Islaman ayqinku
112 yachachiy
Islaman ayqinku
¡QHAWARIY, chay barcoqa pʼakikuspa pʼulltiykukuchkan! ¿Chay runakunata yakupi rikunkichu? Wakinqa chʼaki jallpʼaman chayachkankuña. ¿Pablo chaypichu kachkarqa? Imatachus ruwakusqankuta qhawarina.
Yuyariy, Pabloqa iskay watataña Cesareapi wisqʼasqa kachkarqa. Chanta Pablota wak wisqʼasqa runastawan juk barcopi Romaman kachachkarqanku. Creta churup qayllanpi sinchi wayra parawan barcota kayman jaqayman tanqaykacharqa. Runataq mana barcota apayta atirqankuchu. Mana intita nitaq chʼaskastapis rikurqankuchu. Unayña kaptin, runaqa wañupuyllataña yuyarqa.
Chayllapi Pablo sayaykuspa nirqa: ‘Qamkunamanta mana pipis wañunqachu; barcolla chinkanqa. Imaraykuchus tutapi Diospa angelnin ñuqaman jamuwaspa, jinata niwan: “¡Pablo, ama manchachikuychu! Qamqa Romamanta kamachiq Cesarpa ñawpaqinpi sayanayki tiyan. Diosqa tukuy qamwan kaqkunata salvanqa”’, nispa.
Wayra parawan qallarisqanmantapacha 14 pʼunchayninpi khuskan tutanpi, barcopi riqkunaqa yaku mana ancha ukhuchu kasqanta reparanku. Tuta kasqanrayku qaqaman qukuyta manchachikuspa, barcop anclanta yakuman wikchʼuykurqanku. Sutʼiyaptinkama chʼaki jallpʼata rikuytawan barcota jallpʼaniqman chimpachiyta qallarirqanku.
Chaywanpis, jallpʼaman qayllaykuchkaptinku barcoqa, tʼiyuman satʼiykukurqa. Chaypi yaku waqtaspa barcota phiriyta qallarirqa. Barcota apaykachaq capitanqa nirqa, ‘waytʼayta yachaqkuna waytʼaspa ñawpaqta jallpʼaman lluqsinankuta’. Mana nadayta yachaqkunatataq barcop kʼullusninmanta japʼikuspa ñawpaqkunata qhatinankuta nillarqataq. Chaytataq ruwarqanku, jinamanta ángel nisqanmanjina, 276 barcopi kaqkuna tukuyninku salvakurqanku.
Chay islaqa Malta sutikurqa. Chaymanta runaqa kʼacha runa karqanku. Barcopi kaqkunata yanaparqanku. Tiempo allinchakuptinkama Pablota wak barcoman churaspa Romaman aparqanku.
