Jesús uywap puñunanpi nacekun
85 yachachiy
Jesús uywap puñunanpi nacekun
¿PICHUS chay wawita kasqanta yachankichu? Chay wawitaqa Jesús. Uywap puñunan wasinpi nacekurqa. Mariaqa ichhu patapi Jesusta puñuchichkan. ¿Imartaykutaq Mariawan Josewan chaypi kachkanku? Chaypiqa mana wawita nacekunmanchu, ¿ichari?
Mana chaypiqa wawitayuq kankumanchu. Chaywanpis, paykunaqa kaypi kachkanku, imaptinchus Romapi kamachiq César Augustoqa, juk kamachiyta qurqa. Tukuy runa maypichus nacekurqa chayman rispa, sutinkuta libropi churachinanku karqa. Joseqa Belenpi nacekurqa. Paykuna Belenman chayaptinku, mana juk wasillapis qhipakunankupaq karqachu. Chayrayku, uywap puñunanman rirqanku. ¡Chay pʼunchaypi María Jesusta nacechikurqa! Chaywanpis, rikunkijina wawitaqa waliqlla kakuchkan.
¿Michiqkuna Jesusta watukuq jamusqankuta rikunkichu? Paykunaqa campopi ovejasninkuta michichkarqanku, chayllapi juk kʼanchay rikhurirqa. Juk ángel karqa. Michiqkuna mayta mancharikurqanku. Angelqa paykunata nirqa: ‘¡Mana machachikuychikchu! Sumaq willaykunata apamuykichik. Kunan, Belén llaqtapi, Cristo Señor nacekun. ¡Pay llaqtata salvanqa! Paytaqa uywa qaranapi sirikuchkaqta, janantaswan kʼirusqata tarinkichik’, nispa. Chayllapi achkha ángeles jamuspa Diosta yupaychayta qallarirqanku. Usqhayta chay michiqkuna Jesusta maskʼamurqanku.
¿Imaraykutaq Jesús mana mayqin runajinallachu karqa? ¿Pichus kasqanta yachankichu? Yuyariy, kay librituta ñawiriyta qallarichkaspa, Diospa kuraq churinmanta parlarqanchik, ¿ichari? Payqa Jehová Diosta janaqpachata, Jallpʼata ima, ruwaysirqa. ¡Pay Jesús karqa!
Ari, Jehovaqa churinpa kawsayninta janaqpachamanta Mariap wisanman churarqa. Chaypiqa mayqin wawajinallapis wiñakurqa. Chaywanpis, chay wawitaqa Diospa wawan karqa. Uywap puñuna wasinpi nacekurqa. ¿Kunan, yachankichu imaraykuchus angelkuna Jesús nacekusqanmanta willaspa kusikuchkarqanku?
