Pirqapi qillqa
78 yachachiy
Pirqapi qillqa
¿IMATA kaypi ruwachkanku? Kay runakunaqa raymichakuchkanku. Babiloniamanta reyqa achkha runata waqyakun. Diospa wasinmanta, qurimanta copasta, phatamanta chuwasta ima, urqhuspa apaykachachkanku. Chayllapi juk maki rikhuriytawan qillqayta qallarirqa. Tukuytaq mancharikunku.
Nabucodonosorpa allchhin Belsasarqa kamachichkarqa. Payqa qhaparispa yachayniyuqkunata nirqa: ‘Pichus kay pirqapi qillqasqata ñawiriqmanqa, may chhika regalosta qusaq, chantapis reinoypi kimsa kaq kamachiq kanqa’, nispa. Chaywanpis ni juk yachayniyuq chay qillqata ñayiriyta atirqachu, nitaq imatachus niyta munasqanta yacharqachu.
Reypa mamanqa chʼaqwata uyarispa, mikhuchkanku chayman yaykurqa. ‘Ama llakikuychikchu’, nispa reyman nirqa. ‘Reinoykipi juk runa tiyan, paytaq santo dioskunata riqsin. Nabucodonosor abueloyki rey kachkaptin, chay runata tukuy yachaqkunata kamachinanpaq churarqa. Payqa Daniel sutikun. Payta waqyachiy, Danieltaq imachus kay qillqasqa niyta munasqanta willasunqa’, nispa.
Usqhayta Danielta apamurqanku. Payqa mana imatapis japʼikuyta munarqachu. Chaymantataq Daniel nirqa: ‘Jehová abueloykimanta reinonta qhichurqa, payqa mayta sunqunpi jatunchakusqanrayku. Chayrayku, Jehová payta jasutʼirqa’, nispa willarqa.
‘Qamqa Dios chayta ruwasqanta yacharqanki. Chaywanpis Nabucodonosorjina sunquykipi jatunchakunki. Jehovap wasinmanta copasta, chuwasta ima apamuspa, chaypi ukyarichkanki. Rumimanta, maderamanta dioskunata yupaychanki, manataq may Sumaq tukuy ima Ruwaqta yupaychankichu. Chayrayku Dios jinata chay makiwan qillqachin.
‘Kayta pirqapi qillqakun: MENE, MENE, TEKEL, UPARSIN ima’, nispa Daniel nirqa.
Chaymanta: ‘MENE rimayqa, Dios reinoykip pʼunchayninta yupasqanta, chantapis, rey kasqaki tukukapusqanta niyta munan. TEKEL rimaytaq, balanzapi pesasqa kasqaykita niyta munan, manataq allin runa kasqayki yachakunña. UPARSIN rimaytaq, reinoyki medosman, persasman ima qusqa kasqata niyta munan’, nispa Daniel sutʼincharqa.
Daniel parlallachkaptinraq, medoswan persaswan Babiloniata urmachiq jamurqanku. tukuy llaqtata japʼikapurqanku, Belsasartataq wañuchirqanku. ¡Pirqapi qillqakusqanqa chay chʼisipacha juntʼakurqa! ¿Imanakunqataq israelitaswanri? Qhipaman chayta yachasunchik. Kunanqa Danielmantaraq yachakuna.
