81 yachachiy

Dios yanapananta suyanku

BABILONIAMANTA Jerusalenman achkha runas ripurqanku. Jerusalenman chayaytawan, chʼin raqaypacha kasqanta rikunku. Israelitasqa watiqmanta tukuy imata ruwananku karqa.

Ñawpaqtaqa Jehovapaq juk altarta ruwarqanku. Chay altarpiqa tukuy imata Jehovaman jaywaq kanku. Chaymanta Diospa wasintañataq ruwayta qallarirqanku. Chayniqpi tiyakuqkuna enemigosqa ruwachkasqankuta saqinankupaq israelitasta manchachiyta munarqanku. Chayrayku, Persiamanta musuq reywan ruwasqankuta sayachinankupaq, juk kamachiyta urqhuchirqanku.

Jerusalenpi 17 wataña kachkaptinku, Diosninchik profeta Hageota, Zacariasta ima Jerusalenman kacharqa, israelitasta watiqmanta Diospa wasinta ruwanankuta ninankupaq. Juk ley mana runwanankuta niptinpis, Diospa yanapayninta suyaspa, ruwayta qallarirqanku.

Chayrayku, Persiamanta juk atiyniyuq runa Tatnai sutichasqa jamurqa, imaraykutaq Diospa wasinta watiqmanta ruwachkasqankuta tapuptin. Israelitasqa jinata kutichirqanku: ‘Babiloniapi rey Ciro jinata kamachiwayku: Jerusalenman riychik, chaypitaq Jehová Diosniykichikpa wasita ruwamuychik’, nispa

Tatnai Babiloniaman juk cartata apachispa tapurqa, ¿Ciro Jerusalén templota ruwakunanta nirqachu? nispa. Persiamanta reytaq kutichirqa: Ari, ruwakunanta nirqa. Chayrayku: ‘Israelitas Diospa wasinta ruwanankuta saqiychik, astawanpis yanapaychik’, nispa rey nirqa. Istaelitastaq tawa watapi templota tukurqanku, charaykutaq mayta kusikurqanku.

Diospa wasinta ruwasqankumanta yaqha 48 wataña karqa. Jerusalenpi runaqa wakcha karqa. Chayrayku Diospa wasin, llaqtapis mana kʼachituchu karqa. Babiloniapi israelita Esdrasqa Diospa wasin mana allin kʼachanchasqachu kasqanta yacharqa. ¿Yachankichu imatachus templota allinchanapaq ruwasqanta?

Esdrasqa Persiamanta rey Artajerjeswan Jerusalenman rinanpaq parlarqa. Kay kʼacha reytaq achkha regalosta Jerusalenman apananpaq qurqa. Esdrasqa Babiloniapi kaq israelitasta yanapanankuta nillarqataq. Chayrayku 6.000 runa riyta munarqanku. May chhika qurita, phatata, wak imastawan Jerusalenman aparqanku.

Esdras tumpata mancharikurqa, ñanpi saqra runas kasqanrayku. Chay saqra runaqa, runata wañuchispa suwaq kanku. Chayrayku, Esdrasqa runata tantaytawan dibujopi rukunkijina, Diosmanta mañakunku tukuy risqankupi jarkʼananpaq.

Jehová paykunata jarkʼarqa. Tawa killata puriytawan, Jerusalenman waliqlla chayarqanku. Diospi atiykukuptinchikqa, Dios jarkʼawanchik.

Esdras 2 tʼaqamanta 8 tʼaqakama.