91 yachachiy

Jesús urqupi yachachin

¿JESUSTA chukusqata rikunkichu? Galileamanta runata juk urqupi yachachichkan. Aswan qayllanpi kaqkuna payta qhatiqkuna kanku. Jesusqa, apóstoles kanankupaq, 12 runasta akllakurqa. Apostolesqa Jesuspa sumaq yachachisqasnin karqanku. ¿Apostolespa sutinkuta yachankichu?

Jina sutikurqanku: Simón Pedro, Andrés wawqinwan. Chanta, Santiago Juan wawqinwan. Wak apóstol Santiago sutikullarqataq, juknintaq Simón sutikullarqataq. Iskay Judas sutiyuq karqanku, juknin Judas Iscariote, juknintaq Judas Tadeo. Chantapis, Felipe, Natanael (Bartolomé sutikullarqataq), Mateo, Tomás ima karqanku.

Samariamanta kutiytawan, Jesusqa jinata runaman willayta qallarirqa: ‘Diospa janaqpacha Reinon qayllamunña’, nispa. ¿Imachus Diospa Reinon kasqanta yachankichu? Diospa Reinonqa, Diospa kamachiynin. Jesús reynin kachkan. Payqa janaqpachamantapacha Jallapʼapi tukuy ima allin kananpaq kamachimunqa. Tukuy Jallpʼatataq juk paraisoman tukuchinqa.

Jesusqa Diospa Reinonmanta runaman yachachichkan. Chantapis, ‘Ajinata mañakunkichik’, nispa nichkan: ‘Janaq pachapi kachkaq Tatayku, sutiyki jatunchasqa kachun. Reinoki jamuchun. Munayniyki kay pachapi, janaqpachapipis ruwasqa kachun’. Kay mañakuytaqa, ‘Señorpa mañakuynin’, chayri, ‘Padrenuestro’, nispa sutichakun. ¿Kay mañakuyta tukuyninta yachankichu?

Jesúsqa runaman imaynatachus allinta apanakuyta yachachillarqataq. Nirqa: ‘Imatachus qampaq ruwanankuta munanki chayqa, jinallatataq qampis paykunapaq ruway’ nispa. ¿Munawaqchu wakkuna qamwan kʼacha kanankuta? Chayrayku wakkunawan kʼachallataq kanayki tiyan. Paraisopi tukuypis chayta ruwaptinkuqa, tukuypaq may kʼacha kanqa, ¿ichari?

Mateo 5 tʼaqamanta 7 tʼaqakama; 10:1-4.