23 yachachiy

Faraón musqukusqan

COPERO carcelmanta lluqsisqanmanta iskay wataña, Josetaq wisqʼasqallapuni kachkan. Coperoqa paymanta qunqapun. Juk chʼisi Faraonqa iskay musquyta musquykukurqa, tapukurqataq: ‘¿Imataq kay musquy niyta munan?’ nispa. ¿Rikunkichu Faraón musqukusqanta? Qʼayantinqa Faraón yachayniyuq runasta waqyaspa, musqukusqanta willarqa. Paykunataq musqukusqanta mana sutʼinchayta atirqankuchu.

Chayta uyariytawan copero Josemanta yuyarikurqa, Faraonman nirqa: ‘Carcelpi kachkaptiy, chaypi juk runa musquykunata sutʼinchayta yacharqa’, nispa. Chayrayku Faraonqa Joseta carcelmanta waqyachimurqa.

Faraonqa musqukusqanta Joseman jinata willarqa: ‘Sumachaq, qanchis wira wakasta rikurqani. Chaymanta qanchis millay tullu wakasta rikullarqanitaq. Chay qanchis millay tullu wakastaq wira wakasta uquykurqanku’, nispa.

‘Chanta musqukullarqanitaq, qanchis trigo umas juk wiñayllamanta wiñasqanku. Qhipantataq pʼutumusqa qanchis millay chʼaki chʼusu trigo umas. Chay chʼaki chʼusu umastaq mikhuykusqanku chay sumachaq kʼacha trigo umasta’, nispa nillarqataq.

José Faraonman nirqa: ‘Iskaynin musqukusqaykiqa juklla kanku. Qanchis wira wakasqa, qanchis sumachaq trigo umaspis, qanchis wata kanku. Qanchis millay tullu wakastaq, qanchis chʼaki chʼusu trigopis, qanchis yarqhay wata kanku. Kay Egipto jallpʼapi qanchis wata sumaqta mikhuna puqunqa. Chanta qanchis wata sinchi yarqhay kanqa’, nispa.

Chayrayku José Faraonta nirqa: ‘Juk sumaq yuyayniyuq, yachayniyuq runata maskʼay paytaq kay sumaq qanchis watapi trigota tantachun. Jinamanta runa chay qanchis yarqhay wataspi, mana yarqhaymanta wañunqachu’, nisqa.

Faraonqa José parlasqan allin kasqanta nirqa. Josellatataq mikhunata tantananpaq akllarqa. Joseqa Faraonmanta qhipanpi, Egiptopi astawan jatun runa karqa.

Pusaq watanman yarqhay watapi, Joseqa qharikunata jamuqta rikun. ¿Pikunataq kanku? Paykunaqa, ¡Josep 10 kuraq wawqisnin kanku! Tatanku Jacobqa llaqtanpi mikhuna tukukusqanrayku paykunata Egiptoman kacharqa. Joseqa wawqisninta riqsirparqa, paykunataq mana payta riqsirqankuchu. ¿Imaraykutaqri? Imaraykuchus payqa runayarqaña chantapis jukjina pʼachillisqa kachkarqa.

Joseqa wawa kachkaspa, imaynachus musquyninpi wawqisnin paypa ñawpaqinpi kʼumuykukusqankuta yuyarikurqa. ¿Chayta yuyarinkichu? Chayrayku, Joseqa mana runa wañunanpaq Diosninchik Egiptoman kachasqanta yacharqa. ¿Imatataq José ruwarqa? Qhawarina imatachus.

Génesis 41:1-57; 42:1-8; 50:20.