113 yachachiy

Pablo Romapi

QHAWARIY Pablop cadenasninta, paywan kaq soldadotapis. Pabloqa Romapi wisqʼasqa kachkarqa. Chaypitaq imatachus César paywan ruwananta suyachkarqa. Wisqʼasqa kachkaptin wakkuna payta watukuq kanku.

Romaman chayasqanmanta kimsa pʼunchayninman, Pabloqa judiospa kuraqkunata waqyachirqa. Chayrayku, Romamanta achkha judiokuna Pabloman rirqanku. Pabloqa Jesusmanta, Diospa Reinonmantawan willarqa. Wakinkuna cristianoman tukurqanku, wakinkunataq mana.

Pablo paywan kaq soldadostapis willallarqataq. Iskay wata kasqanpi tukuy atisqanman willarqa. Jinamanta, Cesarpa ayllunmantapis kay Diospa Reinonmanta sumaq willaykunata uyarispa, wakinkuna cristiano kayman tikrakurqanku.

¿Pitaq mesapi qillqachkasqanta yachankichu? Payqa Timoteo. Paypis Diospa Reinomanta willasqanrayku wisqʼachikullarqataq, chaymanta kacharichikuytawan Pablota yanapaq rirqa. ¿Imatataq qillqachkanri? Qhawarina.

¿Filipos, Éfeso llaqtamanta 110 willaypi yachasqanchikta yuyarinkichu? Pabloqa qutuchakuyta qallarinankupaq yanaparqa. Wisqʼasqa kachkaspa, chay cristianosman cartasta apachirqa. Chay cartakunaqa Bibliapi rikhurin, Efesios, Filipenses ima sutikunku. Pabloqa Filipospi cristianospaq Timoteowan cartata qillqachillarqataq.

Filipensesqa Pablota mayta yanaparqanku. Wisqʼasqa kachkaptin juk regalota apachirqanku, Pablotaq chay cartaniqta pachista qurqa. Epafrodito chay regalota apaytawan mayta unqurqa, yaqha wañupurqa. Chaymanta allinyakuytawan Filipos llaqtaman kutipurqa. Pay chay Pablop, Timoteop cartanta aparqa.

Pabloqa iskay cartasta qillqallarqataq, Bibliapi chaykunata tarisunman. Jukninqa Colosas llaqtapaq. Chay cartaqa Colosenses sutikun. Juknintaq munasqa masin Filemonpaq, payqa Colosaspi tiyakuq. Chay cartapiqa Filemonpa kamachinmanta Onesimomanta parlachkan.

Onesimoqa Filemonmanta Romaman ayqirqa. Imaynamantacha Onésimo, Pablo Romapi wisqʼasqa kasqanta yacharqa. Pablota waturikuq riptintaq, Pablo Diosmanta yachachirqa. Onesimotaq cristianoman tukurqa. Chanta ayqimusqanmanta pesachikurqa. Chayrayku yachankichu Pablo Filemonman imatachus qillqarqa.

Pabloqa Filemón Onesimota perdonananta nirqa: ‘Kutichipuyki, payqa manaña kamachiykillachu. Kunanqa juk allin cristiano wawqiyki’, nispa. Onésimo Colosasman kutispa, kay iskay cartata aparqa, juknin colosensespaq, juknintaq Filemonpaq. Filemonqa kamachin Onésimo cristiano kasqanmanta maytacha kusikurqa

Pabloqa sumaq willaykunata filipensesman qillqarqa: ‘Timoteota kachamuchkaykichik. Chaymanta ñuqapis jamusaq’, nispa. Filemonmantaq nirqa: ‘Juk kʼuchituta wasiykiman chayamunaypaq wakichipuway’, nispa.

Pablota kachariptinku, payqa may chhika cristianosta tukuyniqman waturikuq rirqa. Chaymanta watiqmanta Pablota Romapi wisqʼaykurqanku. Payqa wañunanta yacharqa. Chayrayku, Timoteota usqhayta jamunanpaq qillqarqa: ‘Diospa munayninta juntʼani, paytaq ruwasqaymanjina imatapis quwanqa’, nispa. Pablo wañusqanmanta tumpamantawan romanokuna Jerusalenta thuñirqanku.

Bibliapiqa astawan willaykuna tiyan. Jehovaqa Juanwan Bibliamanta qhipa kaq librituta qillqachirqa, kaykunamanta jukninqa Apocalipsis kaq. Kay libroqa imachus qhipaman kananmanta parlan. Chayta kunan rikusunchik.

Hechos 28:16-31; Filipenses 1:13; 2:19-30; 4:18-23; Hebreos 13:23; Filemón 1-25; Colosenses 4:7-9; 2 Timoteo 4:7-9.