100 yachachiy

Jesús huertaman rin

WASIMANTA lluqsiytawan Jesús apostolesninwan Getsemaní huertaman rirqanku. Achkha kutitaña chayman rirqanku. Chayaytawan Jesusqa mana puñunankuta, manaqa Diosmanta mañakunankuta nirqa, chanta juk chhikanta karunchakuspa, pay pampa qhawarisqa Diosmanta mañakurqa.

Chaymanta Jesús apostolesninta qhawamurqa. ¿Imatataq paykuna ruwachkarqanku? ¡Puñuchkarqanku! Kimsantin kutimusqanpi, discipulosninta puñuchkaqta tariparqa. Chaypitaq Jesús nirqa: ‘¿Imaynatá kay tukuy imas kachkaptin puñuwaqchikri?, ama puñuychikchu. Hora qayllamuchkanña, ñuqataq juchasapaspa makinpi jaywasqa kasaq’, nispa.

Chayllapi achkha runap chʼaqwayninta uyarikurqa. ¡Qhawariy! ¡Runaqa kʼaspiswan, espadaswan ima Jesusta japʼichkanku! Chantapis, kʼancharinanpaq antorchasta kachkanku. Chay runakunap chawpinkumanta juk runa lluqsirqa, Jesusman qayllaykuspataq muchʼaykuspa, napaykurqa. Dibujopi rikunkijina. ¡Chay runaqa Judas Iscariote karqa! ¿Imaraykutaq Jesusta muchʼaykuchkan?

Jesús tapurqa: ‘Judas, ¿muchʼaykuwaspachu japʼichiwanki?’, nispa. Ari, chay muchʼayqa juk señal karqa. Jinamanta Judasqa mayqinchus Jesús kasqata rikuchirqa, paykuna japʼinankupaq. Chayta rikuspa enemigosninqa Jesusta japʼirqanku. Pedrotaq mana jinallata Jesusta apakapunankuta munarqachu. Chayrayku, espadanta urqhuspa juk runap paña ninrinta qhururparqa. Jesustaq chay runap ninrinta llukchirispa jampirqa.

Jesús Pedrota nirqa: ‘Espadaykita waqaychay. ¿Manachu Tataymanta may chhika angelesta salvawananpaq mañakunayta creenki?’, nispa. ¡Ari, atinman karqa! Jesusqa mana Tatan angelesta kachamunanta mañakurqachu, enemigosnin apakapunankupaq tiempo chayamusqanta yacharqa. Jesusqa japʼinankuta saqin. Kunantaq imatachus Jesuswan ruwasqankuta qhawarina.

Mateo 26:36-56; Lucas 22:39-53; Juan 18:1-12.