61 yachachiy

David reyman tukun

WATIQMANTA Saúl Davidta japʼiyta munarqa. Chayrayku, 3.000 soldadoswan maskʼamurqa. David chayta yachaytawan, maypichus Saúl puñusqanta yachananpaq watiqaqkunata kacharqa. Chanta, iskay soldadosninta tapun: ¿Pitaq ñuqawan Saulpa jarananman rinqa?’, nispa.

‘Ñuqa risaq’, nispa Abisai nirqa. Abisai Sarviapta churin, Sarviataq Davidpa panan karqa. Paykunaqa, tukuy puñuchkaptinku, chʼinllamanta jaranaman yaykurqanku. Chantataq, Saulpa umanniqmanta lanzanta, yaku apananta ima apakapurqanku. Mana pipis paykunata rikurqachu nitaq uyarirqachu, wañusqata puñuchkasqankurayku.

Kunan, Davidta Abisaitawan qhawariy. Paykunaqa ripuytawan urqu patamanta, soldadosta apaykachaqman qhaparinku: ‘Abner, ¿imaraykutaq mana reyniykita allinta qhawankichu? ¡Rikuy! ¿Maytaq reypa lanzan, yaku apanan ima?’, nispa

Saúl rikchʼarin. David qhaparisqanta riqsispataq, tapun: ‘¿Davidchu kanki?’, nispa. ¿Urapi Saulta Abnertawan rikunkichu?

Davidtaq nirqa: ‘Ari, ñuqa kani. ¿Imaraykutaq qhatiykachawachkankiri? ¿Ima saqratataq ruwarqaykiri? Kaypi lanzayki kachkan. Pillapis apakapuq jamuchun’, nispa.

‘Ñuqa juchayuq kani. Wampu runajina ruwani’, nispa Saúl nirqa. Chanta David ripurqa, Saultaq wasinman kutipun. Chaywanpis Davidqa sunqunpi nirqa: ‘Maykʼaqchá Saúl wañuchiwanqa. Filisteospaman ayqinay tiyan’, nispa. Chaytataq ruwarqa. Filisteosta paykunawan kasqanta yuyachispa, paykunawan qhipakun.

Filisteosqa tumpamantawan Israelwan maqanakuq wicharinku. Chay maqanakuypitaq Saúl Jonatan ima wañurqanku. Chaytaq Davidta mayta phutichirqa. Chayrayku juk kʼacha takiyta ruwaspa, takirikurqa: ‘Jonatán, qammanta sinchi llakisqapuni kachkani, wawqiy. ¡May munasqa ñuqapaq karqanki!’, nispa

Chaymanta, Davidqa Israel Hebrón llaqtaman kutipurqa. Chaypi israelitasqa, Isbóset Saulpa wawan, chayri David rey kananpaq maqanakuchkarqanku. Davidwan kaqkunaqa atiparqanku. Davidqa 30 watayuq rey karqa, 7 watata Hebrón llaqtapi kamachirqa, chaypitaq Amnón, Absalón, Adonías churisnin nacerqanku.

Chaymanta, David soldadosninwan sumaq llaqta Jerusalenta japʼikapuq rirqanku. Chaypi Joab Sarviapta juknin wawan, maqanakuyta umachachkarqa. Chayrayku Davidqa Joabta soldadosninta kamachinanpaq churarqa. Chaymanta David Jerusalenpi kamachiyta qallarirqa.

1 Samuel 26:1-25; 27:1-7; 31:1-6; 2 Samuel 1:26; 3:1-21; 5:1-10; 1 Crónicas 11:1-9.