94 yachachiy

Wawitasta munakun

JESÚS kay wawitata marqʼarikusqanta, ¿rikunkichu? Payqa wawitasta manchayta munakuq. Chaypi qhawaqkunataq discipulosnin kanku. ¿Imatachus Jesús paykunaman nichkasqanta yachankichu?

Jesús apostolesninwan Capernaummanta kutimuchkarqanku. Apostolesqa ñanpi siminakurqanku. Chayrayku, Jesús kutimusqankutawan tapurqa: ‘¿Imamantataq ñanpi siminakuchkarqankichik?’, nispa. Jesusqa imamantachus siminakusqankuta yacharqa. Chaywanpis, paykunata tapurqa siminkumanta uyarinanpaq.

Apostolesqa, pichus aswan kuraq kasqanmanta siminakusqankurayku mana imatapis nirqankuchu. Wakinqa jatunchakuyta munarqanku. Kunanri, ¿imaynatá Jesús paykunata kʼamirinman karqa?

Jesusqa juk wawitata waqyaspa, paykunap ñawpaqinman churarqa. Chanta, discipulosninman nirqa: ‘Kayta yachanaykichikta munani: Kay wawamanjina tukuychik. Manachayqa, Diospa Reinoman mana jaykʼaq yaykunkichikchu. Aswan kuraqjina qhawasqaqa, kay wawamanjina tukunan tiyan’, nispa. ¿Imaraykutaq kayta nirqa?

Wawitasqa mana jatunchakunkuchu, nitaq sumaq runa kayta munankuchu. Chayrayku, apostolesqa wawajina kayta yachananku karqa. Jinamanta manaña pichus aswan kuraq kasqanmanta, siminakunankupaq nitaq maqanakunankupaq.

Wak kutipis Jesús wawitasta munakusqanta rikuchillarqataq. Juk pʼunchay runasqa, wawitasninkuta Jesusta qhawanankupaq pusamurqanku. Apostolesqa wawitasta jarkʼachkarqanku, Jesustaq nirqa: ‘Wawas ñuqaman jamunankuta saqiychik, amataq paykunata jarkʼaychikchu, imaraykuchus Diospa Reinonqa, paykunajina kaqkunapaq’, nispa. Chaymanta, wawitasta marqʼarikuspa bendecirqa. Jesús wawitasta munakusqanta yachaspa mayta kusikunchik, ¿ichari?

Mateo 18:1-4; 19:13-15; Marcos 9:33-37; 10:13-16.