33 yachachiy

Puka quchata chimpanku

¡QHAWARIY! Moisesqa tuqnunta Puka quchaman uqharichkan. Paywan kaqkunaqa israelitas kanku. Faraontaq soldadosninwan quchapi wañuchkanku. Imachus kasqanta qhawarina.

Yachanchikjina Faraonqa israelitakunata Egiptomanta kacharirqa. Yaqha 600.000 qharikuna warmisninkuwan, wawasninkuwan, Egiptomanta lluqsirqanku. Chantapis Jehovap atiyninta rikuspa creeqkuna paykunawan ripullarqankutaq. Tukuypis wakasninwan, ovejasninwan, cabrasninwan ima ripurqanku.

Manaraq Egiptomanta lluqsichkaspa, israelitakunaqa pʼachata, qurita, phatata ima, egipciosmanta mañarqanku. Egipciostaq manchachikuspa israelitakunaman tukuy imata qurqanku.

Israelitakuna Puka quchaman chayaytawan, samarikurqanku. Chaykamataq Faraón, llaqtan ima, israelitasta kacharisqankumanta jinata pesachikurqanku: ‘¿Imatataq ruwachkanchik, pitaq ñuqanchikpaq imatapis ruwanqa?’, nispa.

Jinamanta Faraonqa nisqanmanta kutikurqa. Usqhayta carretasninta soldadosninta wakichikuytawan, 600 sumaq carretaswan, wak carrokunawan ima, israelitasta qhatiyta qallarirqa.

Israelitakuna, Faraonta soldadosnintawan paykunaman qayllaykuqta rikuspa, mayta mancharikurqanku. Mana maymanpis ayqinapaq karqachu. Ñawpaqinkupi Puka qucha kachkarqa, qhipankupitaq egipciokuna. Chayrayku Jehovaqa egipciosmanta jarkʼananpaq juk phuyuta churarqa. Egipciokuna israelitakunata wañuchinankupaq mana rikuyta atirqankuchu.

Chaykama Jehovaqa, Moisesta tuqnunta Puka quchaniqman uqharinanta nirqa. Moisés chayta ruwaptintaq, Jehovaqa wayrata phukuchimurqa. Yakutaq iskayman khallaykukuspa, pañamantaq lluqʼimantaq pirqajina uqharikurqa.

Israelitakunaqa chayninta, chʼaki jallpʼanta ayqirqanku. Chay chhika runaqa may unaypichá quchap chawpinta juknin ladunman chinparqanku. Egipciokuna watiqmanta israelitasta rikuytawan, paykunapis quchap chawpinta israelitasta qhatispa yaykurqanku.

Jehovaqa egipciospa carretasninpa ruedasninta chʼutachirqa. Egipciokuna mancharikuspa jinata qhaparirqanku: ‘Jehová Diosqa paykunaman sayakuspa, maqanakuchkan ñuqanchikpa contranchikta. ¡Ayqinachik israelitaspa ñawpaqinkumanta!’, nispa. Chaywanpis, manaña ayqiyta atirqankuchu.

Chanta Jehová Moisesman tuqnunta mama qucha niqman uqharinanta nirqa. Chayta ruwaptintaq yakuqa jichʼaykakamuspa, tukuy egipciosta, carretasninta ima pʼanpaykurqa. Tukuy Egiptomanta soldadokuna quchaman yaykurqanku. ¡Manataq jukllapis salvakurqachu!

¡Maytachá Diospa llaqtan salvakusqanmanta kusikurqa! Qharikuna Diosta pachis ninankupaq jinata takirqanku: ‘Jehovaqa jatun atiyninwan atipan. Yakuwan pʼampaykuchispa caballospi riqkunata, caballosnintinta’, nispa. Tukuy warmitaq, Moisespa pananta Mariata qhatispa tamborsitusninkuta urqhuytawan tususpa jinata takirqanku: ‘Jehovaqa jatun atiyninwan atipan. Yakuman pʼampaykuchispa caballospi riqkunata, caballosnintinta’, nispa.

Éxodo 12 tʼaqamanta 15 tʼaqakama.