqumanta uraykurqa. Llaqtaman qayllaykuspataq ruwasqankuta rikurqa. ¡Runaqa waka uñap muyuyninpi qhaparispa tusuchkarqa! Moisés phiñakuspa chay iskay laja rumista pampapi phirirqa. Chaymanta waka uñata japʼiytawan unuyachispa chinkachirqa.
Llaqtaqa mayta juchachakun. Chayrayku Moisesqa wakinkunata espadasninkuta japʼinankuta mañaspa nirqa: ‘Qurimanta waka uñata yupaychaqkunaqa wañunanku tiyan’, nispa. ¡Chayrayku 3.000 runata wañuchirqanku! ¿Manachu Jehovallata yupaychananchikta kay yachachiwanchik?
