72 yachachiy

Dios Ezequiasta yanapan

¿YACHANKICHU imaraykuchus kay runa Jehovamanta mañakuchkan? ¿Imaraykutaq chay cartasta altarpa ñawpaqinman churachkan? Kay runaqa Ezequías. Payqa Israelpa iskaynin ayllusmanta rey. May llakiypi kachkan. ¿Imaraykutaq?

Jehová Diosninchik Israelmanta 10 ayllu saqrayasqankurayku, asirios paykunata urmachinankuta saqirqa. Kunantaq asiriosqa iskaynin ayllutañataq urmachiyta munachkanku.

Asiriamanta reynin Ezequiasman cartasta kachamurqa. Ezequías kay cartasta Diospa ñawpaqinpi churarqa. Chay cartaspi asiriosqa Jehovamanta asikuchkarqanku, Ezequiastataq rendikunanta nichkarqanku. Chayrayku Ezequías Jehovamanta mañakun: ‘Jehová Diosniy, Asiriap reyninmanta salvawayku. Jinamanta tukuy llaqtas qam sapallayki Dios kasqaykita yachanqanku’, nispa. ¿Chayta Jehová uyarirqachu?

Ezequiasqa allin rey karqa. Mana 10 ayllumanta reykunajinachu, nitaq tatan Ajazjinachu. Ezequiasqa tukuy imapi Diosta kasukun. Chayrayku, mañakuyta tukusqantawan, Jehová profeta Isaiasniqta kayta willachirqa: ‘Asiriap reyninqa, mana Jerusalenman yaykumunqachu. Nitaq mayqin soldadosninpis qayllamunqachu. Mana juk flechallatapis Jerusalenman flechamunqankuchu’, nispa.

Dibujota qhawariy. ¿Pikunataq kay wañusqa soldadosri? Kaykunaqa asirios kanku. Jehová juk angelta kachamurqa, paytaq juk tutallapi 185.000 asiriosta wañuchirqa. Chayraku, Asiriamanta reyqa ripun.

Jinamanta iskay ayllumanta reinoqa salvakun, llaqtataq juk tiempota allinta tiyakun. Ezequías wañupuptinqa churin Manasés reyjina qhipakun. Manasesqa, churin Amón ima saqra karqanku. Chayrayku, runapis manchayta saqrayarqa. Kamachisnin rey Amonta wañuchiptinku, wawan Josías iskay ayllusmanta, reyjina qhipakurqa.

2 Reyes 18:1-36; 19:1-37; 21:1-25.