68 yachachiy

Iskay wawas watiqmanta kawsanku

WAÑUPUWAQ chayqa, ¿manachu mamayki watiqmanta kawsarimuptiyki kusikunman? ¡Ari! Chaywanpis, ¿wañupuspa kawsarimusunmanchu? ¿Ñawpaqta pillapis kawsarimurqachu?

Kay dibujopi qharita, warmita, yuqallituta ima qhawariy. Chay qhariqa profeta Elías, chay warmiqa Sareptamanta juk viuda, yuqallitutaq chay warmip wawan. Juk pʼunchay yuqallituqa llakiyta unquspa wañupurqa. Eliastaq warmita nirqa: ‘Wawaykita apamuy’, nispa.

Elías wañusqa wawata pata wasiman apaspa puñunaman siriykuchirqa, chanta Diosmanta mañakun: ‘Jehová Diosniy, kay wawata watiqmanta kawsarichiy’, nispa. ¡Wawataq samariyta qallarirqa! Chaymanta, Elías uraqachispa, viudaman nirqa: ‘¡Qhawariy, wawaykiqa kawsachkan!’, nispa. Viudataq mayta kusikurqa.

Jehovapta wak profetan Eliseo sutikurqa, payqa Eliasta yanapaq. Jehová Eliseotapis milagrosta ruwachin. Juk pʼunchay payqa Sunem llaqtaman rirqa, juk warmitaq payta mayta yanaparqa. Kay warmiqa juk wawitayuq karqa.

Juk paqarin, wiñaytawan wawaqa tatanta taripaq, chaqra llamkʼayninman rirqa. Chayllapi: ‘¡Ay umay, umitay nanawan!’, nispa qhaparikurqa. Wasinman apaptinkutaq wañupurqa. ¡Mamanqa mayta llakikurqa! Eliseotataq usqhayta maskʼamurqa.

Eliseo chayamuspa, wañusqa wawawan cuartoman yaykurqa. Eliseoqa Jehovamanta mañakuytawan wawap qayllanpi siriykurqa. Wawap ukhunqa qʼuñikuyta qallarirqa, chanta 7 kutita chʼujurqa. ¡Mamaqa wawitanta rikuspa, maytacha kusikurqa!

Kunankama may chhika runa wañun. Chayqa ayllusta, runa masista ima, llakichin. Ñuqanchikqa mana pitapis kawsarichimuyta atinchikchu, Jehovataq atin. Aswan qhipaman Diosninchik imaynatachus may chhika runata kawsarichimusqanta rikusunchik.

1 Reyes 17:8-24; 2 Reyes 4:8-37.