32 yachachiy

Chunka ñakʼariykuna

DIBUJOKUNATA qhawariy. Sapa dibujitu juk ñakʼariyta rikuchiwanchik. Qallarinapaqqa Aarón tuqnunwan Nilo mayuta waqtan, mayup yakunqa yawarman tukurqa. Challwakunaqa wañupurqanku, mayutaq millayta asnarqa.

Chaymanta Jehovaqa mayumanta kʼaylankulasta lluqsichimurqa. Kʼaylankulasqa tukuyniqman yaykurqanku, hornosman, mankasman, wasisman ima. Kʼaylankulas wañuptinku egipciosqa qulluspi tantaykurqanku, tukuy llaqtataq millayta asnarqa.

Chanta Aaronqa tuqnunwan pampata waqtarqa, ñutʼu jallpʼataq juchʼuy khuritusman tukurqa, kay khuritusqa phawaq, khaniq ima kanku. Kayqa kimsa kaq ñakʼariy karqa.

Chaymanta qhipan ñakʼariykunaqa egipciosllataña ñakʼarichirqa. Tawa kaq ñakʼarichiyqa khanikuq chʼuspis karqanku. Egipciospa wasinkuman juntʼaykurqanku. Phichqa kaq ñakʼariytaq uywakunata unquchispa wañuchirqa. Egipciospa wakasnin, ovejasnin, cabrasnin ima wañurqanku.

Chaymanta Moisés Aaronwan makinkuwan uchphata pataman qhallirqanku, uchphataq uywasman runasman chayaytawan, sarnaykuchirqa. Kayqa 6 kaq ñakʼariy karqa.

Chaymanta Moisesqa makinta janaqpachaman uqharirqa. Jehovataq qhururun nispa jatuchaq granizota parachimurqa. Mana jaykʼaq Egiptopi chayjinata granizamurqachu.

Pusaq ñakʼariyqa langostas karqa. Mana jaykʼaq chay chhika langosta karqachu, granizomanta tukuy puchusqanta paykuna mikhukapurqanku.

Jisqʼun ñakʼariyqa laqhayay karqa. Egiptoqa 3 pʼunchayta laqhayaykurqa, israelitakunataq inti kʼanchaywan kakurqanku.

Tukuchanapaq Diosqa llaqtanta nirqa, juk chivitup chayri juk corderitup yawarninwan, punkup kʼaspisninta chʼaqchunankuta. Jinamanta Diospa angelnin Egiptoman riptin, punkupi yawarta rikuspa mana pitapis wañuchinanchu karqa, mana wasip punkunpi yawarta rikuspataq kuraq churita, kuraq uñata ima wañuchinan karqa. Chayqa 10 kaq ñakʼariy karqa.

Faraonqa kay ñakʼariywanraq, israelitakuna ripunankuta saqirqa. Israelitakunataq wakichisqaña kachkaspa, chay tutapacha Egiptomanta ripurqanku.

Éxodo 7 tʼaqamanta 12 tʼaqakama.