97 yachachiy

Jesús reyjina jamun

CHAY mana rikuq runasta thañichisqanmanta tumpamantawan, Jesusqa Jerusalenpa qayllanpi juk juchʼuy ranchoman jamurqa. Iskay discipulosninman nirqa: ‘Chay ranchoman yaykuspa, juk malta burrota tarinkichik. Phaskaraspataq apanpuwankichik’, nispa.

Chay burrota apamuptinku, Jesús chay burritoman lluqʼaykuspa Jerusalenman kachaykukurqa. Llaqtaman qayllaykuchkaptinqa, may chhika runa payta taripaq jamurqanku. Wakinqa mantasninkuta urqhukuspa, ñanninpi churaykurqanku. Wakinkunataq palmera sachʼasta ñanninman churaspa, qhaparirqanku: ‘¡Jehovap sutinpi jamuqtaqa Dios bendecichun!’, nispa.

Unayqa Israel llaqtapi, musuq reykuna, tukuy runa qhawananpaq, juk burropi llaqtaman yaykuq kanku. Jesuspis kikinta ruwarqa. Kay runakunamanta wakillan Jesús reyninku kananta munarqanku. Chaytaq Jesús templopi kachkaptin rikukurqa.

Templopiqa, Jesús mana rikuqkunata, suchu runasta ima, thañichirqa. Wawastaq chaykunata rikuspaqa, Jesusta qhaparispa jatuncharqanku. Sacerdotes chayta uyarispa mayta phiñakurqanku, Jesusta nirqanku: ‘¿Kay wawas nichkasqankuta uyarinkichu?, nispa.

Jesustaq kutichirqa: ‘Ari, uyarini. Manachu maykʼaqllapis Bibliapi nisqanta ñawirirqankichik: Juchʼuy wawitaspa siminmanta, yupaychaykunata Diosninchik urqhunanta?’, nispa. Wawakunataq Diospa qusqan reyta jatunchallarqankupuni.

Ñuqanchikpis kay wawasjina kananchik tiyan, ¿ichari? Ichapis wakin runaqa manaña Diospa reinonmanta parlananchikta munanqankuchu. Jina kaptinpis, ñuqanchikqa tukuyman Jesús tukuy imata ruwananmanta parlamullasunpuni.

Jesús Jallpʼapi kachkaspaqa, manaraq reyjina kamachiyta qallarirqachu. ¿Maykʼaqtaq kamachiyta qallarinan karqari? Discipulosninpis chayta yachayta munarqanku. Chaytataq rikusunchik.

Mateo 21:1-17; Juan 12:12-16.