Estebanta chʼanqanku
107 yachachiy
Estebanta chʼanqanku
KAY qunqurisqa runaqa Esteban sutikun. Jesuspa juntʼa sunqu discipulon karqa. ¿Payta imanachkankutaq? Kay runasqa jatuchaq rumiswan payman chuqaykuchkanku. ¿Imaraykutaq Estebanta chiqninku kayjinata ruwanankupaq? Chayta qhawarina.
Estebanqa Diospa atiyninwan sumaq milagrosta ruwaq. Chantapis runaman chiqa kaqta yachachiq, chayrayku runaqa mayta phiñakurqa. Diosqa Estebanman allin yuyata qullarqataq, jinamanta pay chay runakuna llullakuspa yachisqankuta rikuchirqa. Paykunataq astawan phiñakuspa, Estebanta japʼiytawan, wak runaswan llullakuspa payta tumparqanku.
Kuraq kaq sacerdote tapurqa: ‘¿Chiqatachu kaykuna parlachkanku?’, nispa. Estebanqa Bibliamanta sumaqta kutichirqa. Tukuchananpaqtaq, saqra runa unaymantapacha Diospa profetasninta chiqnisqankuta nirqa. Chantapis: ‘Qankunaqa jinallataq kankichik. Diospa kamachin, Jesusta wañuchirqankichik, manataq Diospa leyninta kasukunkichikchu’, nispa nillarqataq.
¡Kayta uyarispa, sacerdotesqa mayta phiñakurqanku! Rabiamanta kirusninkuta kʼarurachirqanku. Chayllapi Esteban umanta uqharispa nirqa: ‘¡Qhawaychik! Cielopi Jesusta, Diospa pañanpi sayachkaqta rikuni’, nispa. Paykuna mana uyarinankupaq ninrisninkuta japʼikurqanku. Estebanta maqaykuytawan, qhatataspa llaqtamanta urqhurqanku.
Chaypiqa punchusninkuta urqhukuspa wayna Sauloman jaywarqanku. ¿Saulota rikunkichu? Chayllapi Estebanta chʼanqayta qallarirqanku. Payqa rikunkijina, qunqurikuspa Diosmata mañakurqa: ‘Jehová, ama kay saqra ruwayrayku jasutʼiychu’, nispa. Payqa wakinkuna sacerdoteswan chʼawkiyachikusqankuta yacharqa. Chaymanta Esteban wañupurqa.
Pillapis ñakʼarichisuptin, ¿kikillantataqchu mañakuwaq, chayri Dios jasutʼinantachu munawaq? Esteban, Jesuswan mana chayta mañakurqankuchu. Paykunaqa saqra runawanpis kʼacha karqanku. Paykunajina kananchik tiyan.
