87 yachachiy

Jesús maqtʼamanta templopi

¿KAY maqtʼitata kuraq runakunawan parlaqta rikunkichu? Paykuna Diospa wasinpi yachachinku. Chay maqtʼitaqa Jesús. Payqa wiñarinña, kunanqa 12 watayuq kachkan.

Yachachiqkunaqa Jesús mayta Diosmanta, rimayninmanta ima, yachasqanta rikuspa, mayta tʼukurqanku. Chantapis ¿imaraykutaq José Mariawan mana paywanchu kachkarqanku? ¿Maypi kachkarqanku?

Sapa wata José familianwan Jerusalenman pascuata ruwaq riq kanku. Nazaretmantapacha Jerusalenkamaqa karuta purinanku karqa. Chaypacha mana autos nitaq trenpis karqaraqchu. Runasqa chay pachaqa purispalla maymanpis riq kanku. Jerusalenman chayanankupaq 3 pʼunchayta purinanku karqa.

Chay pachaqa, José jatun familiayuqña karqa. Payqa Jesuspa sullkʼa wawqisitusnintapis qhawanan karqa. Chay wataqa José, Mariawan, wawasninwan ima, Nazaretman kutinpuchkarqanku. Paykunaqa Jesús wak runaswan richkasqanta nirqanku. Laqhayachkaptinña sayaytawan Jesusta watukurqanku, manataq tarirqankuchu. Tukuyniqpi maskʼaytawan Jerusalenman maskʼaq kutirirqanku.

Temploman rispa chaypi Jesusta tarirqanku. Yachachiqkunata uyarispa, tapurichkarqa. Runataq Jesusta uyarispa, tʼukulla karqa. Maria nirqa: ‘Waway, ¿imaraykutaq kay jinata ruwawaykuri?, Tataykiwan ñuqawan may phutisqa maskʼasuyku’, nispa.

‘¿Imaraykutaq maskʼawarqankichik? ¿Manachu Tataypa wasinpi kanayta yacharqankichik?’ nispa Jesús kutichirqa.

Ari, Jesusqa maypichus Diosmanta yachachikun, chaypi kakuyta munaq. Ñuqanchikpis jinallataq kananchik tiyan, ¿ichari? Nazaretpi, Jesusqa sapa semana Diosta yupaychana tantakuyman riq. Chaypi allinta uyarisqanrayku achkhata Diospa rimayninmanta yachakurqa. Ñuqanchikpis Jesusjina ruwananchik tiyan.

Lucas 2:41-52; Mateo 13:53-56.