106 yachachiy

Wisqʼaymanta kacharichikunku

CHAY angelta qhawariy, wisqʼana wasip punkunta kichariytawan, Jesuspa apostolesninta kacharichkan. Imaraykuchus wisqʼachikusqankuta qhawarina.

Espiritu santo tʼakakamusqanmanta qhipaman, juk tarde Pedrowan Juanwan temploman rirqanku. Punkup qayllanpi, juk suchu runa kachkarqa, jinapuni pay nacekurqa. Chay suchu runata chaypi qullqita mañakunanpaq, saqiq kanku. Payqa Pedrota Juantawan rikuytawan mañarikullarqataq. ¿Imatataq paykuna ruwarqanku?

Pedroqa sayaytawan qhawarispa nirqa: ‘Mana qullqi kapuwanchu, kapuwasqanta qusqayki. ¡Jesuspa suntinpi, sayariy puriytaq!’, nispa Pedro, pañan makinmanta japʼiytawan runata sayarichirqa. Chay runataq phinkispa sayariytawan, puriyta qallarirqa. Kayta rikuytawan runaqa tʼukurqa, kusikurqataq.

Pedro nirqa: ‘Diospa atiynin, Jesusta kawsarichimurqa, chay atiywantaq kay runata purichiyku’, nispa. Pedro Juanwan chayta parlachkaptinku, sacerdotes jamurqanku. Paykuna Jesús kawsarimusqanta yachachisqankurayku sacerdotes phiñakurqanku. Chayrayku iskayninkuta japʼiytawan wisqʼana wasiman wisqʼaykurqanku.

Qʼayantin, sacerdotesqa juk jatun tantakuyta ruwarqanku. Chaymantaq Pedrota, Juanta, jampisqa runatawan apaykuspa, tapurqanku: ‘¿Ima atiywantaq chayta ruwankichik?’, nispa.

Pedro nirqa: ‘Diosqa atiyninwan Jesusta kawsarichimurqa, chay atiyllawantaq kayta ruwayku’ nispa. Sacerdotesqa, kay milagrota mana pakayta atisqankurayku, mana imatapis ruwayta atirqankuchu. Chayrayku, amaña Jesusmanta juktawan parlaychikchu, niytawan kacharipurqanku.

Apostolkuna ripuytawan Jesusmanta willallarqankupuni, unqusqastataq thañichillarqankupuni. Kay ruwasqankuqa tukuyniqpi uyarikurqa. Chayrayku, Jerusalenpa muyuyninpi llaqtasmantapis, may chhika unqusqakunata apóstoles thañichinankupaq apamurqanku. Chayta uyariytawan sacerdotesqa apostolesta watiqmanta wisqʼaykurqanku. Chaywanpis, mana wisqʼasqaschu qhipakurqanku.

Chay tuta, dibujopi rikunkijina, Diospa angelnin wisqʼana wasip punkunta kicharirqa. Jinatataq nirqa: ‘Riychik, templopi sayaspataq runaman parlamullaychikpuni’, nispa. Sacerdotesqa qʼayantin apostolesta apamunankuta nirqanku, manataq pitapis tarirqankuchu. Chaymantaqa apostolesta templopi tariytawan Sanedrín nisqaman apallarqakutaq.

Sacerdotes nirqanku: ‘Manaña Jesusmanta yachachinaykichikta kamachirqayku. Qamkunataq, Jerusalenta chay yachachiywan juntʼachinkichik’, nispa. Apostolestaq kutichirqanku: ‘Diosta kamachiqtajina kasukunayku tiyan, runata kasukunaykumantaqa’, nispa. Paykunaqa runaman parlallarqankupuni. ¿Manachu paykunajina ruwananchik kanman?

Hechos libromanta 3 tʼaqamanta 5 tʼaqakama.